లైఫ్‌ పార్ట్‌నర్‌పై ఫిర్యాదులు ఆపండి, చిన్న చిన్న చిట్కాలతో ఇలా సాన్నిహిత్యం పెంచుకోండి

1. బి ప్రొడక్టివ్

తప్పులు గుర్తించడం, సమస్యలను వేలెత్తి చూపడం వల్ల అవి తొలగిపోవు. తప్పు జరిగితే మరోసారి ఆ తప్పు జరగకుండా ఎలా చూడాలి, సమస్య ఉంటే దాని పరిష్కారం ఏంటి అనేది ఆలోచించాలి.

సమస్య అనేది లేనప్పుడు ఇంకా హైరానా పడాల్సిన అవసరం లేదు. తప్పు జరగనప్పుడు చింతించాల్సిన పని లేదు.

2. సలహా అడగాలి

ఎప్పుడూ ఫిర్యాదు చేయడం, సలహా అడగడం రెండింటికి మధ్య చాలా తేడా ఉంది. దేని గురించైనా ఫిర్యాదు చేయాలనుకున్నప్పుడు మీ కోపాన్ని పక్కన పెట్టాలి. ఏం జరిగింది, ఎలా జరిగిందో సావధానంగా తెలుసుకోవాలి. ఒకవేళ తప్పు జరిగితే అది మరొకసారి రిపీట్ కాకుండా ఏం చేయాలో ఆలోచించాలి.

మీకు తెలియకపోతే మీ భాగస్వామిని సలహా అడగాలి. సమస్య ఉంటే దాని పరిష్కారాన్ని కనుక్కునేందుకు సాయం అడగాలి.

3. వినడం నేర్చుకోండి

ఏ సంబంధంలో అయినా కమ్యూనికేషన్ చాలా ముఖ్యం. మీ భావాలను, భావోద్వేగాలను, ప్రేమను, కోపాన్ని సరిగ్గా తెలపగలగాలి. మీరు మనసులో ఏమనుకుంటున్నారో క్లుప్తంగా, స్పష్టంగా చెప్పడం ఓ కళ. ఆ కళను మెల్లిగా అయినా నేర్చుకోవాల్సిందే.

ఎదుటి వారు చెప్పేది శ్రద్ధగా వినాలి. అవతలి వారి వర్షన్ ఏమిటో తెలుసుకోవాలంటే వినాల్సిందే.

4. ధ్యానం చేయండి

కొన్నిసార్లు మీరు చూసిన మరియు విన్న వాటి ఆధారంగా ఆలోచించడానికి సమయం, ప్రశాంతమైన మనసు కావాలి. అందుకోసం రోజూ ధ్యానం సాధన చేయండి. ఒత్తిడి లేదా కోపం ఉన్నప్పుడు ధ్యానం చాలా సహాయపడుతుంది.

కోపంగా ఆవేశంగా ఉన్నప్పుడు ఎంత తక్కువగా మాట్లాడితే అంత మంచిదని గ్రహించండి. కోపంలో అనే మాటల వల్ల బంధం బీటలు వారుతుంది. కోపాన్ని నియంత్రించుకోవడానికి ధ్యానం చక్కగా పని చేస్తుంది.

5. క్షమించండి, క్షమాపణ అడగండి

ఎదుటి వ్యక్తి క్షమాపణ కోరినప్పుడు మీరు క్షమించగలగాలి. మీ తప్పు కానప్పుడు కూడా మీరు క్షమించమని అడగగలగాలి. మీరు మీ అహంకారం లేదా అహం కంటే సంబంధానికి ఎక్కువ విలువ ఇస్తున్నారని అర్థం. ఫిర్యాదు చేయడం మానేయమని ఎవరికైనా చెప్పడానికి ఇది కూడా సమర్థవంతమైన మార్గం.