వండేటప్పుడు పప్పులో నీళ్లు ఎక్కువయ్యాయా?ఈ 5 చిట్కాలతో నిమిషాల్లో చిక్కగా చేయండి!

ఉరుకులు పరుగుల జీవితంలో హడావుడిగా వంట చేసేటప్పుడు మనం తరచుగా చేసే చిన్న తప్పు.. పప్పు త్వరగా ఉడకాలని లేదా అంచనా సరిగా తెలియక అవసరమైన దానికంటే ఎక్కువ నీళ్లు పోయడం. తీరా కుక్కర్ మూత తీసి చూశాక పప్పు నీళ్లలా తయారవుతుంది. పల్చటి పప్పు చూడటానికి చప్పగా ఉండటమే కాకుండా, రుచిని కూడా పూర్తిగా చెడగొడుతుంది. ఇలాంటప్పుడు ఆ పప్పును పారబోయలేక, అలాగని తినలేక ఇబ్బంది పడుతుంటాం. కానీ మీ వంటగదిలో ఉండే కొన్ని సాధారణ పదార్థాలతోనే, నీళ్లలా మారిన పప్పును క్షణాల్లో చిక్కగా, క్రీమీగా, ఎంతో రుచికరంగా మార్చుకోవచ్చు. పల్చటి పప్పుకు రెస్టారెంట్ స్టైల్ చిక్కదనాన్ని ఇచ్చే ఆ అద్భుతమైన ఇంటి చిట్కాలు ఏంటో ఇక్కడ చూడండి.

వేయించిన శనగపిండి

పప్పు నీళ్లలా మారినప్పుడు దాన్ని వెంటనే చిక్కబరచడానికి శనగపిండి ఒక బ్రహ్మాస్త్రంలా పనిచేస్తుంది. ఒక చిన్న గిన్నెలో ఒక టీస్పూన్ వేయించిన శనగపిండి లేదా సత్తు పొడిని తీసుకోండి. పచ్చి పిండి కంటే కాస్త వేయించిన పిండిని వాడటం వల్ల పప్పుకు కమ్మటి సువాసన వస్తుంది. ఇప్పుడు ఆ పిండిలో కొద్దిగా చల్లటి నీళ్లు పోసి ఎక్కడా ఉండలు కట్టకుండా జారుగా (పేస్ట్ లాగా) కలుపుకోవాలి. ఈ మిశ్రమాన్ని స్టవ్ మీద మరుగుతున్న పప్పులో నెమ్మదిగా పోస్తూ కలపాలి. ఇలా చేయడం వల్ల పప్పు నిమిషాల్లో చిక్కబడి, రుచి రెట్టింపు అవుతుంది.

ఉడికించిన బంగాళాదుంపతో అద్భుతం
ఉడికించిన బంగాళాదుంప ఉంటే, అందులో ఒకదాన్ని తీసుకుని మెత్తగా మాష్ చేయండి. ఆ మెత్తటి బంగాళాదుంప మిశ్రమాన్ని పల్చగా ఉన్న పప్పులో వేసి బాగా కలపండి. ఇది పప్పులో పూర్తిగా కలిసిపోయి, దానికి క్రీమీ టెక్స్చర్‌ ను ఇస్తుంది. దీనివల్ల పప్పు చిక్కబడటమే కాకుండా, దాని రుచి మరింత పెరిగి పిల్లలు కూడా ఎంతో ఇష్టంగా తింటారు.

పప్పుగుత్తితో మెదపడం
పప్పు సరిగ్గా ఉడకకపోయినా లేదా నీళ్లు ఎక్కువైనా మనం పాటించాల్సిన అత్యంత పురాతనమైన చిట్కా ఇది. మీ వంటగదిలో ఉండే పప్పుగుత్తి లేదా ఒక పెద్ద గరిట తీసుకుని, గిన్నె అంచులకు పప్పును రాస్తూ కాస్త గట్టిగా మెదపాలి. ఇలా చేయడం వల్ల పప్పు గింజలు మెత్తబడి, వాటిలోని సహజమైన పిండిపదార్థం బయటకు వస్తుంది. ఈ స్టార్చ్ పప్పులోని నీటితో కలిసిపోయి, పప్పుకు చక్కటి చిక్కదనాన్ని ఇస్తుంది.

రెస్టారెంట్ స్టైల్ కోసం
సాధారణంగా హోటల్స్, రెస్టారెంట్లలో గ్రేవీలు చిక్కగా ఉండటానికి కార్న్‌స్టార్చ్ (మొక్కజొన్న పిండి) వాడుతుంటారు. ఒక టీస్పూన్ కార్న్‌ స్టార్చ్‌ ను చల్లటి నీటిలో వేసి బాగా కరిగించాలి. (వేడి నీళ్లలో వేస్తే ఉండలు కడుతుంది). ఈ కార్న్‌ స్టార్చ్ నీళ్లను మరుగుతున్న పప్పులో వేసి ఒక రెండు నిమిషాలు ఉడికించండి. తక్షణమే మీ పప్పుకు నిగనిగలాడే క్రీమీ టెక్స్చర్, చిక్కదనం వచ్చేస్తాయి.

తక్కువ మంట మీద ఉడికించడం
పైన చెప్పిన పదార్థాలు ఏవీ అందుబాటులో లేనప్పుడు మీరు చేయగల సులభమైన పని ఇది. కుక్కర్ మూత తీసేసి, స్టవ్ మంటను సిమ్‌ లో ఉంచండి. పప్పును అలాగే ఓ 5 నుండి 10 నిమిషాల పాటు నెమ్మదిగా ఉడకనివ్వండి. ఇలా చేయడం వల్ల పప్పులోని అదనపు నీరంతా ఆవిరైపోతుంది.