నవరాత్రుల సమయంలో భాగస్వామితో శృంగారంలో పాల్గొనవచ్చా? సైన్స్,శాస్త్రం చెబుతుందిదే

హిందువులు జరుపుకునే పండుగల్లో దసరా ముఖ్యమైనది. ఈ ఏడాది అక్టోబర్ 2న దసరా పండుగను జరుపుకోనున్నారు. దసరా పండుగలో మొదటి తొమ్మిది రోజులను నవరాత్రులు అంటారు. హిందూ సంప్రదాయంలో శరన్నవరాత్రులకు అత్యంత విశిష్ట స్థానం ఉంది. ఈ తొమ్మిది రోజులు కేవలం పండుగ మాత్రమే కాదు, అదొక మహత్తరమైన ఆధ్యాత్మిక సాధనా కాలం. జగన్మాత ఆదిపరాశక్తి తన తొమ్మిది దివ్య రూపాలలో భూమిపై కొలువై, విశ్వమంతా తన చైతన్యంతో నింపేస్తుందని ప్రగాఢ విశ్వాసం.

నవరాత్రుల సమయంలో వాతావరణం దివ్యశక్తితో నిండి ఉంటుంది కాబట్టి ఏకాగ్రతతో చేసే ఏ సాధన అయినా అద్భుతమైన ఫలితాలను ఇస్తుందని పండితులు చెబుతున్నారు. అందుకే ప్రాచీన కాలం నుండి ఋషులు, యోగులు, దేవతలు సైతం ఈ పవిత్ర దినాలలో అమ్మవారిని ఆరాధించి, ఆమె అనుగ్రహాన్ని పొందారు. ఈ తొమ్మిది రోజుల వ్రతంలో సాత్విక ఆహారం తీసుకోవడం, భగవన్నామ స్మరణ చేయడం ఎంత ముఖ్యమో, బ్రహ్మచర్యం పాటించడం కూడా అంతే ముఖ్యం. నవరాత్రులలో లైంగిక వాంఛలకు, శారీరక కలయికకు ఎందుకు దూరంగా ఉండాలని మన పెద్దలు నిర్దేశించారో పరిశీలిస్తే, దాని వెనుక లోతైన ఆధ్యాత్మిక, శాస్త్రీయ కారణాలు కనిపిస్తాయి.

శక్తిని నిలుపుకోవడం
నవరాత్రులు అంటే మనస్సును, శరీరాన్ని శుద్ధి చేసుకుని మనలోని శక్తిని కూడగట్టుకుని, దానిని ఆధ్యాత్మిక ఉన్నతి వైపు మళ్ళించే ప్రయత్నం. పూజలు, ఉపవాసాల ద్వారా మనం సంపాదించుకున్న సాత్విక శక్తిని నిలుపుకోవడం చాలా ముఖ్యం. లైంగిక చర్య అనేది శారీరక శక్తిని ఎక్కువగా వినియోగించే ప్రక్రియ. ఇది మన ఏకాగ్రతను దెబ్బతీసి, మనసును లౌకిక విషయాల వైపు లాగుతుంది. స్వచ్ఛమైన భక్తితో అమ్మవారిని కొలిచేటప్పుడు మనసులో కామవాంఛలు మెదిలితే సాధన అసంపూర్ణంగా మిగిలిపోతుంది. ఆరాధన పూర్తి ఫలాన్ని మనం అందుకోలేము. ఇది మన ఆధ్యాత్మిక ప్రయాణానికి పెద్ద ఆటంకం.

వ్రత దీక్ష, దైవిక భావన
నవరాత్రుల్లో చాలామంది కఠినమైన ఉపవాస దీక్షను పాటిస్తారు. ఉపవాసం ఉండటం వల్ల శరీరం శక్తిని పరిరక్షించుకునే స్థితిలో ఉంటుంది. శాస్త్రీయంగా చూసినా.. ఉపవాస సమయంలో జీర్ణవ్యవస్థకు విశ్రాంతి లభించి, శరీరం అంతర్గత శుద్ధి ప్రక్రియను ప్రారంభిస్తుంది. ఈ సమయంలో లైంగిక కార్యకలాపాలలో పాల్గొనడం వల్ల శరీరంపై విపరీతమైన భారం పడుతుంది. ఇది ఉపవాస దీక్షకు భంగం కలిగించడమే కాకుండా, శారీరక నీరసానికి దారితీస్తుంది.

అంతేకాకుండా ధార్మిక గ్రంథాల ప్రకారం ఈ పవిత్రమైన రోజుల్లో అమ్మవారి శక్తి ప్రతి స్త్రీలోనూ ఒక అంశగా ప్రకాశిస్తుందని నమ్మకం. అందుకే ఈ సమయంలో కన్యాపూజలు చేయడం, వివాహిత స్త్రీలను అమ్మవారి స్వరూపంగా భావించి పూజించడం, వారికి తాంబూలాలు సమర్పించడం వంటి సంప్రదాయాలు ఉన్నాయి. ప్రతి స్త్రీలోనూ దైవత్వాన్ని దర్శించే ఈ ఉత్కృష్టమైన సమయంలో వారిని భోగవస్తువుగా చూడటం మహాపచారంగా పరిగణిస్తారు. అందుకే నవరాత్రుల్లో బ్రహ్మచర్యం తప్పనిసరి.

శాస్త్రీయ దృక్కోణం
మన ఋషులు ఎంతటి దూరదృష్టితో ఈ నియమాలను ఏర్పరిచారో శాస్త్రీయ కోణంలో చూస్తే అర్థమవుతుంది. శరన్నవరాత్రులు వర్షాకాలం ముగిసి, శీతాకాలం ప్రారంభమయ్యే రుతు సంధి కాలంలో వస్తాయి. ఈ సమయంలో వాతావరణంలో వచ్చే మార్పుల వల్ల మన శరీరం సున్నితంగా మారుతుంది. రోగ నిరోధక శక్తి బలహీనపడి అనారోగ్యాల బారిన పడే అవకాశం ఎక్కువగా ఉంటుంది. ఈ తొమ్మిది రోజుల ఉపవాసం, సాత్విక ఆహారం, బ్రహ్మచర్యం అనేవి రాబోయే రుతువుకు శరీరాన్ని సిద్ధం చేసే ఒక అద్భుతమైన ఆయుర్వేద ప్రక్రియ. ఈ నియమాలు పాటించడం వల్ల శరీరం శుద్ధి జరిగి, రోగనిరోధక శక్తి బలపడుతుంది.