Ramadan 2022:రంజాన్ వేళ నెలవంక దర్శనమెప్పుడు.. ఉపవాసం వల్ల కలిగే లాభాలేంటో తెలుసా...

నెలవంక దర్శనమెప్పుడు..

2022 సంవత్సరంలో ఏప్రిల్ 2వ తేదీన చందమామ దర్శనం కలిగే అవకాశం ఉందని అందరూ అంచనా వేస్తున్నారు. అయితే ఈ నెలవంక భారతదేశం కంటే ముందుగానే గల్ఫ్ దేశాల్లో దర్శనమివ్వనున్నాడు. అక్కడ చంద్రుని దర్శనం జరిగిన 24 గంటల తర్వాతే మన దేశంలో కూడా రంజాన్ మాసం ప్రారంభం కావడమనేది ఆనవాయితీగా వస్తోంది.

ఉపవాస దీక్షలు..

రంజాన్ మాసం సందర్భంగా ప్రపంచంలోని ముస్లిలందరూ ప్రత్యేక ప్రార్థనలు చేయడంతో పాటు ఉపవాసాలు కూడా ఉంటారు. పవిత్ర ఖురాన్ అవతరించిన మాసం కావడంతో దాన ధర్మాలకు అధిక ప్రాధాన్యత ఇస్తారు. పేదల ఆకలి బాధలను స్వయంగా అనుభవించడం వల్ల వారు పడుతున్న కష్టాల గురించి తెలుసుకునేందుకు, అల్లాహ్ అనుగ్రహం పొందేందుకు ముస్లిలందరూ ఉపవాస దీక్షలు చేపడతారు.

ప్రత్యేక ప్రార్థనలు..

మనం జరుపుకునే ప్రతి పండుగ వెనుక ఏదో ఒక ప్రత్యేకత ఉంటుంది. ముస్లింలకు ఎంతో పవిత్రమైన రంజాన్ పండుగ వేళ శారీరక, మానసిక వికాసంతో పాటు ఇంకా ఎన్నో ప్రయోజనాలు కలుగుతాయి. చరిత్రలో తమకంటూ ప్రత్యేక స్థానం సంపాదించుకున్న వారిని స్మరించుకోవడానికి, చెడుపై మంచి గెలిచిందన్న సందర్భంగా ఈ పండుగను జరుపుకోవడం ఆనవాయితీగా వస్తోంది.

నెలవంక దర్శనంతో..

రంజాన్ మాసం చంద్రుని దర్శనంతోనే ప్రారంభమవుతుంది. ముస్లింలు ఎంతో పవిత్రంగా భావించే ఖురాన్ ఈ నెలలోనే పుట్టిందని వారు నమ్ముతారు. అందుకే ఈ పండుగ ముస్లింలకు చాలా ప్రత్యేకమైనది. ఖురాన్ ప్రకారం.. ముస్లింలు నెల రోజుల పాటు సుమారు 13 గంటల పాటు నిష్టగా ఉపవాసం ఉంటారు. సూర్యోదయం నుండి ఉపవాసం ప్రారంభమై సూర్యాస్తమయానికి పూర్తవుతుంది.

ఉపవాస దీక్ష ఫలం..

ఉపవాసం ఉండే వారు రంజాన్ మాసంలో చాలా నిష్టగా ఉంటారు. అబద్ధాలు అస్సలు చెప్పకూడదు. చెడు మాట్లాడకూడదు.. చెడు వినకూడదు.. అల్లాహ్ ని మాత్రమే స్మరించుకోవాలి. అదే విధంగా ఉపవాసం చేస్తే పుణ్యం వస్తుందనుకుంటే.. పొరబడినట్టే. మనసు, శరీరం రెండింటినీ సరైన మార్గంలో మళ్లించుకుంటేనే ఉపవాస దీక్షా ఫలం దక్కుతుంది.