ప్రేమ నాటకాన్ని గుర్తించడం ఎలా? ఈ ట్రిక్ తెలుసుకోండి

సోషల్ మీడియా యుగంలో గ్రీన్ ఫ్లాగ్, రెడ్ ఫ్లాగ్ అనే పదాలు బాగా ప్రాచుర్యం పొందాయి. నా మాజీ ఒక రెడ్ ఫ్లాగ్, కానీ నా ప్రస్తుత భాగస్వామి ఒక గ్రీన్ ఫ్లాగ్ అని చాలామంది అంటుంటారు. మంచి లక్షణాలు, ఆరోగ్యకరమైన సంబంధానికి సూచనలను గ్రీన్ ఫ్లాగ్ అని, ప్రమాదకరమైన, విషపూరితమైన ప్రవర్తనలను రెడ్ ఫ్లాగ్ అని అంటారు. మరి ఈ రెడ్ ఫ్లాగ్స్‌ను, ముఖ్యంగా రిలేషన్ షిప్ ప్రారంభంలో ఎలా గుర్తించాలి?

సాధారణంగా మనకు పూర్తిగా అపరిచితులెవరూ వచ్చి ప్రేమను వ్యక్తపరచరు. మన స్నేహితుడో, పరిచయస్తుడో కావచ్చు. అయితే ఆ వ్యక్తిని పూర్తిగా అర్థం చేసుకోవడానికి కొంత సమయం పడుతుంది. ఇక్కడే మనం చాలా జాగ్రత్తగా ఉండాలి. విషపూరితమైన మనస్తత్వం ఉన్న వ్యక్తులు ప్రతిదీ చాలా వేగంగా జరిగిపోవాలని కోరుకుంటారు. ఉదాహరణకు ఒక వ్యక్తి మనకు పరిచయమైన కొద్ది రోజులకే అంటే వారం తిరగకముందే మనపై అమితమైన ఆసక్తి చూపించడం, మన గురించి పూర్తిగా తెలుసుకోకుండానే ప్రేమను వ్యక్తపరచడం వంటివి చేస్తే, అది ఒక పెద్ద హెచ్చరికగా భావించాలి. ఈ తొందరపాటు వెనుక ఏదో ఒక రహస్య ఉద్దేశం ఉండే అవకాశం ఉంది. ఇది వారి నిజస్వరూపం బయటపడకముందే మనల్ని బంధించాలనే ఎత్తుగడ కావచ్చు.

లవ్ బాంబింగ్ ఒక ప్రమాదకరమైన వ్యూహం
ఇలాంటి ప్రవర్తనను లవ్ బాంబింగ్ అంటారు. వీరు తమ భాగస్వామిపై మొదట్లో విపరీతమైన ప్రేమను కురిపిస్తారు. గిఫ్ట్స్ ఇవ్వడం, కంటిన్యూగా పొగడటం, నేను ఇన్నాళ్లూ ఎదురుచూస్తున్న వ్యక్తి నువ్వే అన్నట్లు అనిపించేలా చేస్తారు. వారి భావోద్వేగాలు నిజమైనవి కావు, కేవలం ఒక నాటకం. అందుకే ఈ ప్రేమ ప్రదర్శన కొన్ని నెలలకే మాయమైపోతుంది.

లవ్ బాంబింగ్‌ కు గురైనప్పుడు మనం పూర్తిగా భావోద్వేగాలకు లోనవుతాము. తెలివిగా ఆలోచించే శక్తిని కోల్పోతాము. మన మెదడుకు, హృదయానికి మధ్య దూరం పెరిగిపోయి కేవలం మనసు చెప్పిందే వింటాము. ఇదే అవతలి వాళ్లు కోరుకునేది. మన భావోద్వేగాలను నియంత్రించడం ద్వారా, వారు తమ అభద్రతా భావాలను, పాత గాయాలను పూడ్చుకుంటారు. ఇది కఠినంగా అనిపించినా వారి ప్రవర్తన వెనుక ఉన్న చేదు నిజం ఇదే.

మరి దీన్ని ఎలా గుర్తించాలి?

ఈ ప్రశ్నకు సులభమైన సమాధానం లేదు. కానీ కొన్ని జాగ్రత్తలు తీసుకోవచ్చు.

సమయం ఇవ్వండి: ఏ సంబంధానికైనా సమయం ఇవ్వడం చాలా ముఖ్యం. మీరంతట మీరు తొందరపడకండి, అవతలి వ్యక్తిని కూడా తొందరపెట్టవద్దు.

స్నేహానికి ప్రాధాన్యత ఇవ్వండి: స్నేహంగా మొదలుపెట్టి ఒకరినొకరు పూర్తిగా అర్థం చేసుకున్న తర్వాతే సంబంధాన్ని ముందుకు తీసుకెళ్లండి.

రీబౌండ్ రిలేషన్‌ షిప్స్ కు దూరంగా ఉండండి: ఒక బ్రేకప్ బాధ నుంచి బయటపడటానికి వెంటనే మరో సంబంధంలోకి అడుగుపెట్టడం చాలా ప్రమాదకరం. అలాగే అవతలి వ్యక్తి కూడా ఇటీవలే బ్రేకప్ నుండి బయటపడి ఉంటే, కాస్త జాగ్రత్తగా ఉండటం మంచిది.