నోరూరించే దహీ పూరీ..ఇంట్లోనే ఇలా చేస్తే లొట్టలేయాల్సిందే!

సాయంత్రం కాగానే ఏదో ఒక స్నాక్ తినాలనిపించడం సహజం. అందులోనూ చాట్ అంటే లొట్టలేయని వారు ఎవరుంటారు? పానీ పూరి, సేవ్ పూరి పేర్లు వినగానే మనకు తెలియకుండానే నోట్లో నీళ్లు ఊరుతాయి. అయితే ఎప్పుడూ తినే పానీ పూరీకి కాస్త భిన్నంగా, కమ్మని రుచిని ఇచ్చే దహీ పూరీని మీరు ఎప్పుడైనా ఇంట్లో ప్రయత్నించారా?

బయట బండ్ల మీద దొరికే వాటి కంటే ఇంట్లో తాజా పెరుగుతో చేసుకుంటే ఆ రుచే వేరు. పైగా ఇది ఆరోగ్యానికి కూడా చాలా మంచిది. కడుపులో మంటగా ఉన్నప్పుడు పెరుగుతో చేసే ఈ చాట్ ఎంతో హాయినిస్తుంది. తీపి, పులుపు, కారం కలగలిసిన ఈ అద్భుతమైన దహీ పూరీని పర్ఫెక్ట్ గా ఎలా తయారు చేసుకోవాలో ఇక్కడ చూడండి.

కావలసిన పదార్థాలు
గొల్గప్ప పూరీలు-15
గట్టి పెరుగు- కప్పు
బంగాళాదుంపలు-2
సన్నగా తరిగిన ఉల్లిపాయ-1
జీలకర్ర పొడి
చాట్ మసాలా
కారం
ఉప్పు
స్వీట్ చింతపండు చట్నీ
గ్రీన్ చట్నీ
సన్న కారప్పూస
కొత్తిమీర తురుము

తయారీ విధానం

-ముందుగా బంగాళాదుంపలను మెత్తగా ఉడికించి, పొట్టు తీసి చిన్న ముక్కలుగా చేసుకోవాలి. అలాగే ఉల్లిపాయలను చాలా సన్నగా తరిగి పెట్టుకోవాలి. పెరుగును గడ్డలు లేకుండా బాగా గిలక్కొట్టాలి.

-తర్వాత కొత్తిమీర, పుదీనా, పచ్చిమిర్చి, చిన్న అల్లం ముక్క, ఉప్పు, నిమ్మరసం కలిపి మిక్సీలో మెత్తగా రుబ్బుకోవాలి.

-ఇప్పుడు వేడి నీటిలో నానబెట్టిన చింతపండు గుజ్జులో బెల్లం, కారం, జీలకర్ర పొడి, ఉప్పు వేసి చిక్కబడే వరకు మరిగించాలి. ఇది చల్లారిన తర్వాత తేనెలా చిక్కబడుతుంది.

-ఒక వెడల్పాటి ప్లేట్ తీసుకుని గొల్గప్ప పూరీలను అందంగా అమర్చండి. ప్రతి పూరీ మధ్యలో బొటనవేలితో చిన్న రంధ్రం చేయండి.

-రంధ్రం చేసిన ప్రతి పూరీలో ఉడికించిన బంగాళాదుంప ముక్కలు, ఉల్లిపాయ ముక్కలు కూరండి. దీనిపై చిటికెడు ఉప్పు చల్లండి.

-ఇప్పుడు ప్రతి పూరీలో కొద్దిగా గ్రీన్ చట్నీ, మరికొద్దిగా తీపి చింతపండు చట్నీ వేయండి. ఆ వెంటనే గిలక్కొట్టిన కమ్మని పెరుగును పూరీల నిండా ఉప్పొంగేలా వేయండి. పెరుగు ఎంత ఎక్కువగా ఉంటే అంత రుచి.

-పెరుగు పైన వేయించిన జీలకర్ర పొడి, చాట్ మసాలా, కొద్దిగా కారం చల్లండి. చివరగా సన్న కారప్పూస, కొత్తిమీరతో అలంకరించండి. అంతే చూడగానే తినాలనిపించే దహీ పూరీ రెడీ.