వేడి వేడి దోశలు,ఇడ్లీలోకి ఈ చట్నీ పడితే..ప్లేట్ ఖాళీ అవ్వాల్సిందే!

టిఫిన్ ఎంత బాగున్నా, దాని రుచిని రెట్టింపు చేసేది పక్కన వడ్డించే చట్నీమాత్రమే. సాధారణంగా మన ఇళ్లలో ఇడ్లీ, దోశల కోసం కొబ్బరి చట్నీయో లేదా టమాటా చట్నీయో రెగ్యులర్ గా చేస్తుంటాం. కానీ ఎప్పుడూ ఒకే రకం చట్నీ తిని బోర్ కొట్టిందా? అయితే టమాటా కొబ్బరి చట్నీ ఓసారి ట్రై చేయాల్సిందే.

సాధారణంగా టమాటా చట్నీలో ఉల్లిపాయలు, వెల్లుల్లి వేసి చేస్తాం. అలాగే కొబ్బరి చట్నీలో పచ్చిమిర్చి వేస్తాం. కానీ ఈ రెండింటినీ కలిపి చేస్తే..టమాటాలోని పులుపు, కొబ్బరిలోని కమ్మదనం, చిన్న ఉల్లిపాయల ఘాటు అన్నీ కలిసి ఈ చట్నీ రుచిని అద్భుతంగా మారుస్తాయి. ఈ నోరూరించే చట్నీ ఎలా తయారుచేసుకోవాలో ఇక్కడ చూడండి.

కావలసిన పదార్థాలు

కొబ్బరి నూనె: 3 టీస్పూన్లు
సాంబార్ ఉల్లిపాయలు 10
ఎండు మిరపకాయలు: 4
అల్లం: 1 అంగుళం ముక్క
టమోటాలు: 3
తురిమిన పచ్చి కొబ్బరి: అర కప్పు
ఉప్పు: రుచికి సరిపడా
ఆవాలు: అర టీస్పూన్
మినపప్పు: అర టీస్పూన్
కరివేపాకు: ఒక రెమ్మ

తయారీ విధానం

-ముందుగా స్టవ్ వెలిగించి ఒక బాండీని పెట్టుకోండి. అందులో 2 టీస్పూన్ల కొబ్బరి నూనె వేసి వేడి చేయండి.

-నూనె కాగాక అందులో పొట్టు తీసిన చిన్న ఉల్లిపాయలను వేసి దోరగా వేయించాలి. ఉల్లిపాయలు లేత బంగారు రంగులోకి మారుతున్నప్పుడు, అందులో ఎండు మిరపకాయలు, అల్లం ముక్కలు వేసి మంచి సువాసన వచ్చేవరకు వేయించాలి.

-ఇప్పుడు తరిగిన టమోటా ముక్కలను పాన్ లో వేయండి. టమోటాలు త్వరగా మగ్గడానికి ఇప్పుడే సరిపడా ఉప్పును కూడా జత చేయండి. మధ్యమధ్యలో కలుపుతూ, టమోటాలు పూర్తిగా మెత్తబడి, గుజ్జులా అయ్యేవరకు వేయించాలి.

-టమోటాలు బాగా ఉడికిన తర్వాత తురిమిన కొబ్బరిని వేసి బాగా కలపండి. కొబ్బరిని ఎక్కువ సేపు వేయించాల్సిన అవసరం లేదు, కేవలం కలిపితే చాలు. వెంటనే స్టవ్ ఆఫ్ చేసి, ఈ మిశ్రమాన్ని కాసేపు చల్లారనివ్వండి.

-చల్లారిన మిశ్రమాన్ని మిక్సీ జార్ లోకి తీసుకోండి. అవసరమైతే కొద్దిగా నీరు పోసి మరీ మెత్తగా కాకుండా, కొంచెం బరకగా ఉండేలా రుబ్బుకోండి. దీన్ని ఒక గిన్నెలోకి తీసుకోండి.

-చట్నీకి అసలైన రుచిని తెచ్చేది తాలింపే. చిన్న కడాయిలో ఒక టేబుల్ స్పూన్ కొబ్బరి నూనె వేడి చేయండి. నూనె వేడయ్యాక ఆవాలు వేసి చిటపటలాడనివ్వండి. తర్వాత మినపప్పు వేసి బంగారు రంగు వచ్చేవరకు వేయించి, చివరగా కరివేపాకు వేసి స్టవ్ ఆఫ్ చేయండి.

ఈ వేడి వేడి పోపును మనం సిద్ధం చేసుకున్న చట్నీపై పోసి బాగా కలపండి. అంతే ఘుమఘుమలాడే టమాటా కొబ్బరి చట్నీ రెడీ. వేడి వేడి ఇడ్లీలలోకి లేదా దోశలలోకి ఈ చట్నీని నంచుకుని తింటుంటే.. ఆ రుచికి ఫిదా అవ్వాల్సిందే.