మంత్రాల చివర్లో వచ్చే.. స్వాహా, నమః వెనుక ఉన్న అసలు రహస్యం ఇదే!

ఏదైనా హోమం లేదా యాగం జరుగుతున్నప్పుడు లేదా గుడిలో పూజారి గారు మంత్రం చదువుతున్నప్పుడు చివర్లో స్వాహా అనో, నమః అనో అనడం మనం రోజూ వింటూనే ఉంటాం. అయితే ఈ పదాలు కేవలం మంత్రానికి ముగింపు మాత్రమే అని మీరు అనుకుంటే పొరబడినట్లే. ప్రాచీన ఋషుల ప్రగాఢ విశ్వాసం ప్రకారం, మంత్రంలోని అసలైన శక్తే ఈ చివరి పదాల్లో దాగి ఉంది. ఈ అద్భుతమైన రహస్యాన్ని ఒక్కసారి తెలుసుకుంటే, మీరు మళ్లీ ఎప్పుడూ ఏ మంత్రాన్నీ మునుపటిలా సాధారణంగా వినలేరు.

మంత్రం అంటే పదాల కూర్పు కాదు

మీరు ఒక బాణాన్ని వదలడానికి వింటినారిని ఎంత బలంగా వెనక్కి లాగుతారో, మంత్రం జపించే కొద్దీ మీలో అంతటి ఏకాగ్రత, సంకల్పం, ఆధ్యాత్మిక శక్తి పోగుపడుతుంది. అయితే వింటినారిని వదిలేస్తేనే కదా బాణం లక్ష్యాన్ని చేరుకునేది. మంత్రంలో కూడా ఆ శక్తిని విడుదల చేసే అస్త్రమే ఈ చివరి పదం. ఈ ముగింపు ధ్వని పలకనంత వరకు జపం ద్వారా పుట్టిన శక్తి అసంపూర్ణంగానే ఉండిపోతుంది.

ముగింపు పదం.. శక్తికి దిశానిర్దేశం

వేద పండితులు మంత్రం చివర వచ్చే పదాన్ని మంత్ర ఇతి అంటారు. అంటే మంత్ర పరిపూర్ణత. మంత్ర జపం ద్వారా పుట్టిన శక్తి ఏ దిశగా వెళ్లాలి? ఏ ఉద్దేశం కోసం పనిచేయాలి? అనేది ఈ ముగింపు పదమే నిర్ణయిస్తుంది.

స్వాహా (సంపూర్ణ సమర్పణ)

హోమాలు, యజ్ఞాలు చేసేటప్పుడు స్వాహా అంటాం. స్వాహా అంటే దైవానికి సంపూర్ణంగా మనల్ని మనం సమర్పించుకోవడం. పవిత్రమైన అగ్ని ద్వారా మన ప్రార్థనలు, నైవేద్యాలు నేరుగా ఆ దేవతలకు చేరడానికి స్వాహా ఒక ఆధ్యాత్మిక వారధిలా పనిచేస్తుంది. దైవానికి, మనిషి భక్తికి మధ్య ఇదొక వారధి.

హుం, ఫట్ (అనంతమైన శక్తి, రక్షణ)

ఈ పదాలు ఉగ్ర దేవతల మంత్రాల్లో, తాంత్రిక విద్యల్లో ఎక్కువగా కనిపిస్తాయి. ఇవి చెడును నాశనం చేసే శక్తివంతమైన శబ్దాలు. మన చుట్టూ ఒక అభేద్యమైన రక్షణ కవచాన్ని ఏర్పరచి, ప్రతికూల శక్తులను పారద్రోలడంలో హుం, ఫట్ అనే ప్రకంపనలు బ్రహ్మాస్త్రంలా పనిచేస్తాయి.

నమః (అహాన్ని వీడటం)

హిందూ పూజా విధానంలో అత్యంత విరివిగా వాడే పదం నమః. ఉదాహరణకు "ఓం నమః శివాయ" అన్నప్పుడు కేవలం శివుడికి దండం పెడుతున్నట్లు కాదు. నాలో ఉన్న అహకారాన్ని చంపుకుని, ఉన్నతమైన సత్యం ముందు వినయంతో శరణాగతి పొందుతున్నాను అని దీని లోతైన అర్థం. ఆధ్యాత్మిక ఎదుగుదల ఈ శరణాగతితోనే మొదలవుతుంది.

ఋషుల నాద విజ్ఞానం

మన ప్రాచీన ఋషులు ఈ శబ్దాలను ఏదో గుడ్డిగా ఎంచుకోలేదు. శబ్దానికి, మనిషి నాడీ వ్యవస్థకు ఉన్న సంబంధాన్ని వాళ్లు వేల ఏళ్ల క్రితమే కనిపెట్టారు. ఏ ఫ్రీక్వెన్సీలో శబ్దం చేస్తే మనస్సు భక్తివైపు మళ్లుతుందో, ఏ శబ్దం చేస్తే ధైర్యం, రక్షణ కలుగుతుందో నిశితంగా పరిశీలించి మరీ ఈ ముగింపులను రూపొందించారు.