నవరాత్రి వేళ..దంపతుల నియమ నిష్టలు! ఈ విషయాలు తప్పక తెలుసుకోండి

దేవీ శరన్నవరాత్రులు ప్రారంభమయ్యాయి. లోకమంతా అమ్మవారి నామస్మరణతో, భక్తి పారవశ్యంతో పులకించిపోతోంది. తొమ్మిది రోజుల పాటు సాగే ఈ ఉత్సవాలు కేవలం పూజలు, ఉపవాసాలకే పరిమితం కాదు. ఇది శారీరక, మానసిక శుద్ధికి, ఆధ్యాత్మిక ఉన్నతికి ఒక సువర్ణావకాశం. ఈ పవిత్రమైన సమయంలో ముఖ్యంగా దంపతులు కొన్ని నియమాలను పాటించడం ద్వారా అమ్మవారి సంపూర్ణ అనుగ్రహాన్ని పొందగలరని శాస్త్రాలు చెబుతున్నాయి. వాటిలో అత్యంత ముఖ్యమైనది బ్రహ్మచర్యం.

శారీరక సంబంధాలకు ఎందుకు దూరంగా ఉండాలి?
నవరాత్రులు అంటే తొమ్మిది రాత్రులు. ఈ సమయంలో దుర్గామాత తొమ్మిది స్వరూపాలను అత్యంత భక్తిశ్రద్ధలతో ఆరాధిస్తాము. అమ్మవారిని ప్రసన్నం చేసుకోవడానికి చాలామంది కఠిన ఉపవాస దీక్షను పాటిస్తారు. ఈ ఉపవాసం కేవలం ఆహారాన్ని త్యజించడం మాత్రమే కాకుండా మనసును, శరీరాన్ని కూడా అదుపులో ఉంచుకోవడం. మన శక్తిని, చైతన్యాన్ని పూర్తిగా దైవ చింతన వైపు మళ్లించడమే ఈ వ్రతం ముఖ్య ఉద్దేశ్యం.

శారీరక కలయిక అనేది శారీరక శక్తిని ఎక్కువగా వినియోగించే ప్రక్రియ. ఇది మనసులో ప్రాపంచిక ఆలోచనలను, కోరికలను రేకెత్తిస్తుంది. నవరాత్రులలో మన లక్ష్యం ఆధ్యాత్మిక శక్తిని పెంపొందించుకోవడం. అందువల్ల ఈ తొమ్మిది రోజులు దంపతులు బ్రహ్మచర్యాన్ని పాటించడం ద్వారా తమ శక్తిని భక్తి మార్గంలోకి మళ్లించి వ్రతాన్ని సంపూర్ణంగా ఆచరించిన వారవుతారు. దీనివల్ల వారి దీక్షకు రెట్టింపు ఫలం లభిస్తుందని నమ్మకం.

కౌగిలింతలు, ముద్దుల విషయంలో నియమాలేంటి?
ఈ విషయంలో చాలామందికి సందేహాలు ఉంటాయి. నవరాత్రులలో భాగస్వామి పట్ల ప్రేమను, ఆప్యాయతను చూపించకూడదా అనే ప్రశ్న తలెత్తుతుంది. ఇక్కడ ప్రధానంగా గుర్తుంచుకోవాల్సింది ఉద్దేశ్యం.

మీ భాగస్వామికి మానసిక ధైర్యాన్ని ఇవ్వడానికి, ప్రేమను తెలియజేయడానికి ఇచ్చే కౌగిలింత తప్పుకాదు. అలాగే వాత్సల్యంతో నుదిటిపై లేదా బుగ్గపై పెట్టే ముద్దు కూడా నిషిద్ధం కాదు. ఇవి బంధాన్ని బలోపేతం చేసే సహజమైన భావోద్వేగాలు.

శృంగారభరితమైన, ఉద్రేకపూరితమైన ముద్దులకు, స్పర్శలకు దూరంగా ఉండటం చాలా మంచిది. ఎందుకంటే అవి లైంగిక కోరికలను సులభంగా ప్రేరేపించి, బ్రహ్మచర్య దీక్షకు భంగం కలిగిస్తాయి. మనసును అదుపు తప్పేలా చేసే ఏ చర్యకైనా దూరంగా ఉండటమే బెటర్.

ఉపవాసం లేకపోయినా ఈ నియమం పాటించాలా?
మేము ఉపవాసం ఉండటం లేదు కదా మాకు ఈ నియమాలు వర్తించవు అని కొందరు భావించవచ్చు. కానీ నవరాత్రుల పవిత్రత కేవలం ఉపవాసం ఉన్నవారికే పరిమితం కాదు. ఈ తొమ్మిది రోజులు వాతావరణంలోనే ఒక దివ్యమైన శక్తి ప్రసరిస్తూ ఉంటుంది. కాబట్టి ఉపవాసం చేయకపోయినా ఈ పవిత్రమైన కాలాన్ని గౌరవిస్తూ భార్యాభర్తలు శారీరకంగా దూరంగా ఉండటం మంచిది. ఇది ఆ పండుగ ఆధ్యాత్మిక సారాంశం పట్ల మనకున్న గౌరవాన్ని సూచిస్తుంది.

అయితే మారుతున్న కాలంతో పాటు చాలామంది ఈ నియమాలను అంత కఠినంగా పాటించకపోవచ్చు. కానీ మన సంస్కృతి, సంప్రదాయాల వెనుక ఉన్న ఆధ్యాత్మిక, శాస్త్రీయ కారణాలను అర్థం చేసుకుని సాధ్యమైనంత వరకు ఆచరించడం ద్వారా దంపతులు అమ్మవారి కృపకు పాత్రులవడమే కాకుండా వారి బంధాన్ని కూడా ఆధ్యాత్మికంగా బలోపేతం చేసుకోగలుగుతారు.