నోట్లో వేస్తే కరిగిపోయే అద్భుతమైన సొరకాయ బర్ఫీ..చేసుకోవడం చాలా ఈజీ

భారతీయ వంటకాలలో స్వీట్లకు ఒక ప్రత్యేక స్థానం ఉంది. పండుగలైనా, వేడుకలైనా లేదా చిన్నపాటి సంతోషాలైనా.. నోరు తీపి చేసుకోకుండా మనకు సంబరం పూర్తి కాదు. స్వీట్లలోనే ఒక అద్భుతమైన, నోరూరించే స్వీట్ సొరకాయ బర్ఫీ.

సొరకాయ బర్ఫీ చూడటానికి ఆకర్షణీయంగా, తినడానికి మృదువుగా, నోట్లో వేసుకుంటే కరిగిపోయేలా ఉంటుంది. మైదా, శనగపిండి వంటి వాటితో చేసే స్వీట్లతో పోలిస్తే ఇది చాలా తేలికైనది,ఆరోగ్యకరమైనది. కూరగాయలు తినని పిల్లలకు సొరకాయలోని పోషకాలను అందించడానికి ఇది ఒక తెలివైన మార్గం.

సొరకాయ బర్ఫీ తయారీకి కావాల్సిన పదార్థాలు
లేత సొరకాయ - 1 (సుమారు అర కేజీ)
చక్కెర - 1 కప్పు
పాలు - 1 కప్పు
ఖోయా (స్వీట్‌ లెస్) లేదా పాల పొడి - అర కప్పు
నెయ్యి - 5 టేబుల్ స్పూన్లు
యాలకుల పొడి - అర టీస్పూన్
జీడిపప్పు, బాదం, పిస్తా పలుకుల తరుము - పావు కప్పు
ఫుడ్ కలర్ (ఆకుపచ్చ) - చిటికెడు

తయారీ విధానం

ముందుగా సొరకాయను శుభ్రంగా కడిగి, తొక్క చెక్కాలి. దానిని రెండుగా కోసి, లోపల ఉన్న గింజలు, మెత్తటి గుజ్జును ఒక స్పూన్‌ తో పూర్తిగా తీసివేయాలి.

ఇప్పుడు గట్టిగా ఉన్న భాగాన్ని మాత్రమే సన్నగా తురుముకోవాలి. తురిమిన సొరకాయలో నీటిని పూర్తిగా పిండివేయాలి.

ఇప్పుడు ఒక మందపాటి గిన్నె లేదా పాన్‌ ను స్టవ్ మీద పెట్టి 2 టేబుల్ స్పూన్ల నెయ్యి వేసి వేడి చేయాలి. నెయ్యి కరిగాక నీరు పిండిన సొరకాయ తురుమును వేసి పచ్చి వాసన పోయే వరకు 5-7 నిమిషాల పాటు మీడియం మంట మీద వేయించాలి.

సొరకాయ తురుము వేగాక అందులో పాలు పోసి బాగా కలపాలి. మిశ్రమం దగ్గరపడే వరకు ఉడికించాలి. పాలు ఇంకిపోయి సొరకాయ మెత్తబడ్డాక, తురిమిన ఖోయా లేదా పాల పొడిని వేసి కలపాలి.

ఇప్పుడు పంచదార వేసి కలపాలి. మీడియం మంట మీద అడుగంటకుండా కలుపుతూనే ఉండాలి. ఈ దశలో కావాలనుకుంటే చిటికెడు ఆకుపచ్చ ఫుడ్ కలర్ వేసుకోవచ్చు.

మిశ్రమం పాన్‌ అంచులను వదిలి, ముద్దలా తయారయ్యే వరకు ఉడికించాలి. ఈ దశకు రావడానికి సుమారు 10-15 నిమిషాలు పట్టవచ్చు. ఇప్పుడు మిగిలిన నెయ్యి, యాలకుల పొడి, సగం డ్రై ఫ్రూట్స్ పలుకులు వేసి బాగా కలపాలి. మిశ్రమం సరైన దశకు వచ్చిందో లేదో తెలుసుకోవడానికి, కొద్దిగా చల్లార్చి చేతితో ఉండ చుడితే అది అంటుకోకుండా వస్తుంది.

ఒక ప్లేట్ లేదా ట్రేకు నెయ్యి రాసి సిద్ధంగా ఉంచుకోవాలి. స్టవ్ ఆఫ్ చేసి సిద్ధమైన బర్ఫీ మిశ్రమాన్ని ఆ ప్లేట్‌ లోకి మార్చి, ఒక స్పూన్‌ తో సమానంగా పరచాలి. పైన మిగిలిన డ్రై ఫ్రూట్స్ పలుకులతో అలంకరించాలి.

బర్ఫీని పూర్తిగా చల్లారనివ్వాలి. కనీసం 1-2 గంటలు పడుతుంది. పూర్తిగా చల్లారిన తర్వాత మీకు నచ్చిన ఆకారంలో ముక్కలుగా కోసుకోవాలి. అంతే ఎంతో రుచికరమైన, ఆరోగ్యకరమైన సొరకాయ బర్ఫీ రెడీ.