మహిళలకు మేలు చేసే పుల్లటి పళ్ళు!

By B N Sharma

Published: Monday, March 12, 2012, 8:24 [IST]

పుల్లటి సిట్రస్‌ జాతి పళ్లల్లో ఉండే ఒక పదార్థం మహిళల్లో వచ్చే పక్షవాతాన్ని తగ్గిస్తుందని ఒక తాజా అధ్యయనం పేర్కొన్నది. ఫ్లేవనాయిడ్లువుండే సిట్రస్‌ పళ్లను తినడం ఎలాంటి ప్రభావాలను కలిగిస్తుందనే అంశంపై అధ్యయనం పరీక్షించింది. పళ్లు, పచ్చని కూరగాయాలు, చిక్కటి రంగు ఉన్న డార్క్ చాక్లెట్లు, రెడ్‌ వైన్‌ లలో ఫ్లెవనాయిడ్స్‌కు చెందిన ఒక ప్రత్యేక పదార్ధం వుంటుంది. ఎక్కువ పళ్లు, కూరగాయలు, ముఖ్యంగా విటమిన్‌-సి తీసుకోవడం వల్ల మహిళలకు పక్షవాత ప్రమాదం తగ్గుతుందని అధ్యయనాలు వెల్లడించాయి.

స్టడీ ఫలితాలను బ్రిటన్‌లోని యూనివర్శిటీ ఆఫ్‌ ఈస్ట్‌ ఆంగ్లియకు చెందిన అడెన్‌ కాసిడె తెలిపారు. ఫ్లేవనాయిడ్లు వివిధ రకాల యాంత్రిక విధానాల ద్వారా శరీరంలోని రక్తనాళాల పనితీరును, యాంటి-ఇన్‌ఫ్లమేటరి ప్రభావాన్ని మెరుగుపరుస్తాయి. ఈ అధ్యయనం జర్నల్‌ ఆఫ్‌ ది అమెరికన్‌ హార్ట్‌ అసోసియేషన్‌'లో ప్రచురించారు.

నర్సెస్‌ హెల్త్‌ స్టడీ నుంచి సేకరించిన సమాచారాన్ని కాసిడే అతని సహచరులు అనుసరించారు. ఇందులో 66,622 మంది మహిళలు పళ్లు, కూరగాయలతో కలిపి తీసుకునే ఆహారం గురించి తెలిపారు. అమెరికా దేశంలోని ఆహార విధానాలలో సాధారణంగా తీసుకునే ఫ్లేవనాయిడ్ల పనితీరును, ఆరోగ్యంపై వాటి సంబంధాలను పరిశోధకులు పరీక్షించారు. వీటిలోని ఆరు ఉప-తరగతులు.... ఫ్లెవనొన్స్‌, యాంథొసైనిన్స్‌, ఫ్లెవన్‌-3-ఓల్స్‌, ఫ్లవనాయిడ్‌ పాలిమర్స్‌, ఫ్లవనాయిడ్స్‌, ఫ్లవొన్స్‌. అధిక ఫ్లెవనొన్స్‌ ఉన్న సిట్రస్‌ పళ్లను తీసుకున్న మహిళల్లో రక్తం గడ్డకట్టడంతో సంబంధమున్న పక్షవాతం 19 శాతం తగ్గింది. దీన్ని నిర్ధారణ చేయడానికి మరిన్ని అధ్యయనాలు జరగాలని పరిశోధకులు తెలిపారు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.