భాగస్వామితో పడక సుఖం..ఎక్కువ కాలం శృంగారం చేయకపోవడానికి కారణమిదే

వైవాహిక బంధంలో ప్రేమ, ఆప్యాయతలతో పాటు శృంగారం కూడా ఒక ముఖ్యమైన భాగం. శృంగారం అనేది కేవలం శారీరక కలయిక మాత్రమే కాదు..ఇద్దరి మధ్య మానసిక బంధాన్ని, సాన్నిహిత్యాన్ని పెంచే ఒక మధురమైన అనుభూతి. అయితే పెళ్లి అయిన కొన్నేళ్ల తర్వాత చాలా జంటల మధ్య ఈ అనుబంధం సన్నగిల్లుతుంది. ఒకప్పుడు ఎంతో ఉత్సాహంగా ఉన్న బెడ్ రూమ్..క్రమంగా సైలెంట్ గా మారుతుంది. ఈ మార్పు వైవాహిక జీవితంలో తీవ్రమైన అలజడికి కారణమవుతుంది. ఇంతకీ దంపతులు శృంగారానికి ఎందుకు దూరమవుతారు? ఆ దూరం వారి ఆరోగ్యంపై ఎలాంటి ప్రభావం చూపుతుంది?

ఇది సర్వసాధారణమేనా?
ఒకప్పుడు ఎంతో చురుకైన లైంగిక జీవితం గడిపి..ఇప్పుడు దానిపై ఆసక్తి కోల్పోవడం అనేది చాలా మంది ఎదుర్కొనే సమస్యే. వయసు పెరగడం, పెళ్లి కాకపోవడం వంటి కారణాలతో పాటు ఆర్థిక ఒత్తిళ్లు కూడా శృంగారంపై ఆసక్తి తగ్గడానికి ఒక కారణమని కొన్ని అధ్యయనాలు చెబుతున్నాయి. అయితే ఇవి మాత్రమే కారణాలు కావు. పైకి కనిపించని ఎన్నో మానసిక, శారీరక అంశాలు ఈ దూరాన్ని పెంచుతాయి.

శృంగారానికి దూరం కావడానికి ప్రధాన కారణాలు

మీరు మీ భాగస్వామితో శారీరకంగా కలవలేకపోవడానికి మీ మానసిక, శారీరక ఆరోగ్యానికి సంబంధించిన అనేక కారణాలు ఉండవచ్చు. అందులో కొన్ని ముఖ్యమైనవి ఇక్కడ చూడండి.

సంబంధాల్లో సంఘర్షణ
దాంపత్యమంటే ఇద్దరు వ్యక్తుల కలయిక. వారి మధ్య సఖ్యత లోపించినప్పుడు ఆ ప్రభావం పడకగదిపై పడుతుంది. తరచూ గొడవలు, మనస్పర్థలు, ఒకరినొకరు అర్థం చేసుకోకపోవడం వంటివి మనసులో ఉన్నప్పుడు శృంగారంపై ఆసక్తి కలగడం అసాధ్యం. అందుకే ఆరోగ్యకరమైన సంభాషణ బంధానికి ప్రాణవాయువు లాంటిదని నిపుణులు చెబుతుంటారు.

నమ్మకం లోపించడం
ఏ బంధానికైనా పునాది నమ్మకం. ఆ నమ్మకం సన్నగిల్లినప్పుడు బంధం మొత్తం కదిలిపోతుంది. ముఖ్యంగా శృంగారం విషయంలో నమ్మకం చాలా కీలకం. భాగస్వామిపై నమ్మకం లేనప్పుడు వారితో ఏకాంతంగా గడపడానికి మనసు అంగీకరించదు. అది శారీరక కలయికకు అతిపెద్ద అడ్డంకిగా మారుతుంది.

మోసం లేదా ద్రోహం
వివాహ బంధంలో ద్రోహం అనేది ఒక పెను తుఫాను లాంటిది. అది భాగస్వామి మనసుపై చెరగని గాయాన్ని చేస్తుంది. మోసపోయాననే బాధ, కోపం, అభద్రతాభావం వారిని కుంగదీస్తాయి. అలాంటి మానసిక స్థితిలో శృంగారం గురించి ఆలోచించడం కూడా కష్టమవుతుంది. అమెరికాలో విడాకులకు అవిశ్వాసమే ప్రధాన కారణమని ఒక అధ్యయనం తెలియజేయడం దీని తీవ్రతకు అద్దం పడుతోంది.

యోనినిస్మస్
ఇది కొందరు మహిళల్లో ఎదురయ్యే ఒక సున్నితమైన ఆరోగ్య సమస్య. దీనివల్ల సంభోగం సమయంలో యోని కండరాలు అసంకల్పితంగా బిగుసుకుపోయి, తీవ్రమైన నొప్పి కలుగుతుంది. ఈ నొప్పి కారణంగా వారు శృంగారమంటేనే భయపడతారు. ఇది పూర్తిగా శారీరక సమస్యే అయినా మానసికంగా ఎంతో వేదనకు గురిచేస్తుంది.

గతకాలపు గాయాలు
గతంలో లైంగిక వేధింపులు లేదా హింసకు గురైన వారిలో ఆ చేదు జ్ఞాపకాలు జీవితాంతం వెంటాడుతాయి. అలాంటి వారికి శృంగారం ఆనందాన్ని కాకుండా, భయాన్ని, ఆందోళనను కలిగిస్తుంది. ఈ మానసిక గాయాల వల్ల వారు తమ భాగస్వామితో కూడా శారీరకంగా దగ్గరవడానికి ఇష్టపడరు. ఈ కారణాలను అర్థం చేసుకుని భాగస్వాములు ఒకరికొకరు తోడుగా నిలవడం, అవసరమైతే నిపుణుల సహాయం తీసుకోవడం ద్వారా దాంపత్య బంధంలోని మాధుర్యాన్ని తిరిగి పొందవచ్చు.