మీ బ్రెయిన్ కూ వ్యాయామం కావాలి?

Wellness

oi-Nageswara

By B N Sharma

Published: Friday, June 8, 2012, 8:45 [IST]

ఖాళీగా వుండే మెదడు దయ్యాల ఇల్లు అనే సామెత వుంది. ఇది సామెతే కాదు అక్షరాలా వాస్తవం కూడాను. మన శరీరంలో ఏ భాగమైనా సరే వాడకుండా లేదా ఉపయోగించకుండా వుంటే అది మొండిపడుతుంది. పదును తగ్గుతుంది. అదేవిధంగా మన మెదడు కూడాను. చేయటానికి మెదడుకు పని ఏముంటుందనుకుంటారు. కాని మీరు మీ చేతులు, కాళ్ళు ఏవి కదపవలెన్నా మీ బ్రెయిన్ ఉపయోగించాల్సిందే. శరీర అవయవాలలో మెదడుకు ఎంతో ప్రాధాన్యం. శరీరంలోని కదలికలు అన్ని మీకు తెలియకుండానే జరిగిపోతూ వుంటాయి. కాని కొన్ని విషయాలలో విచక్షణతో మీరు జాగ్రత్తగా వ్యవహరించవలసిన అవసరం వస్తుంది. అపుడే మీరు మీ మెదడుకు పని కల్పించుతున్నట్లు తెలుసుకుంటారు. ఇంత ప్రధానమైన ఈ శరీర భాగానికి మనం పదును పెట్టాలి. అందుకుగాను మీ మెదడుకు కొన్ని వ్యాయామాలు కావాలి. వయసు పైబడుతోందంటే మనమందరం మెదడుకుగల పదును కోల్పోతూ వుంటాం. కాని మెదడుకు రెగ్యులర్ గా పని కల్పిస్తూంటే, మీ తెలివి తేటలు మరింత వికసిస్తాయి. జ్ఞాపక శక్తి నశించకుండా వుంటుంది. వయసుపైబడుతున్నప్పటికి మీలో మతిమరపు వ్యాధి రాకుండా వుంటుంది.

మీ మెదడుకు 5 ప్రధాన వ్యాయామాలు
1. మెమొరీ గేమ్ - చాలామంది వ్యక్తులు పెద్ద వయసు వచ్చిందంటే అల్జీమర్స్ అంటే మతి మరపు వ్యాధితో బాధపడుతూంటారు. వయసుతోపాటు మెమొరీ తగ్గటం సహజంగా వచ్చేస్తుంది. కనుక ప్రధానంగా మీ మెదడుకు పని కల్పిస్తూండాలి. మీ స్కూలు తోటి విద్యార్ధుల పేర్లను మరోమారు జ్ఞాపకం చేసుకోండి. ఈ వ్యాయామం మీరు ఖాళీగా వున్నపుడు, ఏదైనా ప్రయాణం చేస్తున్నపుడు, కాఫీ బ్రేక్ లలో చేయవచ్చు.

2. విచక్షణ - మనం విచక్షణగా వ్యవహరించి బ్రెయిన్ కు వ్యాయామం కల్పించాలి. చాలాసార్లు మనం మనకు తెలియకుండానే విచక్షణ చూపుతాం. కనుక ప్రతిపని మీరు కొంత లాజిక్ తో చేయండి. అందుకుగాను, కొంత రాజకీయాలవంటివి పట్టించుకోవాలి. వాటిపై చర్చలు చేయాలి. నిర్ణయాలకు రావాలి. అపుడు మీ మెదడు పదును ఎక్కినట్లే.

3. శ్రధ్ధ పెట్టటం - గతంలో మీరు మీ స్కూల్ టీచర్ కు తరగతి గదిలో చూపిన శ్రద్ధ నేడు ఆఫీసులో చూపుతున్నారా? చూపలేరు. వయసుతో పాటు మీకు శ్రద్ధ కూడా తగ్గుతుంది. ఆందోళనగా వుంటారు. మీ శ్రద్ధను మెరుగుపరచటానికిగాను కొంచెం బాధాకర వ్యాయామం చేయాలి. వట వట వాగే ఆఫీస్ కొలీగ్ ను ఎంచుకోండి. అతను ఏ చెత్త విషయాలు మాట్లాడినా శ్రద్ధగా వినండి. అది మీ లోని శ్రద్ధను మెరుగుపరుస్తుంది.

4. పజిల్స్ చేయటం - ఈ పని పిల్లలదనుకుంటాం. కాని పిక్చర్ పజిల్స్, సూడోకు వంటివి మెదడుకు మంచి వ్యాయామం. లేదంటే, బజారులో తిరిగేటపుడు దుకాణాల బోర్డులు చదవండి వాటిని మరల అదే వరుసలో గుర్తుచేసుకోండి.

5. భాషా పర నైపుణ్యం - మెదడు వ్యాయామాలలో బ్రెయిన్ కి కొత్త భాషను నేర్పించటం మంచి వ్యాయామం. కనుక ఇప్పటివరకు మీకు తెలియని భాష ఒకటి సాధన చేయండి. మార్గదర్శకంగా అది బాగా వచ్చిన వారిని ఒకరిని ఎంచుకోండి. వారితో మాట్లాడటం సాధన చేస్తే మీ మెమొరీ మెరుగవుతుంది. బ్రెయిన్ కు మంచి వ్యాయామంగా వుంటుంది.

ఈ మెదడు వ్యాయామాలు మిమ్మల్ని రోజువారీ జీవితంలో ఎంతో చురుకుగా వుండేలా చేస్తాయి. కనుక నేటినుండే మీ మెదడుకు పని కల్పించండి. తెలివైన వారుగా మిమ్మల్ని మీరు నిరూపించుకోండి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.