రిలేషన్ షిప్స్ లో మోసం చేయడానికి అసలు కారణం ఇదే!

ఏ బంధానికి అయినా నమ్మకమే పునాది. నమ్మకం లేనప్పుడు బంధాలు తెగిపోతుంటాయి. అయితే ఇటీవల కాలంలో రిలేషన్ షిప్స్ లో ఎక్కువగా చీటింగ్ జరుగుతుంది. వివాహ బంధంలో అయినా లేదా డేటింగ్ లో అయినా లేదా ప్రేమ బంధంలో అయినా భాగస్వామిని చీటింగ్ చేసేవాళ్ల సంఖ్య పెరుగుతుంది. దీనికి వివాహేతర సంబంధాలు, డబ్బు, ఫ్యామిలీ ఒత్తిడి, లైఫ్ స్టైయిల్, ఒంటరితనం ఇలా రకరకాల కారణాలు ఉంటాయి. భాగస్వామి చేతిలో మోసపోయిన వ్యక్తులు కొందరు మద్యానికి,డ్రగ్స్ కు బానిసలుగా కూడా మారి సమాజానికి హాని కలిగిస్తున్నారు. అయితే రిలేషన్ షిప్స్ లో భాగస్వాములు మోసం చేయడానికి అసలైన కొన్ని కారణాల గురించి కొందరు నిపుణులు చెప్పారు. అవేంటో ఇప్పుడు చూద్దాం.

నగర శృంగారం
వాస్తవానికి ఇప్పుడు చాలామంది ఉద్యగాల కోసం లేదా పనుల కోసం పట్టణాలకు,సిటీలకు వస్తుంటారు. అయితే నగర జీవనంలోని ఒత్తిడిలో కోరికలు కొత్త దారులు వెతుక్కుంటున్నాయి. తమ భాగస్వామితో లైంగిక జీవితం సంతృప్తికరంగా లేదని భావించే కొందరు, వేర్వేరు వ్యక్తులతో కొత్త అనుభూతులు పొందాలని మరికొందరు వివాహేతర సంబంధాలు,ఎఫైర్స్ పెట్టుకుంటున్నారు. నగరాల్లో బంధాలు బలహీనపడటానికి ఇదొక ప్రధాన కారణం. మోసానికి చాలా సందర్భాల్లో మూలకారణంగా ఈ తీరని లైంగిక వాంఛేనని నిపుణులు చెబుతున్నారు. అయితే ఇది కేవలం శారీరకమైన కోరిక మాత్రమే కాదని భావోద్వేగాల లోతును, అర్థవంతమైన అనుబంధాన్ని కోరుకునే తపన కూడా అయి ఉంటదని చెప్పారు.

పప్పీ లవ్
చిన్నతనంలో ప్రేమ ఒక అందమైన కల. ఆరాధన, ఒకరిపై ఒకరికి విపరీతమైన అనురాగం ఉంటుంది. అయితే క్రమంగా కాలం గడిచేకొద్దీ, మనం ఎదుగుతున్న కొద్దీ ఆ స్వచ్ఛమైన భావాలు మాయమవుతాయి. మన వ్యక్తిత్వం రూపుదిద్దుకుంటున్న సమయంలో మనం ఎవరిమో, మనకు ఏం కావాలో స్పష్టంగా తెలుసుకుంటున్నప్పుడు మన పక్కనున్న వ్యక్తి మనకు తగిన జోడీ కాదని అనిపించవచ్చు. అలాంటి సమయంలో మనల్ని మనం మరింతగా అర్థం చేసుకునే, మన కోరికలకు విలువనిచ్చే బంధం ఎక్కడో ఎదురైతే దాన్ని వదులుకోవడం చాలా కష్టం. అది మనల్ని మనం కొత్తగా కనుక్కున్న అనుభూతి కలుగుతుంది.

అలాంటి పరిస్థితుల్లో, మనం చేస్తున్నది తప్పు అని తెలిసినా, మన ప్రస్తుత బంధానికి ద్రోహం చేస్తున్నామని అనిపించదు. ఎందుకంటే ఆ కొత్త సంబంధం మనకు మరింత నిజమైనదిగా, మరింత అర్థవంతమైనదిగా అనిపిస్తుంది. నిజానికి ఇది కేవలం మోసం మాత్రమే కాదు..మనల్ని మనం వెతుక్కునే ప్రయత్నంలో ఎదురయ్యే ఒక సంక్లిష్టమైన పరిస్థితి.

వేధింపుల వల్ల
ఇంట్లోని వ్యక్తి లేదా రిలేషన్ షిప్ లో ఉన్న వ్యక్తి నుంచి నిత్యం వేదన, మాటలతో ఇబ్బంది, భరించలేని వేధింపులు ఎదురైనప్పుడు నరకంలో మగ్గుతున్నా అనే సందర్భంలో వారికి బయట వేరే వ్యక్తి నుంచి ఒక ఊరట లభిస్తే ఆ వ్యక్తిని వదిలిపెట్టరు. ఈ కొత్త బంధం ఒక రహస్యంగా మొదలవుతుంది. కానీ అది బాధితులకి ఒక ఆక్సిజన్ లాంటిది. అది కేవలం శారీరకమైన ఆకర్షణ కాకపోవచ్చు, ఒక భద్రమైన ఆశ్రయం కోసం తపన కావచ్చు. మను కాపాడుకునే ప్రయత్నంలో బాధితులు ఒక ప్రమాదకరమైన ఎత్తుగడ వేస్తారు. వారు ఒక బంధాన్ని తెంచుకోవడానికి మరొక బంధాన్ని ఆశ్రయిస్తారు. ఇది సరైన మార్గం కాకపోవచ్చు, కానీ తీవ్రమైన వేదనలో ఉన్నవారు కొన్నిసార్లు ఇలాంటి కఠినమైన నిర్ణయాలు తీసుకోక తప్పదు. ఇది కేవలం మోసం కాదు బ్రతకడానికి చేసే పోరాటం అని వాళ్లు చెబుతుంటారు.

