ఉగాది స్పెషల్..నోరూరించే పచ్చి మామిడికాయ పులిహోర,ఎలా చేయాలంటే

పచ్చి మామిడికాయ పులిహోర దక్షిణ భారతదేశంలో ముఖ్యంగా ఆంధ్రప్రదేశ్, తెలంగాణ రాష్ట్రాలలో చాలా ఇష్టంగా తినే ఒక రుచికరమైన, ఆరోగ్యకరమైన వంటకం. వేసవి కాలంలో పచ్చి మామిడికాయలు విరివిగా దొరికే సమయంలో దీనిని ఎక్కువగా తయారుచేస్తారు. దీని పుల్లని, తీపి, కారపు రుచులు అందరినీ ఆకట్టుకుంటాయి. ఉగాది సందర్భంగా మీ ఇంట్లో పచ్చిమామిడికాయతో పులిహోర తయారుచేయాలనుకుంటే కావలసిన పదార్థాలు,తయారీ విధానం ఇక్కడ చూడండి.

పచ్చి మామిడికాయ పులిహోర తయారీకి కావలసిన పదార్థాలు

-బియ్యం
-పచ్చి మామిడికాయ
-నూనె
-ఆవాలు
-జీలకర్ర
-శనగపప్పు
-మినపప్పు
-వేరుశనగలు
-పచ్చిమిర్చి
-ఎండుమిర్చి
-కరివేపాకు
-పసుపు
-ఉప్పు
-కొత్తిమీర

పచ్చి మామిడికాయ పులిహోర తయారీ విధానం

-ముందుగా 1 కప్పు బియ్యన్ని శుభ్రంగా కడిగి తగినంత నీరు పోసి అన్నంలా ఉడికించాలి. అన్నం మెత్తగా కాకుండా పొడిపొడిగా ఉండేలా చూసుకోవాలి. ఉడికిన అన్నాన్ని ఒక పెద్ద ప్లేటులో చల్లారనివ్వాలి.

-ఇప్పుడు పచ్చి మామిడికాయను కడిగి, తొక్క తీసివేసి తురుముకోవాలి. మీరు కోరుకుంటే చిన్న ముక్కలుగా కూడా కట్ చేసుకోవచ్చు.

-స్టవ్ మీద ఒక కడాయి పెట్టి అందులో 3 టేబుల్ స్పూన్ల ఆయిల్ వేడి చెయ్యాలి.

-ఆయిల్ వేడెక్కిన తర్వాత అందులో 2 టేబుల్ స్పూన్ల పల్లీలు, 1 టేబుల్ స్పూన్ పచ్చి శెనగపప్పు, 1 టేబుల్ స్పూన్ మినపప్పు, 1 టేబుల్ స్పూన్ ఆవాలు, అర టేబుల్ స్పూన్ జీలకర్ర వేసి మీడియం మంట మీద రెండు నిమిషాలు వేయించాలి.

-తర్వాత అందులో 5 పచ్చిమిర్చి చీలికలు, 4 ఎండుమిర్చి ముక్కలు వేసి,రుచికి సరిపడా ఉప్పు, కొద్దిగా కరివేపాకు,పావు టేబుల్ స్పూన్ ఇంగువ, అర టేబుల్ స్పూన్ పసుపు వేసి కలపండి

-తర్వాత అందులో 1 మీడియం సైజు పచ్చిమామిడి కాయ తురుము వేసి తక్కువ మంట మీద రెండు నిమిషాలు వేయించి స్టవ్ ఆఫ్ చెయ్యండి.

-తర్వాత ఆ మిశ్రమంలో పావు కేజీ ఉడికించిన అన్నం వేసి మొత్తం బాగా కలిసేలా కలపండి. ఇందులోనే కొంచెం కొత్తిమీర చల్లుకోండి. అంతే మామిడికాయ పులిహోర రెడీ.

ఉగాది స్పెషల్ అప్పాల పాయసం..ఇలాంటి టేస్ట్ ఇంతకుముందు తిని ఉండరు,ఎలా చేయాలంటే

ప్రయోజనాలు

పచ్చి మామిడికాయ పులిహోర రుచికరమైనది మాత్రమే కాదు, అనేక ఆరోగ్య ప్రయోజనాలను కూడా కలిగి ఉంది.రోగనిరోధక శక్తిని పెంచడం నుండి జీర్ణక్రియను మెరుగుపరచడం వరకు ఈ వంటకం మీ ఆరోగ్యానికి ఎంతో మేలు చేస్తుంది. పచ్చి మామిడికాయ విటమిన్ సి యొక్క అద్భుతమైన మూలం. విటమిన్ సి రోగనిరోధక శక్తిని పెంచడానికి, చర్మాన్ని ఆరోగ్యంగా ఉంచడానికి, శరీరంలో ఐరన్ శోషణను మెరుగుపరచడానికి సహాయపడుతుంది. ఇది శక్తివంతమైన యాంటీఆక్సిడెంట్‌గా కూడా పనిచేస్తుంది, కణాలను నష్టం నుండి రక్షిస్తుంది. పచ్చి మామిడికాయలో ఉండే ఎంజైమ్‌లు ఆహారాన్ని బాగా జీర్ణం చేయడంలో సహాయపడతాయి. ఇది మలబద్ధకం, అజీర్ణం, గ్యాస్ వంటి జీర్ణ సంబంధిత సమస్యలను తగ్గించడంలో ఉపయోగపడుతుంది.