మత్తు కలిగించేది శరీర సహజ వాసన మాత్రమే!

By B N Sharma

Published: Thursday, May 17, 2012, 14:13 [IST]

రీసెర్చర్లు మనం ఉపయోగించే సెంట్లు మన వ్యక్తిత్వాన్ని ప్రదర్శిస్తాయని తెలుపుతున్నారు. ఈ వాసనల బట్టి ఆకర్షణ అనే సిద్ధాంతానికి మూలంగా చరిత్రలోఇంగ్లాండ్ దేశంలో ఎలిజబెత్ రాణి కాలంలో ఆపిల్ పండు ముక్కను ఆమె చంకలో పెట్టి అది వాసన గ్రహించిన తర్వాత దానిని సరైన వారికి బహుమతిగా ఇచ్చేవారటసాంప్రదాయక బాల్కన్ డ్యాన్సులలో కూడా పురుషులు తమ చంకలకింద హేండ్ కర్ఛీఫ్ లు వుంచుకొని డ్యాన్సులు చేసి చెమటపట్టిన వాటిని మహిళల ముక్కులకు చూపించి వారి ఇష్టాలను తెలుసుకునేవారట.

ఒక వైపు సువాసన ద్రవ్యాల కంపెనీలు వివిధ రకాల సెంట్ల తయారీతో కోట్లాది రూపాయలు వ్యయం చేస్తుంటే, మరోవైపు రీసెర్చర్లు, అన్ని సువాసనలకంటే కూడా సహజమైన శరీర వాసన ఎవరినైనా ఆకర్షించాలంటే అత్యుత్తమమైన మత్తెక్కించే సువాసన అంటూ తమ పరిశోధనా ఫలితాలు వెల్లడించారు. మహిళలు, తమ అండం విడుదల అయ్యే సమయంలో అధికంగా ధైర్య సాహసాలుకల పురుషుడి శరీర వాసన అంటే బాగా ఆకర్షింపబడతారట. ఈ పరిశోధన ఇంగ్లాండ్ దేశంలోని స్టిర్లింగ్ యూనివర్శిటీ లోని క్రెయిగ్ రాబర్ట్స్ మరియు జెక్ రిపబ్లిక్ లోని ప్రాగ్ నగరంలోని ఛార్లెస్ యూనివర్శిటీ కి చెందిన జాన్ హావలిక్ లు కలిసి చేశారు.

పురుషులకు మహిళలు అండోత్సర్గ సమయంలో అధిక ఆకర్షణతోను, పిరీయడ్ సమయంలో తక్కువ ఆకర్షణతోను కూడా కనపడతారని రీసెర్చర్లు తెలిపినట్లు డెయిలీ మెయిల్ పేర్కొంది. వాసనలలో వచ్చే మార్పులు ఎప్పటికపుడు మారిపోతూ వుంటాయని హావ్ లిక్ తెలిపారు. అయితే, శరీర వాసన పైన ఆధారపడటం సరికాదని ప్రతివారిని ఆకర్షించే అవకాశం వుండదని వారు అభిప్రాయపడ్డారు.

పరిశోధనలో వీరు ముందుగా శరీర వాసనలు చూపటం తర్వాతి దశలో సువాసన సెంట్లు వాడి వాసనలు చూపటం చేశారు. కొన్ని రకాల వాసనలు కొంతమందికి ఎంతో బాగుండగా మరి కొందరికి అవి చాలా చెడుగా వున్నట్లు కనుగొన్నారు. కనుక శరీరాలు అందరికి అన్నీ సరిపడవని పేర్కొన్నారు.