బండి మీద దొరికే క్రిస్పీ సమోసా..ఇక ఇంట్లోనే చాలా ఈజీగా!

మన భారతదేశంలో సమోసా అంటే కేవలం ఒక చిరుతిండి మాత్రమే కాదు, అదొక మధురానుభూతి. పల్లెటూరు నుండి పట్నం వరకు ఏ వీధిలో చూసినా మనకు సమోసాల బండి కనిపిస్తుంది. అతి తక్కువ ధరలో కడుపు నింపే అద్భుతమైన స్నాక్ ఇది. చిన్న చిన్న వేడుకల నుండి పెద్ద పెద్ద పార్టీల వరకు సమోసా ఉండాల్సిందే.

అయితే, బయట బండి మీద దొరికే ఆ కరకరలాడే రుచికరమైన సమోసాలను ఇంట్లో తయారుచేయడం చాలా కష్టం అని చాలామంది అనుకుంటారు. కానీ అది కేవలం అపోహ మాత్రమే. సరైన చిట్కాలు పాటిస్తే, బయట దొరికే వాటికంటే అద్భుతమైన, ఆరోగ్యకరమైన సమోసాలను మన వంటగదిలోనే సులభంగా తయారుచేసుకోవచ్చు.

క్రిస్పీ సమోసా తయారీకి కావాల్సిన పదార్థాలు

-మైదా పిండి
-ఉప్పు
-వాము
-నూనె
-బంగాళదుంపలు
-జీలకర్ర
-అల్లం
-పచ్చిమిర్చి
-కారం
-ధనియాల పొడి
-గరం మసాలా
-ఆమ్చూర్ పొడి
-కొత్తిమీర

క్రిస్పీ సమోసా తయారీ విధానం

-సమోసా పైన ఉండే పొర కరకరలాడుతూ రావాలంటే పిండి కలుపుకోవడంలోనే అసలు రహస్యం దాగి ఉంది. ఒక వెడల్పాటి గిన్నెలో సరిపడా మైదా తీసుకుని, అందులో కొద్దిగా ఉప్పు, చేతితో నలిపిన వాము వేయండి.

-ఇప్పుడు అందులో 2 లేదా 3 టేబుల్ స్పూన్ల వేడి నూనె వేసి పిండికి బాగా పట్టించండి. ఆ తర్వాత కొద్దికొద్దిగా నీళ్లు పోస్తూ గట్టిగా కలపండి. పిండి మరీ మెత్తగా ఉంటే సమోసాలు కరకరలాడవు. ఇలా గట్టిగా కలుపుకున్న పిండిపై మూత లేదా తడిగుడ్డ కప్పి, 15-20 నిమిషాల పాటు పక్కన ఉంచండి.

-ఇప్పుడు సమోసాకు ప్రాణమైన లోపలి మసాలాను రెడీ చేసుకోవాలి. ఇందుకోసం ముందుగా ఉడికించిన బంగాళదుంపలను మరీ మెత్తగా కాకుండా, కొద్దిగా ముక్కలు తగిలేలా చిదుముకోండి.

-ఇప్పుడు స్టవ్ మీద బాండీ పెట్టి, కొద్దిగా నూనె వేడిచేసి జీలకర్ర, సన్నగా తరిగిన అల్లం, పచ్చిమిర్చి ముక్కలు వేసి దోరగా వేయించండి. ఆ సువాసన వస్తున్నప్పుడు, చిదిమిపెట్టుకున్న ఆలుగడ్డలు వేయండి. దానికి సరిపడా ఉప్పు, కారం, ధనియాల పొడి, కొద్దిగా ఆమ్చూర్ పొడి, గరం మసాలా వేసి బాగా కలపండి. చివరగా సన్నగా తరిగిన కొత్తిమీర చల్లితే, ఘుమఘుమలాడే స్టఫింగ్ రెడీ. దీనిని పూర్తిగా చల్లారనివ్వండి.

-నానబెట్టుకున్న పిండిని తీసుకుని చిన్న చిన్న ఉండలుగా చేసి, చపాతీలా ఒత్తి, మధ్యలోకి సగానికి కోయండి. ఇప్పుడు సగం భాగాన్ని తీసుకుని కోన్ ఆకారంలో మడవండి. మడిచేటప్పుడు అంచులు విడిపోకుండా కొద్దిగా నీళ్లు రాసి అతికించండి. ఈ కోన్‌ లో ఆలు మసాలాను నింపి, పైన కూడా నీటితో తడిపి పూర్తిగా గట్టిగా మూసివేయండి.

-ఇప్పుడు బాండీలో నూనె వేడి చేసి, మంటను మీడియంలో ఉంచండి. సమోసాలను నెమ్మదిగా నూనెలో వదలండి. పెద్ద మంట మీద వేయించితే పైన రంగు వస్తుంది కానీ లోపల ఉడకదు. కాబట్టి సన్నని మంటపై ఓపికగా, బంగారు గోధుమ రంగులోకి వచ్చే వరకు వేయించి తీయండి. అంతే క్రిస్పీ సమోసా రెడీ

- సమోసాలను పుల్లపుల్లని చింతపండు చట్నీ లేదా కమ్మని పుదీనా చట్నీతో తింటే ఆహా అనాల్సిందే.