Somvati Amavasya 2023: సోమవతి అమావాస్య తేదీ, శుభ ముహూర్తం, ప్రాముఖ్యతం ఏంటో తెలుసా?

సోమవతి అమావాస్య శుభసమయం:

సోమవతి అమావాస్య ఫిబ్రవరి 20న ఉదయం 11.40 నిమిషాలకు ప్రారంభమవుతుంది. ఫిబ్రవరి 21న ఉదయం 6.55 గంటలకు ముగుస్తుంది.

సోమవతి అమావాస్య ప్రాముఖ్యత:

శివుడు అభిషేక ప్రియుడు. గుక్కెడు నీళ్లు నెత్తిన పోసినా మహదానందభరితుడు అవుతాడు. శక్తి మేర మనస్సు పెట్టి పూజిస్తే బోలా శంకరుడు ప్రసన్నమవుతాడని అంటారు. సోమవారం పరమేశ్వరుడికి అత్యంత ప్రీతికరమైనది. అందులోని సోమవారం వచ్చే అమావాస్య అంటే శివుడికి చాలా ఇష్టం. అందుకే సోమవతి అమావాస్య రోజు శివారాధన చేస్తారు. శివాలయాలకు వెళ్లి పరమేశ్వరుడిని కొలుస్తారు. ఇలా చేస్తే అనారోగ్య సమస్యలు తొలగిపోతాయని, ధన వస్తు, వాహనాదులు సమకూరుతాయని, కుటుంబంలో ఐశ్వర్యం వెల్లివిరుస్తుందని శాస్త్రాలు చెబుతున్నాయి.

సోమవతి రోజు చేయాల్సిన పనులు:

* సోమవతి అమావాస్య రోజు రావి చెట్టుకు ప్రత్యేక పూజలు చేయాలి. పసుపు దారాన్ని 108 చుట్లు చుట్టాలి.

* సోమవతి అమావాస్య రోజున పూర్వీకులను స్మరించుకోవాలి.

* పేదలకు, నిరాశ్రయులకు వస్త్రాలు, నువ్వులు దానం చేయాలి.

* సోమవతి రోజున రావి మొక్క నాటాలి.

సోమవతి అమావాస్య పూజా విధానం:

సోమవతి అమావాస్య వంటి పవిత్రమైన రోజున తెల్లవారుజామునే నిద్ర లేవాలి. సూర్యోదయం కంటే ముందే స్నానం పూర్తి చేయాలి. పూజకు ఉపక్రమించే ముందు చేతిలో కొన్ని నీళ్లు తీసుకుని సూర్యుడికి సమర్పించాలి. అనంతరం పూజాది కార్యక్రమాలు ప్రారంభించాలి. గణేషుడితో ప్రారంభించి పరమేశ్వరుడిని పూజించాలి. సోమవతి అమావాస్య రోజు పార్వతీ పరమేశ్వరులను పూజిస్తే సకల సౌభాగ్యాలు కలుగుతాయని శాస్త్రాలు చెబుతున్నాయి.

ఈ రోజు వివాహిత మహిళలు రావి చెట్టును పూజించాలి. రావి చెట్టు చుట్టూ ప్రదక్షిణలు చేయాలి. పసుపు దారాన్ని రావి చెట్టుకు 108 చుట్లు చుట్టాలి.

సోమవతి అమావాస్య రోజు వివాహిత స్త్రీలు ఉపవాసం ఉంటే భర్త ఆయురారోగ్యాలతో జీవిస్తాడని పురాణాలు చెబుతున్నాయి.

ఈ రోజు పూర్వీకులు స్మరించుకోవడం వల్ల వారి ఆశీర్వాదాలు అందుతాయి. అలాగే సోమవతి అమావాస్య రోజు నిరుపేదలకు వస్త్రాలు, నువ్వులు, ధనం దానం చేస్తే మంచి జరుగుతుంది. దక్షిణ దిశలో తర్పణం వదిలితే కుటుంబసభ్యులందరూ జీవితం సాఫీగా సాగుతుందని శాస్త్రాలు చెబుతున్నాయి.

ఈ రోజు మూగజీవాలకు ఆహారం అందిస్తే ఉత్తరోత్తర జన్మల్లో ఆకలి దప్పికలతో బాధపడరని అంటారు. పరమేశ్వరుడు జీవరాశుల యందు ఉంటాడని పురాణాలు చెబుతున్నాయి. ఈ రోజు ఏ జీవికి మేలు చేసినా అది పరమేశ్వరుడికి చేసిన ఫలితమే ఇస్తుంది.