సంభోగానికి సరైన టైం ఏది? వీర్యం ఏ టైంలో బాగా ఉత్పత్తి అవుతుంది? ఆయుర్వేదం ఏం చెబుతుంది..

ప్రస్తుతం శృంగారం అనే పేరు వింటినే కొందరిలో ఎక్కడా లేని ఉత్సాహం వస్తుంది,అదే సమయంలో ఎన్నో అపోహలు, సిగ్గు,బిడియం కూడా ఉంటాయి. శృంగారం లేదా సంభోగం అనే పదాలు కూడా ఏదో బ్యాన్ చేసినట్లుగా వాటి గురించి పలకడాన్నే ఏదో అసభ్యకరమైన చర్యగా చాలామంది భావిస్తుంటారు. అయితే వేల సంవత్సరాల క్రితమే మన పూర్వీకులు, ముఖ్యంగా ఆయుర్వేద మహర్షులు ఈ అంశాన్ని అత్యంత శాస్త్రీయంగా, గౌరవప్రదంగా, ఆరోగ్యపరంగా విశ్లేషించారు. వారి దృష్టిలో లైంగికత కేవలం శారీరక ఆనందానికో, సంతానోత్పత్తికో పరిమితం కాదు. అదొక అద్భుతమైన జీవన క్రియ, సంపూర్ణ ఆరోగ్యానికి మూలస్తంభం.

శృంగారం..శరీరానికి మూడో స్తంభం

ఆయుర్వేదం ప్రకారం మానవ శరీరం ఆరోగ్యంగా, దృఢంగా ఉండటానికి మూడు పిల్లర్స్ ఆధారం. అవేంటంటే..ఆహారం, నిద్ర , బ్రహ్మచర్యం . ఇక్కడ బ్రహ్మచర్యం అంటే శృంగారాన్ని పూర్తిగా త్యజించడం అని కాదు.. దానిని నియమబద్ధంగా, ఆరోగ్యకరంగా ఆచరించడం అన్నమాట. ఈ మూడు పిల్లర్స్ బలంగా ఉంటేనే మన జీవితం అనే సౌధం పటిష్టంగా నిలుస్తుంది. ఆయుర్వేదం లైంగిక శక్తిని శరీరానికి పోషణనిచ్చే, దోషాలను సమతుల్యం చేసే, మొత్తం శ్రేయస్సును కాపాడే ఒక అమూల్యమైన ప్రక్రియగా చూస్తుంది.

జీవశక్తికి మూలాలు
ఆయుర్వేదం మన శరీరం ఏడు ధాతువులతో నిర్మితమైందని చెబుతుంది. అవి రసం (ప్లాస్మా), రక్తం (రక్తం), మాంసం (కండరాలు), మేదస్సు (కొవ్వు), అస్థి (ఎముక), మజ్జ (ఎముక మజ్జ), చివరిగా అత్యంత విలువైనది శుక్రధాతువు. పురుషులలో వీర్యం, స్త్రీలలో అండం ఈ శుక్రధాతువు పరిధిలోకి వస్తాయి. ఇది మిగిలిన ఆరుజ.. ధాతువుల సారం నుండి తయారవుతుంది. అంటే మనం తీసుకున్న ఆహారం జీర్ణమై ఒక్కో ధాతువుగా మారుతూ చివరికి అత్యంత శక్తివంతమైన శుక్రధాతువుగా పరిణమిస్తుంది. ఆరోగ్యకరమైన శుక్రధాతువు మన శరీరానికి బలాన్ని, తేజస్సును, రోగనిరోధక శక్తిని అందిస్తుంది.

శుక్రధాతువు అధికంగా ఉంటే..లైంగిక కోరికలు బలంగా ఉంటాయి, సంతాన సామర్థ్యం పెరుగుతుంది, చర్మం కాంతివంతంగా ఉంటుంది. అదే సమయంలో శుక్రధాతువు తక్కువగా ఉంటే..నీరసం, బలహీనత, నపుంసకత్వం, వంధ్యత్వం వంటి సమస్యలు తలెత్తుతాయి.

ఈ శుక్రధాతువు సూక్ష్మరూపమే ఓజస్సు. ఓజస్సు మన శరీరంలోని జీవశక్తి, రోగనిరోధక శక్తికి కేంద్రం. మనం ఎంత ఆరోగ్యంగా, ఉత్సాహంగా ఉంటామనేది మన ఓజస్సుపై ఆధారపడి ఉంటుంది. నియమరహితమైన, అతి లైంగిక చర్యల వల్ల శుక్రధాతువు క్షీణించి, ఓజస్సు తగ్గిపోతుంది. ఫలితంగా శరీరం తేలికగా రోగాల బారిన పడుతుంది. అందుకే ఆయుర్వేదం లైంగిక శక్తిని కాపాడుకోవాలని నొక్కి చెబుతుంది.

