బాలికలకు గర్భాశయ క్యాన్సర్ రాకుండా టీకాలు, కేంద్ర సర్కారు ఆధ్వర్యంలో స్కూళ్లల్లో పంపిణీ

9 నుండి 14 ఏళ్లలోపు బాలికల్లో సర్వైకల్ క్యాన్సర్ రాకుండా టీకాలు ఇవ్వాలని కేంద్ర ప్రభుత్వం నిర్ణయించింది. పాఠశాలల ద్వారా ఈ వ్యాక్సిన్లు అందించనున్నట్లు కేంద్ర సర్కారు తెలిపింది. ప్రతి జిల్లాలో 5 నుండి 10వ తరగతి వరకు బాలికల సంఖ్యను క్రోడీకరించడం ప్రారంభించాలని రాష్ట్ర, కేంద్ర పాలిత ప్రాంతాల ప్రభుత్వాలను కేంద్రం కోరింది.

పాఠశాలల ద్వారా టీకాల పంపిణీ చేస్తారు. పాఠశాలల్లో వ్యాక్సిన్ తీసుకోని బాలికలకు ఆరోగ్య కేంద్రాల్లో టీకాలు వేయనున్నారు. బడికి వెళ్లిన బాలికల(9-14 ఏళ్లు) కోసం కమ్యూనిటీ ఔట్‌రీచ్, మొబైల్ టీమ్‌ల ద్వారా టీకాలు అందించున్నారు. టీకాల సంఖ్య నమోదు, రికార్డింగ్, రిపోర్టింగ్ కోసం U-WIN అనే యాప్‌ను కేంద్రం అందుబాటులోకి తీసుకురానుంది.

ప్రచారం కల్పించండి:

గర్భాశయ క్యాన్సర్ నివారణపై అవగాహన కల్పించాలని, దేశవ్యాప్తంగా విద్యార్థినుల్లో HPV వ్యాక్సిన్ ప్రాముఖ్యతపై ప్రచారం చేయాలని రాష్ట్ర ప్రభుత్వాలను కేంద్రం కోరింది. ఈ మేరకు రాష్ట్ర, కేంద్ర పాలిత ప్రాంత ప్రభుత్వాలకు లేఖలు రాసింది.

ముందుగా గుర్తించే తగ్గించొచ్చు:

ప్రపంచవ్యాప్తంగా గర్భాశయయ క్యాన్సర్ మహిళల్లో నాల్గవ అత్యంత సాధారణంగా కనిపించే క్యాన్సర్. భారత్‌లో రెండో అత్యంత సాధారణ క్యాన్సర్. గర్భాశయ ముఖ ద్వారా క్యాన్సర్‌ను ముందే గుర్తించి, సరైన చికిత్స అందించగలిగితే సర్వైకల్ క్యాన్సర్‌ను సులభంగానే నయం చేయవచ్చునని వైద్యులు చెబుతున్నారు.

చాలా గర్భాశయ క్యాన్సర్లు హ్యూమన్ పాపిల్లోమా వైరస్్(HPV)తో సంబంధం కలిగి ఉంటాయి. వైరస్‌కు గురయ్యే ముందు టీకా ఇచ్చినట్లయితే గర్భాశయ క్యాన్సర్ రాకుండా చాలా వరకు నిరోధించవచ్చని కేంద్ర విద్యా మంత్రిత్వ శాఖ పేర్కొంది.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.