మీరు ఐ లవ్ యూ అని చెప్పినప్పుడు..లవ్ యూ టూ అని సమాధానమిస్తే డౌటు పడాల్సిందేనా?

ఐ లవ్ యూ( నేను నిన్ను ప్రేమిస్తున్నాను).. ఈ మూడు పదాలు ఓ అందమైన బంధంలో అత్యంత మధురమైన క్షణాన్ని సృష్టిస్తాయి. మనసులోని భావాలన్నీ రంగరించి, ప్రేమను అక్షరరూపంలో వ్యక్తపరిచే అద్భుతమైన వాక్యమది. భాగస్వామి కళ్లలోకి చూసి, పూర్తి ప్రేమతో ఐ లవ్ యూ మాట చెప్పినప్పుడు, వారి నుంచి కూడా అంతే ప్రేమతో కూడిన సమాధానం ఆశిస్తారు.

అయితే దానికి బదులుగా యాంత్రికంగా, ఎటువంటి భావోద్వేగం లేకుండా ఏదో చెప్పాలి కాబట్టి చెప్పినట్లు లవ్ యూ టూ(love you too) అనే సమాధానం గనుక వస్తే? ఆ క్షణంలో మనసులో ఏదో తెలియని అలజడి మొదలవుతుంది. ఈ స్పందన వారి ప్రేమకు ప్రతిరూపమా లేక కేవలం ఒక అలవాటుగా మారిపోయిన పలకరింపా? నిపుణులు ఏమంటున్నారో ఇక్కడ చూడండి.

ఓ హెచ్చరిక కావచ్చు
నిపుణుల ప్రకారం ఐ లవ్ యూ(I love you)కి ప్రతిస్పందనగా లవ్ యూ టూ(love you too) అని చెప్పడం సాధారణమే. కానీ సమస్యల్లా ఆ మాట చెప్పే విధానంలోనే ఉంది. ఎటువంటి ఆప్యాయత, కళ్లలో మెరుపు లేదా ఆలింగనం వంటి చర్యలు లేకుండా కేవలం మాటగా దాన్ని ముగిస్తే అది ఆలోచించాల్సిన విషయమే. ఇది బంధంలో ఏర్పడుతున్న భావోద్వేగ దూరాన్ని సూచిస్తుంది.

ఎందుకిది ప్రమాద సంకేతం?

-మీ భాగస్వామి ఈ మాటను కేవలం ఒక విధిగా, అలవాటుగా చెబుతున్నారంటే మీ మధ్య భావోద్వేగపు బంధం బలహీనపడుతోందని అర్థం. ప్రేమ అనేది మాటల్లో కాకుండా చేతల్లో, స్పర్శలో, చూపుల్లో కనిపించాలి. అది లోపించినప్పుడు, మాటలు నిరర్థకమవుతాయి.

-ప్రేమ అంటే కేవలం పదాల ప్రదర్శన కాదు. అది బాధ్యత, శ్రద్ధ, గౌరవం. లవ్ యూ టూ అని చెప్పి, ఆ తర్వాత మీ అవసరాలను పట్టించుకోకపోయినా, మీకు సమయం ఇవ్వకపోయినా, మీ భావాలను అర్థం చేసుకోకపోయినా ఆ మాటకు విలువ ఉండదు. మాటలకు, చేతలకు మధ్య ఉన్న ఈ అంతరమే అసలైన హెచ్చరిక.

-ఒక ఆరోగ్యకరమైన బంధంలో, ప్రేమను వ్యక్తపరిచినప్పుడు వచ్చే సమాధానం కూడా అంతే ఆర్తితో, హృదయపూర్వకంగా ఉండాలి. వారి జవాబులో ఎటువంటి ఉత్సాహం, ఇంట్రెస్ట్ కనిపించకపోతే, వారు ఆ బంధం పట్ల నిర్లిప్తంగా ఉన్నారని భావించవచ్చు.

ఈ పరిస్థితిని ఎలా ఎదుర్కోవాలి
-మీ భాగస్వామితో ప్రశాంతంగా కూర్చుని మాట్లాడండి. నేను నిన్ను ప్రేమిస్తున్నాను అని చెప్పినప్పుడు నీకు ఏమనిపిస్తుంది? అని సున్నితంగా అడగండి. వారి మనసులోని మాటను తెలుసుకునే ప్రయత్నం చేయండి.

-మాటల కంటే చేతలు చాలా శక్తివంతమైనవి. మీ భాగస్వామి మీ కోసం సమయం కేటాయిస్తున్నారా? మీకు కష్టంలో తోడుగా ఉంటున్నారా? మిమ్మల్ని గౌరవిస్తున్నారా? ఈ ప్రశ్నలకు వచ్చే సమాధానాలు వారి ప్రేమ తీవ్రతను వెల్లడిస్తాయి.

-అన్నింటికంటే ముఖ్యంగా, మీ ఆత్మగౌరవాన్ని కాపాడుకోండి. మీ భావోద్వేగ అవసరాలు కూడా ముఖ్యమేనని గుర్తించండి. మీ సంతోషం వేరొకరి స్పందనపై ఆధారపడి ఉండకూడదు.

-సమస్య తీవ్రంగా ఉందని మీకు అనిపిస్తే, రిలేషన్‌షిప్ కౌన్సెలర్‌ ను సంప్రదించడానికి వెనుకాడకండి.