Just In
- 1 hr ago భర్త రతి మన్మధుడు అయితే ?, కెవ్వుకేక, తాత ముత్తాతల ఆచారం అదుర్స్
- 2 hrs ago ఈ 4 రాశుల వారు తమ కలలను విజయాలుగా మార్చుకునే అదృష్టం మరియు సామర్ధ్యం కలిగి ఉంటారు!
- 6 hrs ago Lakshmi Narayana Yoga:లక్ష్మీ నారాయణ యోగం: ఏప్రిల్ నెలలో ఈ 3 రాశుల వారికి ధనవృద్ధి..!
- 8 hrs ago తెలంగాణతో సహా దక్షిణ భారతదేశంలో బ్రెస్ట్ క్యాన్సర్ మరణాలు ఎక్కువ!లక్షణాలు, కారణాలు, చికిత్స ఇలా..!
Ugadi 2023:ఉగాది రోజున ఈ ఆచారాలను ఎందుకు పాటించాలంటే?
2023లో ఉగాది పండుగ ఆచారాలు, సంప్రదాయాల గురించి ఇప్పుడు తెలుసుకుందాం.
సాధారణంగా కొత్త సంవత్సరం అంటే జనవరి ఒకటో తేదీ అంటారు. అయితే తెలుగు వారికి మాత్రం కొత్త సంవత్సరం అంటే గుర్తొచ్చేది ఉగాది పండుగ. హిందూ క్యాలెండర్ ప్రకారం, ప్రతి ఏటా ఛైత్ర మాసంలో కొత్త ఏడాది ప్రారంభమవుతుంది. ఈ పండుగను తెలుగు రాష్ట్రాలతో పాటు కర్నాటక, మహారాష్ట్ర, తమిళనాడు, కేరళ ఇతర రాష్ట్రాల్లో ఘనంగా జరుపుకుంటారు.
ప్రతి సంవత్సరం ఛైత్ర శుద్ధ మాసంలో పాడ్యమి నాడు వచ్చే ఈ పర్వదినానికి ఎంతో ప్రాముఖ్యత ఉంది. 2023 ఏడాదిలో మార్చి 22వ తేదీన బుధవారం రోజున ఈ పండుగ వచ్చింది.
ఈరోజునే జ్యోతిష్యశాస్త్రం ప్రకారం తమ రాశి చక్రాల జాతకలు, గ్రహాల స్థితిని అంచనా వేస్తారు. తమ జాతకంలో ఏవైనా దోషాలుంటే వాటి శాంతి కోసం కొన్ని పరిహారాలు పాటించడం, నివారణలు పాటించడం వంటివి చేస్తారు.
మరికొన్ని రోజుల్లో మనం 'శుభకృతు' నామ సంవత్సరానికి ముగింపు పలికి 'శోభకృత్' నామ సంవత్సరానికి స్వాగతం పలుకుతున్న సందర్భంగా ఉగాది పండుగ ఆచారాలు, తెలుగువారి వేడుకల సంప్రదాయాల గురించి కొన్ని ఆసక్తికరమైన విషయాలను ఇప్పుడు తెలుసుకుందాం...
పాడ్యమి రోజునే..
పురాణాల ప్రకారం.. బ్రహ్మదేవుడు ఈ అనంతమైన లోకాన్ని ఉగాది రోజున అంటే ఛైత్రమాసంలోని శుక్ల పక్షంలో పాడ్యమి రోజున సృష్టించాడని శాస్త్రాల ద్వారా తెలుస్తోంది. ఈ పవిత్రమైన రోజు నుండే భూలోకం ప్రారంభమైందని శాస్త్రాలలో ఉన్నట్లు పండితులు చెబుతున్నారు.
కొత్త జీవితానికి నాంది..
