Bathukamma Festival 2021: తెలంగాణ బతుకమ్మ కథ గురించి ఆసక్తికరమైన విషయాలను తెలుసుకుందామా..

1) పౌరాణికం ఆధారంగా..

తెలంగాణ కథకు సంబంధించి రెండు కథలు ఉన్నాయి. ఒకటేమో పౌరాణికం ఆధారంగా, మరొకటి జానపదుల ఆధారంగా ఉన్నాయి. పౌరాణికంగా పరిశీలిస్తే పూర్వకాలంలో ధర్మాంగుడు అనే రాజు. ఆయనకు సత్యవతి అనే భార్య. ఈ దంపతులకు వంద మంది సంతానం ఉండేవారు. ఓసారి యుద్ధానికి వెళ్లి ఆ వందమంది మరణిస్తారు. ఒకేసారి ఆ వందమంది చనిపోయేసరికి ఆ తల్లిదండ్రులు ఎంతగానో బాధపడతారు. దీంతో వారి దగ్గర నగదు, నగలు, ధాన్యం ఇతర వాటిని అన్నింటిని మేమిద్దరిమే ఏమి చేసుకుంటాము అని, వాటినన్నింటినీ దానం చేసేస్తారు.

2) లక్ష్మీదేవి జననం..

ఆ తర్వాత వారు అడవి బాట పడతారు. దేవుడినే తలచుకుంటూ తపస్సు చేస్తుంటారు. వీరి సాధారణ జీవితాన్ని చూసి లక్ష్మీదేవి మెచ్చుకుంటుంది. వెంటనే వారి వద్దకు వెళ్లి మీ దగ్గర ఉన్నవాటినన్నింటినీ దానం చేసేశారు. మీకు ఏదైనా వరం కావాలా అని అడిగితే, మేము సంతానం లేకుండా వచ్చాం. కాబట్టి నువ్వే నా కడుపున పుడితే బాగుంటుందని సత్యవతి కోరుకుంటుందంట. ధర్మాంగరాజు సైతం అదే కోరుకుంటాడు. దీంతో వారి కోరిక నెరవేర్చేందుకు లక్ష్మీదేవి వారికి జన్మిస్తుంది.

3) బతుకమ్మ అనే పేరు..

అయితే ఆమెను చూడటానికి మునులు, సాధువులు అందరూ వచ్చి ఆ సమయంలో ఆ తల్లిని చూసి బతుకమ్మ అని పేరు పెడతారు. అందుకనే బతుకమ్మ అంటే లక్ష్మీ అని అంటుంటారు. లక్ష్మీ ఉన్న దగ్గర అష్టఐశ్వర్యాలు వస్తాయి కాబట్టి బతుకమ్మ పెరిగి పెద్దయ్యాక చిత్రాంగుడు అనే రాజు రూపంలో విష్ణువు వచ్చి లక్ష్మీదేవిని పెళ్లి చేసుకుంటాడు. అలా బతుకమ్మను పేర్చిన ఇంట సకల సౌభాగ్యాలు, సంతోషం, సిరి సంపదలతో ఏదైతే మనం ధర్మంగరాజు, సత్యవతికి ఎలా వచ్చాయో మనకు అలా తిరిగి వస్తాయని పౌరాణికం ఆధారంగా తెలుస్తోంది.

4) ఇక జానపదుల విషయానికొస్తే..

పూర్వం అన్నాచెల్లెలు ఉండేవారు. వారిద్దరికీ ఒకరంటే ఒకరు చాలా ఇష్టం. చిన్నప్పటి నుంచే వారికి మంచి ఆస్తిపాస్తులు ఉంటాయి. ఏ కష్టం తెలియకుండా పెరుగుతారు.వారిద్దరూ పెరిగి పెద్దయ్యాక వివాహం జరుగుతుంది. బతుకమ్మ (చెల్లెలు)కు పెళ్లి అయిన తర్వాత అత్తగారింటికి వెళ్తుంది. అక్కడ కూడా బతుకమ్మకు అంతా హాయిగా ఉంటుంది. కానీ ఒకరోజు చెల్లెలి వదిన బతుకమ్మపై పగ పెంచుకుంటుంది. తన భర్త తన కంటే బతుకమ్మ(చెల్లెలి)పై ఎక్కువగా ప్రేమ చూపిస్తుంటారు. దీంతో బతుకమ్మపై కోపం పెంచుకున్న ఆమె అన్నయ్య లేనప్పుడు బతుకమ్మను చంపి సమాధి చేస్తుంది.

5) తంగెడు పువ్వు రూపంలో..

తన చెల్లెలు చనిపోయిన విషయం తెలుసుకున్న అన్నయ్య తెగ బాధపడుతుంటాడు. దీంతో బతుకమ్మ ఆ అన్నయ్య నిద్ర పోతున్న సమయంలో కలలో ఆయనకు కనిపించి నా జీవితం అప్పుడూ పూర్తవ్వలేదు. నేను తంగెడు చెట్టు అయ్యి మళ్లీ పుట్టాను. తంగెడు పువ్వు రూపంలో తిరిగి వచ్చాను అని చెబుతుంది. వెంటనే ఆయన నిద్రలోంచి లేచి తను చెప్పిన స్థలానికి వెళ్లి చూస్తే అక్కడ తంగెడు పూలతో ఆ చెట్టు ఉంటుంది.

6) అమావాస్య తర్వాత..

దసరా నవరాత్రుల సమయంలో తొమ్మిదిరోజుల పాటు మహిళలందరూ అత్యంత భక్తి శ్రద్ధలతో జరుపుకుంటారు. మహాలయ అమావాస్య తర్వాత తెలంగాణ ఆడబిడ్డలంతా ఒక్కచోటకు చేరుకుంటారు. తొమ్మిదిరోజులకు గాను తొమ్మిది రకాల పూలతో పూజలు చేస్తారు. ఆ పూలల్లో మంచి ఔషధ గుణాలు సైతం ఉంటాయి.

7) బతకమ్మ పూలు - వాటి వల్ల ప్రయోజనాలు..

తంగెడు పువ్వు సూక్ష్మ జీవులను చంపుతుంది. చెరువులోని నీటిని శుద్ధి చేయడానికి ఉపయోగపడుతుంది.

గునుగు పువ్వు జీర్ణ కోశాన్ని శుద్ధి చేసే గుణం కలిగి ఉంటుంది.

సీత జడ పువ్వు జలుబు, ఆస్తమాను దూరం చేస్తుంది.

మందార పువ్వు చుండ్రు రాకుండా చేస్తుంది.

కట్ల పువ్వు తొడిమలు అజీర్ణం కాకుండా అరికడతాయి.

గుమ్మడి పువ్వులో ఏ-విటమిన్ పుష్కలంగా ఉంటుంది.

ఇలా బతుకమ్మ పండుగలో ఉపయోగించే రకరకాల పూలతో ఎన్నో ప్రయోజనాలు ఉన్నాయి.