చపాతీ,రైస్‌ లోకి అదిరిపోయే కాంబినేషన్..హై ప్రొటీన్ చన్నా పాలక్ మసాలా..ఎలా చేసుకోవాలంటే..

భారతీయ వంటకాలలో శాఖాహారులకు ప్రొటీన్ (మాంసకృత్తులు) అందించే అత్యుత్తమ వంటకాలలో చన్నా పాలక్ ఒకటి. ఇది కేవలం రుచికి మాత్రమే కాకుండా, పోషకాల గని అని చెప్పవచ్చు. శనగలలోని ప్రొటీన్, పాలకూరలోని ఐరన్, విటమిన్లు కలిసి దీనిని ఒక సంపూర్ణ ఆహారంగా మారుస్తాయి.

బరువు తగ్గాలనుకునే వారికి, కండరాలను పెంచుకోవాలనుకునే వారికి ఇది ఒక బెస్ట్ ఆప్షన్. హై ప్రొటీన్ చన్నా పాలక్ మసాలా మీ ఇంట్లోనే ఈజీగా ఎలా తయారుచేసుకోవాలో ఇక్కడ చూడండి.

కావలసిన పదార్థాలు
కాబూలీ శనగలు: 1 కప్పు
పాలకూర: 1 పెద్ద కట్ట (250-300 గ్రాములు)
నూనె: 2 టేబుల్ స్పూన్లు
బిర్యానీ ఆకు: 1
జీలకర్ర: 1 టీస్పూన్
ఉల్లిపాయలు: 2
అల్లంవెల్లుల్లి పేస్ట్: 1 టేబుల్ స్పూన్
పచ్చిమిర్చి: 2
టమోటాలు: 2
పసుపు: పావు టీస్పూన్
కారం: 1 టీస్పూన్
ధనియాల పొడి: 1 టేబుల్ స్పూన్
జీలకర్ర పొడి: అర టీస్పూన్
చన్నా మసాలా పొడి: 1 టీస్పూన్
గరం మసాలా: అర టీస్పూన్
ఉప్పు: రుచికి సరిపడా
కసూరి మేతి: 1 టీస్పూన్
నిమ్మరసం: 1 టీస్పూన్

తయారీ విధానం

-ముందుగా కాబూలీ శనగలను కనీసం 8 గంటలు లేదా రాత్రంతా నీటిలో నానబెట్టాలి.

-తర్వాత నానబెట్టిన శనగలను కుక్కర్‌ లో వేసి, తగినన్ని నీళ్లు, చిటికెడు ఉప్పు వేసి 5-6 విజిల్స్ వచ్చే వరకు మెత్తగా ఉడికించుకోవాలి. శనగలు చేతితో నొక్కితే మెత్తగా అయ్యేలా ఉండాలి.

-ఇప్పుడు ఒక గిన్నెలో నీళ్లు మరిగించి, అందులో పాలకూరను వేసి 2-3 నిమిషాలు ఉంచాలి. తర్వాత వెంటనే ఆ ఆకులను తీసి చల్లటి నీటిలో వేయాలి. దీనివల్ల పాలకూర తన సహజమైన ఆకుపచ్చ రంగును కోల్పోదు.

-నీటిని వడకట్టి, పాలకూరను, పచ్చిమిర్చిని మిక్సీ జార్‌ లో వేసి మెత్తటి పేస్ట్‌ లా చేసుకోవాలి.

-ఇప్పుడు స్టవ్ మీద కడాయి పెట్టి నూనె లేదా నెయ్యి వేడి చేయాలి. నూనె వేడయ్యాక బిర్యానీ ఆకు, జీలకర్ర వేసి వేయించాలి. ఇప్పుడు సన్నగా తరిగిన ఉల్లిపాయలు వేసి, అవి బంగారు రంగులోకి వచ్చే వరకు వేయించాలి. తర్వాత అల్లం-వెల్లుల్లి పేస్ట్ వేసి పచ్చి వాసన పోయే వరకు వేయించాలి.

-ఇప్పుడు కడాయిలో టమోటా ముక్కలు లేదా ప్యూరీని వేసి, మెత్తబడే వరకు ఉడికించాలి. నూనె పైకి తేలే వరకు వేయించాలి.

-స్టవ్ మంట తగ్గించి పసుపు, కారం, ధనియాల పొడి, జీలకర్ర పొడి, చన్నా మసాలా వేసి బాగా కలపాలి. మసాలాలు మాడిపోకుండా చూసుకోవాలి.

-ఇప్పుడు ముందుగా సిద్ధం చేసుకున్న పాలకూర పేస్ట్‌ ను వేసి 2-3 నిమిషాలు ఉడికించాక ఉడికించి పెట్టుకున్న శనగలను (నీటితో సహా లేదా నీరు వడకట్టి) కడాయిలో వేయాలి. రుచికి సరిపడా ఉప్పు వేసి మూత పెట్టి 5-10 నిమిషాలు సన్నని మంటపై ఉడికించాలి.

-చివరగా గరం మసాలా, కసూరి మేతి వేసి కలపాలి. స్టవ్ ఆపేసి, నిమ్మరసం పిండాలి. అంతే టేస్టీ చన్నా పాలక్ మసాలా రెడీ.