Phalguna Amavasya 2022:ఫాల్గుణ అమావాస్య రోజున పొరపాటున కూడా ఈ పనులు చేయకండి...

శుభ ముహుర్తం..

హిందూ క్యాలెండర్ ప్రకారం, ఫాల్గుణ మాసంలోని క్రిష్ణ పక్షం యొక్క అమావాస్య మార్చి 1వ తేదీన మధ్యాహ్నం 1 గంటకు ప్రారంభమవుతుంది. మార్చి 2వ తేదీ రాత్రి 1:04 గంటల వరకు కొనసాగుతుంది. అందుకే మార్చి 2న ఫాల్గుణ అమావాస్య జరుపుకోనున్నారు. ఈరోజున ప్రత్యేక శివయోగం మరియు సిద్ధయోగం ఏర్పడనున్నాయి. అమావాస్య రోజున ఉదయం 8:21 గంటల వరకు శివయోగం ఉంటుంది. ఆ తర్వాత సిద్ధ యోగం ప్రారంభమవుతుంది. ఇది మరుసటి రోజు అంటే మార్చి 3వ తేదీన గురువారం ఉదయం 5:43 గంటలకు ముగుస్తుంది.

ఫాల్గుణ అమావాస్య ప్రాముఖ్యత..

ఫాల్గుణ అమావాస్య రోజున దేశవ్యాప్తంగా అనేక ప్రాంతాల్లోని దేవాలయాల్లో ప్రత్యేక పూజలు జరుగుతాయి. భక్తులందరూ ఉదయాన్నే నిద్ర లేచి పవిత్ర నదులలో స్నానం చేస్తారు. ఈ పవిత్రమైన రోజున స్నానమాచరించి దానధర్మాలు చేయాలి. ఈరోజున ఉపవాసం ఉంటూ పూజలు చేస్తే పూర్వీకుల మోక్షాన్ని పొందుతారని నమ్ముతారు.

చేయకూడనివి..

* ఈ ఫాల్గుణ అమావాస్య రోజున పగటిపూట పొరపాటున కూడా నిద్రపోకూడదు.

* ఈరోజున వెల్లుల్లి, ఉల్లి, మాంసం, ఆల్కహాల్ వంటివి తీసుకోకూడదు.

* ఈరోజున నలుపు రంగు దుస్తులను ధరించరాదు. అలాగే శుభ్రమైన బట్టలు ధరించాలి.

* ఈరోజున కచ్చితంగా బ్రహ్మచార్యాన్ని పాటించాలి. కలయికలో పాల్గొనకూడదు.

* ఈరోజున కోపంగా ఉండకూడదు. కోపాన్ని నియంత్రించుకోవాలి. వీలైనంత ఎక్కువ సమయం ప్రశాంతంగా ఉండాలి.

చేయాల్సినవి..

* ఫాల్గుణ అమావాస్య రోజున సూర్యోదయానికి ముందే నిద్ర లేవాలి.

* ఈ రోజున ఉపవాసం ఉంటూ పరమ శివుడిని ఆరాధించాలని పండితులు చెబుతారు.

* ఈ పవిత్రమైన రోజున సాత్విక ఆహారం మాత్రమే తీసుకోవాలి.

* ఈరోజున కచ్చితంగా ఉపవాసం ఉండాలి.

* ముఖ్యంగా సాయంత్రం వేళ ఇంట్లో దీపాలను వెలిగించాలి.

* పేదలకు వస్త్రాలను దానం చేయాలి. అలాగే ఈరోజున పూర్వీకులకు తర్పణం చేయాలి.

* ఈరోజున పూర్వీకులను సంత్రుప్తి పరిస్తే.. మీరు అనుకున్న కార్యాలు దిగ్విజయంగా పూర్తవుతాయి. అంతేకాదు ఆర్థిక బాధలు కూడా తొలగిపోతాయి.