శృంగారానికి సరైన సమయం ఏది?
ప్రకృతికి, మానవ శరీరానికి మధ్య విడదీయరాని సంబంధం ఉందని ఆయుర్వేదం నమ్ముతుంది. ఋతువులను బట్టి మన శరీరంలో శక్తి స్థాయులు మారతాయి. అందుకే లైంగిక చర్యలను కూడా ఋతువులకు అనుగుణంగా సర్దుబాటు చేసుకోవాలి.

శీతాకాలం, వసంతఋతువు: ఈ కాలంలో వాతావరణం చల్లగా ఉండి, శరీరంలో కఫ దోషం బలంగా ఉంటుంది. సహజంగానే శరీర బలం, శక్తి ఎక్కువగా ఉంటాయి. శుక్రధాతువు ఉత్పత్తి కూడా అధికంగా ఉంటుంది. కాబట్టి ఇది శృంగారానికి, గర్భధారణకు అత్యంత అనువైన సమయం.

వేసవి, వర్షాకాలం: ఈ కాలంలో ఎండ వేడికి, వాతావరణ మార్పులకు శరీరం బలహీనపడుతుంది. జీర్ణశక్తి మందగిస్తుంది. ఈ సమయంలో లైంగిక శక్తి కూడా సహజంగానే తగ్గుతుంది. కాబట్టి ఈ కాలంలో శృంగారాన్ని తగ్గించడం ఆరోగ్యానికి మంచిది.

పురాతన ఆయుర్వేద గ్రంథం అష్టాంగ హృదయంలో వాగ్భటుడు ఇలా సలహా ఇచ్చాడు

శీతాకాలంలో: శరీర బలం ఎక్కువగా ఉంటుంది కాబట్టి ప్రతిరోజూ శృంగారంలో పాల్గొనవచ్చు. అయితే అందుకు తగిన బలవర్ధకమైన ఆహారం తీసుకోవాలి.

వసంత, శరదృతువులలో: మూడు రోజులకు ఒకసారి.

వేసవి, వర్షాకాలంలో: పదిహేను రోజులకు ఒకసారి శృంగారంలో పాల్గొనడం శ్రేయస్కరం.

ఈ నియమాల వెనుక ఉన్న సూత్రం ఒక్కటే..సమానత్వాన్ని పెంచండి, వ్యత్యాసాన్ని తగ్గించండి. అంటే శరీరం బలంగా ఉన్నప్పుడు శక్తిని వినియోగించుకోవచ్చు, బలహీనంగా ఉన్నప్పుడు శక్తిని కాపాడుకోవాలి.

ఆరోగ్యకరమైన లైంగిక జీవితానికి ఆయుర్వేద చిట్కాలు

సమయం: పగటిపూట శృంగారం మంచిది కాదు. సూర్యాస్తమయం తర్వాత రాత్రి భోజనం జీర్ణమైన తర్వాత (సుమారు 2-3 గంటల తర్వాత) రాత్రి 10 గంటల లోపు సమయం ఉత్తమమైనది. అర్థరాత్రి తర్వాత శరీరం విశ్రాంతి కోరుకుంటుంది కాబట్టి ఆ సమయంలో శృంగారం అనారోగ్యానికి దారితీస్తుంది.

శృంగారం తర్వాత: లైంగిక చర్య వల్ల వాత దోషం పెరుగుతుంది. దానిని శాంతపరచడానికి గోరువెచ్చని నీటితో స్నానం చేయడం, శరీరానికి నువ్వుల నూనెతో మర్దన చేసుకోవడం మంచిది.

ఆహారం: శుక్రధాతువును తిరిగి పెంపొందించడానికి ఆవు పాలు, నెయ్యి, బాదం, ఖర్జూరాలు, కొబ్బరి నీళ్ళు, నల్ల మినుములు వంటి పోషకాహారాన్ని తీసుకోవాలి.

మానసిక ప్రశాంతత: ఒత్తిడి, ఆందోళన లైంగిక ఆరోగ్యంపై తీవ్ర ప్రభావం చూపుతాయి. ధ్యానం, ప్రాణాయామం వంటివి మానసిక ప్రశాంతతను అందించి, లైంగిక జీవితాన్ని మెరుగుపరుస్తాయి.