సంబంధం విసుగు పుడుతోందా? తిరిగి ఉత్సాహం రావాలంటే ఇలా చేయండి

1. భాగస్వామి సంతోషాన్ని పరిగణించాలి

దాంపత్యంలో ఇద్దరి సంతోషం, ఇష్టాలు, కష్టాలు అన్నింటిని అంగీకరించే దృక్పథాన్ని అలవర్చుకోవాలి. చాలా జంటల మధ్య ఇష్టం-కష్టం తోనే గొడవలు మొదలవుతాయి. పెళ్లి అయ్యేంత వరకు నా ఇష్టాలు, నా కోరికలు అనుకునే గడిపి ఉంటారు. పెళ్లయ్యాక మా ఇష్టాలు, మా కోరికలు అంటూ ఆలోచించగలగాలి.

మీ ఇష్టాలే కాకుండా మీ భాగస్వామికి ఏం ఇష్టమో తెలుసుకోవాలి. వారికి ఇష్టమైన వస్తువులను సర్‌ప్రైజ్ గిఫ్ట్స్ ఇవ్వండి. వారికి ఇష్టమైన ప్రదేశానికి తీసుకువెళ్లండి, రెస్టారెంట్‌కు తీసుకువెళ్లి వారికి ఇష్టమైనవి ఆర్డర్ చేయండి, ఇలాంటి చిన్న చిన్న పనుల వల్ల దంపతుల మధ్య బంధం బలోపేతం అవుతుంది. సాన్నిహిత్యం పెరుగుతుంది.

2. సంబంధాన్ని ఆరోగ్యంగా ఉంచుకోవాలి

చిన్న చిన్న విషయాలకు చిరాకు పడటం, కోప్పడటం మానుకోవాలి. ఆఫీస్ నుండి సాయంత్రం ఇంటికి రాగానే చిరాకు ముఖంతో, అరుస్తూ వారిని పలకరిస్తే ఉన్న మూడ్ పోతుది. ఉద్యోగంలో, వ్యాపారంలో ఎన్ని కష్టాలు, ఒత్తిడి ఉన్నా ఇంటికి వచ్చాక వాటిని పక్కన పెట్టాలని గుర్తుంచుకోండి.

అప్పుడప్పుడు ఇద్దరూ కలిసి ఏకాంతంగా బయటకు వెళ్లండి. పార్కు, ఈవినింగ్ వాక్, కలిసి జిమ్‌కు వెళ్లడం లాంటి పనుల వల్ల బాండింగ్ పెరుగుతుంది. ఏకాంతంగా మాట్లాడుకునే వీలుంటుంది. ఫ్రెండ్స్, బంధువుల శుభకార్యాలకు కలిసి వెళ్లి, కలిసి రండి.

3. బ్యాచిలర్ ఫ్రెండ్స్ చెప్పినట్లుగా ఏమీ ఉండదు

పెళ్లి చేసుకోగానే ఇక ఫ్రీడం పోయిందని, బ్యాచిలర్ లైఫ్ ఎంజాయ్ చేయలేవని, భర్త చెప్పినట్లుగా భార్య, భార్య చెప్పినట్లుగా భర్త వినాల్సిందేనని చాలా మంది చెబుతుంటారు. కానీ కొత్త బంధం మొదట్లో కొత్త కొత్తగా, కొన్ని విషయాల్లో అడ్జస్ట్ కావాల్సి వస్తుంది. వాటిని నెగటివ్‌గా చూడటం కంటే కొత్త బంధం అన్న తర్వాత ఇలాంటివి ఉంటాయన్న నిజాన్ని అంగీకరించండి.

మీకో జీవిత భాగస్వామి దొరికిందని, మంచి చెడూ, కష్టం సుఖం, ఇష్టాయిష్టాలు అన్నీ పంచుకునేందుకు ఒక భాగస్వామి దొరికారని గుర్తించుకోండి.

4. రాజీ వైఖరితో ఉండండి

ఏ సంబంధం అయినా ప్రేమ, నమ్మకం, విశ్వాసం మీద ఆధారపడి ఉంటుంది. చిన్న చిన్న విషయాలకే ఇద్దరూ గొడవ పడుతూనే ఉంటే అది పెరుగుతూనే ఉంటుంది. పెళ్లంటే పెద్దయ్యాక జరిగే కార్యక్రమం అని అందరికీ తెలుసు కాబట్టి పిల్లల్లా చిన్న చిన్న విషయాలకు పోట్లాడుకునే వైఖరి విడిచిపెట్టండి.

మెచ్యూర్‌గా ఆలోచిస్తే చాలా గొడవలు జరగనే జరగవు. జీవిత భాగస్వామి నిర్ణయాలను గౌరవించాలి. ఏ నిర్ణయం అయినా ఇద్దరూ కలిసి తీసుకోవాలి. ఎంత కంట్రోల్ చేసుకున్నా కొన్ని గొడవలు జరుగుతూనే ఉంటాయి. వాటిని ఇద్దరూ కూర్చుని మాట్లాడుకుని పరిష్కరించుకుంటే సమసిపోతాయి. ఒకరినొకరు అర్థం చేసుకోవడానికి ప్రయత్నించండి.

5. సహాయం తీసుకోండి

గొడవ జరిగింది, పరిష్కరించుకునే వీలు లేదు, చర్చించుకునే పరిస్థితి లేదు అనుకున్నప్పడు ఫ్రెండ్స్, బంధువుల సాయం తీసుకోవడానికి వెనకాడవద్దు. ఆ ప్రయత్నాలు కూడా ఫలించకపోతే రిలేషన్‌షిప్‌ ఎక్స్‌పర్ట్స్ సాయం తీసుకోండి.

అసలు సమస్య ఏమిటో వారికి వివరించండి. ఎక్కడ గొడవ జరుగుతుందో అర్థమయ్యేలా చెప్పండి. వారు మీకు కచ్చితంగా ఓ పరిష్కారం చూపిస్తారు.