Maha Shivratri 2022 Do's and don'ts:శివరాత్రి వేళ పొరపాటున కూడా ఈ పనులు చేయకండి...

ఉపవాసం ఉండాలి..

మహా శివరాత్రి రోజున ప్రతి ఒక్కరూ ఉదయాన్నే సూర్యోదయం కంటే ముందే నిద్ర లేవాలి. స్నానం చేసిన అనంతరం పూజా గదిని శుభ్రం చేసుకుని శివ ప్రతిష్ట చేయాలి. పార్వతీపరమేశ్వరుల కళ్యాణం చేసినా ఎంతో శ్రేష్టకరం. ఈ పవిత్రమైన రోజున తనను పూజిస్తే తన పుత్రుడైన కుమారస్వామి కన్నా ఇష్టులవుతాని సాక్షాత్తు ఆ శివుడే చెప్పాడంటే ఈరోజు ప్రత్యేకత ఏంటో తెలుసుకోవచ్చు. ఈ పండుగ సమయంలో అంటే చతుర్దశి నాడు కచ్చితంగా ఉపవాసం ఉండాలి.

శివనామ స్మరణ..

మహా శివరాత్రి రోజున పూజా విధానాన్ని శ్రీక్రిష్ణుడికి ఉపమన్యు మహర్షి వివరించాడు. ఈ పవిత్రమైన రోజున ఈశ్వరుడిని భక్తులు మూడు విధాలుగా పూజిస్తారు. వాటిలో ఒకటి శివపూజ, ఉపవాసం, జాగారణ. వీటిలో ఉపవాసానికి ఎంతో ప్రాధాన్యత ఉంది. ఈ పవిత్రమైన రోజున ఉపవాసం ఉంటూ శివనామ స్మరణ చేస్తే ఎంతో పుణ్యఫలం దక్కుతుందని పండితు చెబుతారు. ఉపవాసం ఉండటం వల్ల శారీరక శుద్ధి జరుగుతుందని, జాగారణ చేస్తూ ధ్యానం చేయడం వల్ల మనోశుద్ధి కలుగుతాయట.

చేయాల్సిన పనులు..

* మహా శివరాత్రి రోజున తప్పనిసరిగా శివాలయానికి వెళ్లాలి.

* ‘ఓం నమః శివాయ' అనే మంత్రాన్ని జపిస్తూ శివుడిని స్మరించుకోవాలి.

* శివునికి సమర్పించే నైవేద్యంలో పులిహోర ఉండేలా చూసుకోవాలి.

* శివ లింగానికి పంచామృతాన్ని సమర్పించాలి.

* మారేడు ఆకులతో ఇంట్లో, ఆలయంలో శివుడిని ఆరాధించాలి.

* ఈరోజున ఉపవాసం, జాగరణకు ఎంతో ప్రాముఖ్యత ఉంది.

* ఉపవాసం ఉండే వారు కేవలం పండ్లు, పాలు వంటి సాత్విక ఆహారమే తీసుకోవాలి.

* పురుషుడు శివుని యొక్క గర్భగుడికి వెళ్లే సమయంలో చొక్కాలకు బదులుగా కండువాలను ధరించాలి.

* శివలింగానికి కచ్చితంగా జలాభిషేకం చేయాలి.

* మహా శివరాత్రి రోజున పేదలకు అన్నదానం, ఇతరుల దాన ధర్మాలు చేయడం వల్ల శుభ ఫలితాలొస్తాయి.

* శివుడికి చందనం, విభూదిని పెడితే సరిపోతుంది.

* నాగమల్లి పువ్వులంటే శివుడికి ఎంతగానో ఇష్టం. ఈ పువ్వులతో శివరాత్రి రోజున పూజ చేస్తే.. శివుని అనుగ్రహం దక్కుతుంది.

చేయకూడని పనులు..

* మహా శివరాత్రి వేళ శివలింగానికి తులసి ఆకులను ఎప్పటికీ సమర్పించకూడదు.

* మహా శివరాత్రి పండుగ రోజున శివ లింగానికి ప్యాకెట్ పాలు సమర్పించకూడదని గుర్తుంచుకోవాలి. ఆవు పాలు మాత్రమే శ్రేష్టమైనవని గుర్తుంచుకోవాలి.

* శివ లింగానికి అభిషేకం సమయంలో ఉపయోగించే పాల ప్యాకెట్లను నోటితో తెంచి ఆ పాలను అభిషేకం చేయరాదు.

* శివలింగానికి అభిషేకం సమయంలో స్త్రీలు శివలింగాన్ని తాకరాదు.

* అభిషేకం సమయంలో మన శరీరం నుండి వచ్చే చెమట గాని వెంట్రుకలు గాని శివలింగంపై పడకూడదు.

* మహా శివరాత్రి రోజున కలయికలో పాల్గొనకూడదు.

* మహా శివరాత్రి రోజున మద్యం, మాంసం తినకూడదు.