భార్య చెబితే నో అంటారు..స్నేహితురాలు చెప్తే ఎగేసుకెళ్లారు..భర్తల వింత ప్రవర్తన వెనుక 5 రహస్యాలు

ఏమండీ కాస్త సరదాగా బయటకి వెళ్దామా అని భార్య అడిగితే ఇప్పుడేనా తర్వాత చూద్దాంలే అనే భర్త..అదే స్నేహితురాలు ఒక కాఫీ తాగుదామా? అనగానే క్షణం కూడా ఆలోచించకుండా వెంటనే వస్తున్నా అని అంటాడు. తనకు ఎంత అర్జెంట్ పని ఉన్నా దాన్ని వదిలేసి స్నేహితురాలు పిలిచిందని వెళ్లిపోతారు. చాలా ఇళ్లలో ఇది సర్వసాధారణంగా కనిపించే దృశ్యం. వైవాహిక జీవితంలో భార్య మాటను తేలికగా తీసుకునే భర్తలు..అదే స్నేహితురాలి చిన్న కోరికను కూడా ఆజ్ఞగా భావించి నెరవేర్చడానికి ఎందుకు ఉత్సాహం చూపిస్తుంటారో తెలుసా?

కొత్తలో వింత.. పాతలో రోత
ఏ బంధమైనా కొత్తగా ఉన్నప్పుడు దానిలో ఒక తెలియని ఆకర్షణ, ఉత్సాహం ఉంటాయి. స్నేహితురాలితో బంధం సరిగ్గా అలాంటిదే. ప్రతి మాట, ప్రతి కలయిక ఒక కొత్త అనుభూతిని పంచుతుంది. ఆ మాయలో ఆమెను నిరాశపరచకూడదనే తపనతో మగాళ్లు ఆమె చెప్పిన దేనికైనా యస్ అనేస్తారు. అదే భార్యతో ఏళ్ల తరబడి కలిసి జీవించడం వల్ల ఆ కొత్తదనం స్థానంలో ఒక రకమైన అలవాటు, దినచర్య వచ్చి చేరతాయి. బంధం బలపడినా, ఆరంభంలో ఉన్న ఆ ఉత్సాహం సాధారణమైపోతుంది. దీంతో ప్రతిదానికీ వెంటనే స్పందించాల్సిన అవసరం లేదనే భావన కలుగుతుంది.

ఆమె మెప్పు పొందాలనే తపన
మగాళ్లు తమ స్నేహితురాలి ముందు తమ ఇమేజ్‌ను కాపాడుకోవడానికి తీవ్రంగా ప్రయత్నిస్తారు. ఆమె దృష్టిలో తానొక హీరోలా కనిపించాలని, తన విలువ తగ్గకూడదని భావిస్తారు. అందుకే ఆమె కోరికను నిరాకరిస్తే ఎక్కడ ఆ బంధం దెబ్బతింటుందో, ఆమెకు తనపై అపనమ్మకం కలుగుతుందోనని భయపడతారు. అయితే వివాహ బంధం విషయంలో భర్తలకు ఆ భయం ఉండదు. పెళ్లి అనేది ఒక బలమైన పునాది అని, చిన్న చిన్న విషయాలకు అది కూలిపోదని వారికి తెలుసు. ఆ భద్రతా భావమే కొన్నిసార్లు భార్య మాటను తేలికగా తీసుకునేలా చేస్తుంది.

బాధ్యతల బరువు,ప్రేమ
స్నేహితురాలి కోరికలు చాలా సరళంగా, ఆనందాన్నిచ్చేవిగా ఉంటాయి. సినిమా, ఒక డిన్నర్ డేట్, గిఫ్ట్ వంటివి పురుషులకు ఒత్తిడిని తగ్గించి, ఆహ్లాదాన్ని పంచుతాయి. కానీ భార్య అంచనాలు అలా ఉండవు. ఇంటి బాధ్యతలు, పిల్లల భవిష్యత్తు, ఆర్థిక ప్రణాళికలు వంటి గంభీరమైన విషయాలతో ముడిపడి ఉంటాయి. దాంతో భర్తలకు స్నేహితురాలితో సంభాషణలు శృంగారభరితంగా అనిపిస్తే, భార్య సంభాషణలు బాధ్యతల బరువుగా తోచి వాటిని దాటవేయాలని చూస్తారు.

స్వేచ్ఛ అనే ప్రపంచం
స్నేహితురాలితో ఉన్నప్పుడు పురుషులు ఎలాంటి హద్దులు, బాధ్యతలు లేకుండా స్వేచ్ఛగా ఫీల్ అవుతారు. అక్కడ వారు కేవలం ఒక వ్యక్తిగా ఉంటారు. ఈ స్వేచ్ఛ వారికి మానసిక ఉపశమనాన్ని ఇస్తుంది. అదే వైవాహిక జీవితంలో కుటుంబం, బంధువులు, సమాజం వంటి అనేక కట్టుబాట్లు ఉంటాయి. ఈ బాధ్యతల వలయంలో ఉన్నప్పుడు భార్య చెప్పే ప్రతి మాటకు తల ఊపడం కష్టంగా భావిస్తారు.

అతి చనువు.. బంధానికి చేటు
భార్య ఎలాగూ అర్థం చేసుకుంటుందిలే..ఈరోజు కాకపోతే రేపు ఒప్పిస్తానులే అనే ధీమా వచ్చేస్తుంది. ఈ అతి చనువు, అతి విశ్వాసం వల్ల ఆమె కోరికలను వాయిదా వేసినా ఫర్వాలేదనుకుంటారు. కానీ స్నేహితురాలి విషయంలో అంత రిస్క్ తీసుకోవడానికి ఇష్టపడరు. బంధం ఇంకా సున్నితంగా ఉన్న దశలో చిన్న పొరపాటు కూడా దూరాన్ని పెంచుతుందని భయపడతారు. అందుకే వెంటనే ఆమె కోరికను నెరవేర్చడానికి సిద్ధపడతారు.