కొత్తదనం
కొందరు వ్యక్తులు ఎల్లప్పుడూ శృంగార ప్రపంచంలో విహరిస్తూ ఉంటారు. ప్రతిదీ పరిపూర్ణంగా, శృంగారమయంగా ఉండాలని కోరుకుంటారు. ఆదర్శ ప్రేమ వంటి ఊహాజనిత భావనల్లో మునిగి తేలుతూ, తమ జీవితంలో ఉన్న నిజమైన,బలమైన బంధాన్ని కూడా విస్మరిస్తారు. తమతో ఉన్న భాగస్వామిని నిర్లక్ష్యం చేస్తారు. తాము ప్రేమ కోసమే మోసం చేశామని, దానిని అందరూ అర్థం చేసుకుంటారని ఆశిస్తారు. ఒక స్థిరమైన బంధంలో ప్రేమను పెంపొందించుకునే ప్రయత్నం చేయకుండా వారు నిరంతరం ప్రేమలో పడిపోతూ ఉంటారు.. అంటే కొత్త కొత్త వ్యక్తుల పట్ల క్షణికావేశంలో ఆకర్షితులవుతూ ఉంటారు. నిజమైన ప్రేమ అనేది కేవలం శృంగారం, బహుమతులు మాత్రమే కాదు.. అది ఒకరినొకరు అర్థం చేసుకోవడం, కష్టసుఖాల్లో తోడుండటం, ఒకరితో ఒకరు ఎదగడం.

కార్లు,డబ్బు
కొన్ని బంధాలు కేవలం పైపై మెరుపుల కోసం ఏర్పడతాయి. ఒకవైపు.. అందమైన స్త్రీలను తమ ప్రతిష్టకు చిహ్నంగా భావించే పురుషులు.. మరోవైపు, ఖరీదైన కార్లలో తిరిగే పురుషులను తమ భవిష్యత్తుకు భరోసాగా చూసే మహిళలు. వీరిద్దరూ మొదట్లోనే తప్పుడు పునాది వేసుకుంటారు. వారి దృష్టి ప్రేమ మీద కాకుండా కేవలం బాహ్య ఆకర్షణల మీద ఉంటుంది. ఇలాంటి సంబంధాలు ఎక్కువ కాలం నిలబడవు. ఎందుకంటే వారి లక్ష్యం ఒకరినొకరు అర్థం చేసుకోవడం కాదు తమ స్థాయిని పెంచుకోవడం.

తమ ప్రస్తుత బంధాన్ని ఒక మెట్టులా వాడుకుంటూ..దానిని దాటేసి ఉన్నత స్థానాలకు చేరుకోవాలని కలలు కంటారు. వారి కళ్లన్నీ ఆర్థికంగా, సామాజికంగా ఎదగడం మీదే ఉంటాయి. ఒకవేళ మీరు ఇలాంటి వ్యక్తితో డేటింగ్ చేస్తుంటే ఇది కేవలం ఒక తాత్కాలిక మజిలీ మాత్రమే. వారు తమ గమ్యాన్ని చేరుకునే క్రమంలో మిమ్మల్ని ఎప్పుడైనా వదిలించుకోవచ్చు.

మత్తులో క్షణికావేశంలో
కొంతమంది మత్తులో తమ బంధాలను మరిచిపోతారు. ఒకసారి పార్టీ మొదలైతే హద్దులు చెరిగిపోతాయి. సహోద్యోగులతో కలిసి పనిచేసే చోటైనా, లేదా ప్రకృతి ఒడిలో సాగే సాహస యాత్రలో అయినా లేదా మరేదైనా టూర్ లేదా పార్టీలో క్షణికమైన ఉత్సాహం కోసం తమ భాగస్వామికి ద్రోహం చేస్తారు. కొందరు పురుషులు దీన్ని తమ లైంగిక సామర్థ్యాన్ని నిరూపించుకునే ఆటగా భావిస్తారు. ఇక మహిళలైతే నేను బాగా తాగి ఉన్నాను అది ఎలా జరిగిందో నాకు తెలియదు అనే సాకులు చెప్పి తప్పించుకోవడానికి ప్రయత్నిస్తారు. కానీ నిజం ఏమిటంటే, ఆ క్షణికమైన థ్రిల్ కోసం వారు తమ బంధంలో నమ్మకాన్ని బలి చేస్తారు. మత్తు దిగిన తర్వాత, చేసిన తప్పు తెలుస్తుంది. కానీ అప్పటికే జరగాల్సిన నష్టం జరిగిపోతుంది. నమ్మకం అనే పునాది కదిలిపోతుంది.