సమాధుల మధ్య ప్రేమ..ఇదెక్కడి వింత ట్రెండ్ రా బాబూ!

డేటింగ్ ప్రపంచంలో ఎప్పటికప్పుడు వింతలు జరుగుతూనే ఉంటాయి. కానీ ఇప్పుడు ట్రెండ్ అవుతున్న విషయం వింటే మాత్రం మీరు కచ్చితంగా ఆశ్చర్యపోతారు. కాఫీ షాప్‌ లోనో, పబ్‌ లోనో కలుసుకోవడానికి బదులు నేటి యువత డేటింగ్ కోసం ఏకంగా శ్మశానవాటికల వైపు అడుగులేస్తున్నారు. దీన్నే ఇప్పుడు గ్రేవ్‌ యార్డ్ డేటింగ్ అని పిలుస్తున్నారు.

ఇప్పటిదాకా డేటింగ్‌ లో ఎదుటివారిని భయపెట్టే ఫ్లడ్‌ లైటింగ్, పాతవాళ్లని వదిలేసి కొత్తవాళ్ల కోసం వెతికే మంకీ బారింగ్, బ్రెడ్‌ క్రంబింగ్ లాంటి ఎన్నో వింత పదాలు విన్నాం. కానీ వాటన్నింటినీ మించిపోయేలా, చనిపోయిన వారి సమాధుల మధ్య ప్రేమను వెతుక్కునే ఈ వింత ట్రెండ్ ఇప్పుడు ఇన్‌ స్టాగ్రామ్‌ లో వైరల్‌ గా మారింది. యువత సమాధుల మధ్య కూర్చుని డేటింగ్ చేస్తున్న వీడియోలతో సోషల్ మీడియా హోరెత్తిపోతోంది.

ఈ ట్రెండ్ అందరికీ నచ్చకపోవచ్చు, కొందరికి పూర్తిగా అర్థరహితంగా అనిపించవచ్చు. కానీ కొందరికి మాత్రం ఇది ఎలాంటి అభ్యంతరాలు లేకుండా వర్కవుట్ అవుతోంది.

అసలు శ్మశానానికే ఎందుకు వెళ్తున్నారు?
దీనికి కారణం ప్రశాంతత, ఏకాంతం,లోతైన అనుబంధంగా చెబుతున్నారు. పబ్‌ లలో చెవులు పగిలిపోయే మ్యూజిక్ శ్మశానంలో ఉండదు, చుట్టూ వందలాది మంది జనం లేరు, పదే పదే ఫోన్ చూసుకునే తొందర ఉండదు. ఇరుకు ప్రదేశాలు, ఉరుకులు పరుగుల జీవితం నుంచి ఇదొక విరామం.

పాత శిథిలాలు, పచ్చని చెట్ల మధ్య ఉండే ఆ నిశ్శబ్దం ఇద్దరి మధ్య అద్భుతమైన సంభాషణలకు దారితీస్తుందని వారు నమ్ముతున్నారు. పైపైన మాటలు కాకుండా జీవితం, భయాలు, కలల గురించి మనసు విప్పి మాట్లాడుకోవడానికి ఈ వాతావరణం అనుకూలిస్తుందట.

భయం ఉండదా?
చీకటి పడ్డాక శ్మశానంలో దెయ్యాలు తిరుగుతాయనే భయం మనలో బలంగా నాటుకుపోయింది. అయినా సరే, ఒకరినొకరు అర్థం చేసుకోవాలనే తపన ఆ భయాన్ని జయిస్తోందని కొందరు అంటుంటే.. మరికొందరికి మాత్రం ఇదొక అత్యంత భయానకమైన, కలవరపెట్టే ఆలోచనగా అనిపిస్తోంది. సమాధుల మధ్య కూర్చుని దొంగచాటుగా ముద్దులు పెట్టుకోవడం ఏ రకమైన శృంగారమో వారికే తెలియాలి.