వాలెంటైన్ వరాలు - వంటికి పట్టే వ్యాధులు!

Relationship

oi-Nageswara

By B N Sharma

Published: Tuesday, February 14, 2012, 16:12 [IST]

ఫిబ్రవరి 14....కనీవినీ ఎరగని దాహార్తి. ప్రేమ పక్షులు ముద్దులంటే పడి చచ్చే రోజు అదే వేలంటైన్ రోజు. ప్రేమించాననటానికి నిదర్శనం.... ఘాటైన ఎంగిలి ముద్దు. ముచ్చటగా ఇచ్చేయటమే! నోటి లాలాజలం అటునుండి ఇటుకి, ఇటునుండి అటుకి ప్రవహించటమే!అయితే వీటిలో అసలు సిసలైన ప్రేమ ఘాటు ఎంతవరకు? ప్రశ్నించదగినదే? ఘాటు మాట దేవుడెరుగు....ఆ ముద్దు విషమిస్తే ఇక అంతే సంగతులు. మంచమెక్కాల్సిందే మరి. అసలే ప్రస్తుతం ఎక్కడ చూసినా దగ్గులు, జలుబు, ఫ్లూ, హెచ్1ఎన్1 ఫ్లూ లాంటి అంటు వ్యాధులు ఎన్నో వ్యాపించేస్తున్నాయి. ఇక ఈ ముద్దులతో అవి మరింత ఊపందుకుంటాయి.

ముద్దు సాధారాణ జలుబులనే కాదట ప్రోత్సహించేది మరో రకమైన మోనో న్యూక్లెసిస్ అనే వ్యాధిని కూడా ప్రోత్సహిస్తుందంటున్నారు వైద్య నిపుణులు. నోటిలోని లాలా జలం నుండి ఎప్ స్టీన్ బార్ అనే వైరస్ తగిలితే చాలు వేగంగా విస్తరిస్తుందట. దగ్గరగా వుండి దగ్గినా, తుమ్మినా దీని బారిన అవతలివారు పడినట్లే. హెర్పెస్ కూడా వచ్చేస్తుందంటారు. గొంతు మంట, చిగుళ్ళ వ్యాధులు వంటివి కూడా సాధారణంగా అంటుకునేవే.

మారుతున్న వాతావరణం బాక్టీరియాకి చాలా అనుకూలం. వేగంగా ఒకరినుండి మరి ఒకరికి వ్యాపిస్తుంది. అసలే ఇది ఫిబ్రవరి అందునా వేలంటైన రోజు షాపింగ్ మాల్స్ నుండి నైట్ క్లబ్ లవరకు ప్రేమికులే. ఎక్కడ కొద్దిపాటి ఏకాంతం దొరికినా ముద్దులు, ముచ్చట్లు, మురిపాలు, కౌగిళ్ళు. ఇక బాక్టీరియా వ్యాప్తికి ఇంతకంటే మరేం కావాలి. తస్మాత్ జాగ్రత్త అంటున్నారు వైద్య నిపుణులు.

ఇంత తెలుసుకున్నప్పటికి మీ డార్లింగ్ దగ్గరకు వేలంటైన్ అంటూ పరుగెట్టాలనుకుంటున్నారా? పరవాలేదు....పరిష్కారంగా,అతనికి లేదా ఆమెకి పై వాటిలో ఏ రకం లక్షణాలున్నప్పటికి మీ ప్రేమికుల రోజుకు సున్నా చుట్టటం శ్రేయస్కరం. లేదంటే ప్రత్యామ్నాయంగా ముద్దు రహిత వేలంటైన్ రోజు ఆచరించేయండి. ప్రేమికులరోజు గుర్తుగా కిస్సింగ్, టచ్చింగ్, లైంగిక సంబంధాలు వంటివి వదిలేసి మీ ప్రియుడు లేదా ప్రియురాలు దగ్గేటపుడు లేదా తుమ్మేటపుడు నోరు మూసుకోమనండి చేతిలో వున్న కర్చీఫ్ అడ్డుపెట్టుకొని మాట్లాడమనండి. వేడి నీటిని ఆహ్లాదంగా సిప్ చేస్తూ ఒక పేరాసిటమాల్ మింగేలా చూడండి. మరింత ఆనందించాలంటే, వ్యాధినిరోధకతను పెంచే తాజా పండ్లు, అరటిపండు, ఆపిల్, బొప్పాయి వంటివి కలసితింటూ కూర్చోండి.