ఛైత్ర మాసంలో శుక్ల పక్షం రోజున పాడ్యమి రోజున వసంత రుతువు కూడా ప్రారంభమవుతుంది. అందుకే ఈరోజున కొత్త జీవితానికి నాందిగా భావిస్తూ వేడుకలు జరుపుకుంటారు. పురాణాల ప్రకారం.. వేదాలను హరించిన సోమకుడిని శ్రీ విష్ణుమూర్తి మత్స్యావతారంలో వచ్చి తనను సంహరిస్తాడు. అదే సమయంలో వేదాలను బ్రహ్మదేవుడికి అప్పజెబుతాడు. ఈ సందర్భంగా ఉగాది పండుగను జరుపుకుంటారని పండితులు చెబుతారు.
ఉగాది అంటే..
చరిత్రను పరిశీలిస్తే.. శాలివాహన చక్రవర్తి ఛైత్ర శుక్ల పాడ్యమి రోజునే పట్టాభిషిక్తుడయ్యాని.. ఈరోజునే ఉగాదిని జరుపుకోవడం సంప్రదాయంగా వచ్చిందని కూడా చెబుతారు. ‘ఉగ' అంటే నక్షత్ర గమనం.. జన్మ ఆయుష్షు అనే అర్థాలొస్తాయి. అలాగే యుగం అంటే ద్వయం లేదా జంట అని అర్థం. ఉత్తరాయణ, దక్షిణాయణ ద్వయ సంయుతాన్ని యుగం అంటారు. ఈ యుగానికి ఆది యుగాదిగా మారిందని.. ఉగాది శబ్దానికి ప్రతిరూపంగానే ఈ ఉగాది వచ్చిందని పెద్దలు చెబుతంటారు.ఉగాది పండుగ రోజు నుంచే వసంత రుతువు కూడా ప్రారంభమవుతుంది.
తోరణాలు కట్టడం వల్ల..
ఉగాది పండుగ రోజున గుమ్మానికి కట్టే తోరణాల వల్ల క్రిములు ఇంట్లోకి రాకుండా అడ్డుకుంటాయట. ఇవి శ్రీరామ నవమి వరకు పరిశుభ్రంగా ఉండటం వల్ల ఎలాంటి వ్యాధులు వచ్చే అవకాశం ఉండదు.
షడ్రుచుల అర్థాలివే..
1) బెల్లం తియ్యదనానికి.. సంతోషానికి ప్రతీకగా భావిస్తారు.
2) వేప పువ్వు చేదుతనానికి అంటే బాధలు, దుఃఖాన్ని గుర్తు చేస్తుంది.
3) పులుపు వంటి రుచులు మనం ఓర్పుగా ఉండాల్సిన పరిస్థితులను సూచిస్తుంది.
4) ఉప్పు మన జీవితంలో జరిగే ఉత్సాహం, రుచికి సంకేతంగా భావిస్తారు.
5) పచ్చి మామిడి ముక్కలు వగరు అంటే కొత్త సవాళ్లను స్వీకరించడానికి సిద్ధంగా ఉండాలని సూచిస్తుంది.
6) కారం అంటే మనం సహనం కోల్పోయే లేదా కోపం పడే పరిస్థితులను సూచిస్తుంది.
తొమ్మిదిరోజుల పాటు..
ఉగాది నుంచి శ్రీరామ నవమి వరకు కొందరు శ్రీరాముడిని, సీతాదేవికి ప్రత్యేక పూజలు చేస్తారు. ఈ నవమి రోజుల్లో అంటే తొమ్మిది రోజుల పాటు ఇళ్లను ఎంతో పరిశుభ్రంగా ఉంచుకుంటారు. అలాగే తమను తాము శుభ్రంగా ఉంచుకుని.. దేవుడికి నైవేద్యంగా సమర్పించే మంచి పోషకాహారమే తింటుంటారు. దీంతో ఆరోగ్యానికి ఎన్నో మంచి ప్రయోజనాలు దక్కుతాయని చాలా మంది నమ్ముతారు. ఇక ఉగాది పచ్చడిని తీసుకోవడం వల్ల బాడీలోని టాక్సిన్లు, క్రిములు నశిస్తాయి.