Papmochani Ekadashi 2023: పాపమోచని ఏకాదశి రోజు ఇలా చేస్తే సకల సౌభాగ్యాలు కలుగుతాయి

పాపాల నుండి విముక్తి లభించే రోజుగా పాపమోచని ఏకాదశికి విశిష్టత ఉంది. హిందూ పంచాంగం ప్రకారం చైత్ర మాసం కృష్ణ పక్షంలోని ఏకాదశి నాడు పాపమోచని ఏకాదశిని జరుపుకుంటారు. ఈ ఏకాదశికి విశేష ప్రాధాన్యత ఉంది.

ఈ ఏడాది పాప విమోచని ఏకాదశి ఏ రోజున వచ్చింది, శుభ ముహూర్తం ఎప్పుడు, పాపమోచని ఏకాదశి ఉపవాసం ఏరోజు ఉండాలి, ఈ ఏకాదశి రోజు ఏ దేవుని ఆరాధన చేయాలి, ఎలా పూజిస్తే పాపాలన్నీ తొలగిపోతాయో ఇప్పుడు తెలుసుకుందాం.

పాపమోచని ఏకాదశి శుభముహూర్తం:

• పాపమోచని ఏకాదశి తేదీ: మార్చి 18వ తేదీన వస్తోంది
• పాపమోచని ఏకాదశి తిథి ప్రారంభం: మార్చి 17, 2023 మధ్యాహ్నం 02.06 నుండి
• పాపమోచని ఏకాదశి తిథి ముగింపు: మార్చి 18, 2023 ఉదయం 11.13 వరకు
• ఉపవాస సమయం: మార్చి 19, 2023 ఉదయం 06.25 నుండి 08.07 వరకు

పాపమోచని ఏకాదశి ప్రాముఖ్యత:

పాపమోచని ఏకాదశి చాలా ప్రభావవంతమైనదని పండితులు చెబుతుంటారు. ఈ రోజున ఉపవాసం ఉంటూ.. శ్రీ మహా విష్ణువు ఆరాధిస్తే మీ పాపాలన్నీ తొలగిపోతాయని శ్రీకృష్ణుడు అర్జునుడికి చెప్పాడని నమ్ముతారు. ఈ రోజున నిజమైన మనసుతో ఉపవాసం ఉండటంతో పాటు విష్ణువును పూర్తి ఆచారాలతో ఆరాధించడం ద్వారా, మోక్షాన్ని పొందుతారు.

పూజా విధానం:

పాప మోచని ఏకాదశి రోజున సూర్యోదయానికి ముందే నిద్ర లేచి స్నానం చేయాలి. ఈ పవిత్రమైన రోజున శ్రీ మహా విష్ణువు ఆలయానికి వెళ్లి ఆరాధించాలి. స్వామి వారికి ఈ రోజు పసుపు రంగు దుస్తులను అర్పించాలి. 11 పసుపు పువ్వులు, 11 రకాల స్వీట్లను దేవునికి అర్పించాలి. శ్రీ మహా విష్ణువుకు పసుపు గంధపు చెక్కకు పసుపు రంగు పూసి పూజించాలి. అనంతరం విష్ణు మంత్రాలు జపించాలి.

పాపమోచని వ్రత కథ:

ఒక అడవిలో ఓ రుషి పరమేశ్వరుడి కోసం తపస్సు ప్రారంభిస్తాడు. తపస్సులో మునిగిపోయిన ఆ రుషిని అప్సరస లాంటి ఓ యువతి భంగం కలిగిస్తుంది. కళ్లు తెరిచి చూసే సరికి అందాల కుందనపు బొమ్మలా ఉన్న ఆ యువతిని చూసి ఆ రుషి మనసు చలించిపోతుంది. తనను మోహిస్తాడు. తనతో ప్రేమలో పడతాడు.

అలా కొన్ని సంవత్సరాల పాటు రతీ క్రీడల్లో మునిగిపోతాడు ఆ రుషి. కొంత కాలం తర్వాత ఒకానొక రోజు ఆ యువతి తన గురించి చెబుతూ తనను ఇంద్రుడు పంపించాడని, అనుమతిస్తే తిరిగి స్వర్గలోకానికి వెళ్లిపోతానని వేడుకుంటుంది.

తన మాటలు విన్న ఆ రుషి కోపోద్రిక్తుడు అవుతాడు. ఆ యువతి వల్లే తన తపస్సు చెడిపోయిందని ఆవేశంలో యువతిని శపిస్తాడు. ఏ అందంతో తన దృష్టి మరల్చిందో ఆ అందం పోయి పిశాచిలా మారిపోవాలి శపిస్తాడు.

అప్పుడు ఆ యువతి రుషి కాళ్లపై పడి తనను క్షమించమని వేడుకుంటుంది. తన పాపాన్ని తొలగించమని కోరుతుంది. అప్పుడు ఆ రుషి పాపమోచన ఏకాదశి రోజు విష్ణు ఆరాధన చేసి ఉపవాసం ఉండాలని, అలా చేస్తే పాపం తొలగిపోతుందని చెబుతాడు.

రుచి చెప్పినట్లుగానే చేసిన ఆ యువతి తిరిగి తన సాధారణ రుపానికి వచ్చి స్వర్గానికి వెళ్లిపోతుంది.