How To Do CPR: సీపీఆర్ అంటే ఏంటి? గుండెపోటుకు గురైన వ్యక్తికి CPR చేస్తే ఉపయోగం ఉంటుందా?

సీపీఆర్ ఎలాంటి వారికి అవసరం?

కార్డియాక్ అరెస్టు అయిన వారందరికీ సీపీఆర్ తప్పకుండా అవసరమని వైద్య నిపుణులు చెబుతున్నారు. సాధారణంగా రెండు సందర్భాల్లో గుండె కొట్టుకోవడం ఆగిపోతుంది.

• గుండె కొట్టుకోవడం తగ్గిపోతుంది. గుండె కొట్టుకోకపోవడం వల్ల రక్త సరఫరా సాఫీగా సాగదు. ఇలాంటి సమయంలో సీపీఆర్(కార్డియోపల్మనరీ రీససిటేషన్) చేస్తే ఫలితం ఉంటుంది. అలాంటి వారిని బతికించే అవకాశాలు చాలా ఎక్కువ.
• గుండె వేగంగా కొట్టుకుంటుంది. మామూలు పరిస్థితిలో గుండె 50 నుండి 80 సార్లు కొట్టుకుంటుంది. ఈ సమయంలో మాత్రం గుండె 200 కంటే ఎక్కువ సార్లు కొట్టుకుంటుంది. విపరీత వేగంతో గుండె కొట్టుకోవడం వల్ల పనితీరు దెబ్బతిని ఒక్కసారిగా ఆగిపోతుంది. ఇలాంటి సమయంలో సీపీఆర్ చేసి తిరిగి గుండె కొట్టుకునేలా చేయవచ్చని వైద్య నిపుణులు చెబుతున్నారు.



సీపీఆర్ ఎలా చేయాలి?

• గట్టిగా అరుస్తూ పిలిచి లేపే ప్రయత్నం చేయాలి.
• అంబులెన్స్ కు సమాచారం అందించాలి.
• శ్వాస ఆడుతుందో లేదో తనిఖీ చేయాలి.
• గుండెపోటుకు గురైన వ్యక్తిని వీపుపై పడుకోబెట్టాలి.

పెద్ద వారికి:

• వ్యక్తి ఛాతీపై చేతులను ఉంచాలి. ఛాతీకి మధ్యలో ఒక చేతి మడమను ఉంచాలి. తర్వాత అదే చేతిపై మరో చేతిని ఉంచి బరువు పెట్టాలి.
• రెండు చేతులతో ఛాతీని బలంగా ప్రెస్ చేయాలి. సెకనుకు రెండుసార్లు కనీసం 20 సెకన్ల పాటు ప్రెస్ చేస్తుండాలి.
• తర్వాత నోటి ద్వారా శ్వాసను అందించడానికి ప్రయత్నించాలి. నోటి గదవను పైకి లేపి నేరుగా ఉన్నప్పుడు నోటి ద్వారా శ్వాస అందించాలి.
• ఇదే ప్రక్రియను శ్వాస ఆడేవరకు, గుండెకొట్టుకునే వరకు చేస్తూ ఉండాలి.

పిల్లలకు:

• పిల్లలకు చేసే సీపీఆర్ కూడా పెద్దలకు చేసే మాదిరిగానే ఉంటుంది.
• 8 ఏళ్ల పిల్లలు అయితే రెండు చేతులతో, చిన్న పిల్లలైతే ఒక చేతితో ఛాతీపై ప్రెస్ చేయాలి.
• మరీ బలంగా ఛాతీని ప్రెస్ చేయకూడదు.
• ఛాతీని ప్రెస్ చేస్తూ మధ్యలో రెస్క్యూ శ్వాస అందించాలి.
• ఛాతీపై 30 సార్లు నొక్కి ఆ తర్వాత రెండు సార్లు నోటి ద్వారా శ్వాస అందించాలి.
• గుండె కొట్టుకునే వరకు ఈ ప్రక్రియను పునరావృతం చేయాలి.

శిశువులకు:

• రెండు వేళ్లను ఛాతీపై ఉంచి సీపీఆర్ చేయాలి.
• ఎక్కువ బలం ప్రయోగించకూడదు. ఎక్కువగా ప్రెస్ చేయకూడదు.
• సెకనుకు రెండు సార్లు ఛాతీని ప్రెస్ చేయాలి.
• నోటి ద్వారా శ్వాస అందించాలి.
• శ్వాస ఆడే వరకు, గుండె కొట్టుకునే వరకు ఈ ప్రక్రియనను పునరావృతం చేయాలి.



సీపీఆర్ చేసే ముందు గుర్తుంచుకోవాల్సిన విషయాలు:

• గుండె పైభాగంలో ఉండే స్టెర్నమ్ అనే ఎముక వద్ద ప్రెస్ చేయాలి.
• గుండె కొట్టుకునేందుకు ప్రయత్నించాలి.
• వ్యక్తిని బట్టి ఛాతీపై ఒత్తిడి అందించాలి. పెద్దవారికి ఒకలా, పిల్లలకు ఒకలా ప్రెస్ చేయాలి.
• సీపీఆర్ లో శిక్షణ తీసుకున్న వారు అది అందిస్తే మంచి ఫలితం ఉంటుంది.
• నోటి ద్వారా శ్వాస అందించడం చేస్తూ ఉండాలి.