నోట్లో ఇట్టే కరిగిపోయే జ్యూసీ మటన్ తహరీ.. ఒక్కసారి తింటే మళ్లీ మళ్లీ కావాలంటారు!

రెగ్యులర్ గా చేసే మటన్ బిర్యానీ వెరైటీలు కాకుండా మటన్ తో ఏదైనా కొత్తరకం వంటకం తయారుచేయాలనుకుంటే మటన్ తహరీ ఖచ్చితంగా ఓ సారి ట్రై చేయాల్సిందే.

ఒక్కసారి ఈ స్పైసీ అండ్ జ్యూసీ మటన్ తహరీ రుచి చూశారంటే మళ్లీ మళ్లీ కావాలంటారు. మసాలాల ఘుమఘుమలతో, నోట్లో ఇట్టే కరిగిపోయే లేత మటన్ ముక్కలతో ఉండే ఈ కంఫర్ట్ మీల్ ఎలా తయారు చేయాలో ఇక్కడ చూడండి.

మటన్ తహరీ తయారీకి కావాల్సిన పదార్థాలు

ఆవ నూనె - అర కప్పు
మటన్ (ఎముకలతో) - అర కిలో
ఉల్లిపాయ - 1
టమాటాలు - 2
అల్లం వెల్లుల్లి పేస్ట్ - ఒకటిన్నర టేబుల్ స్పూన్
బిర్యానీ ఆకులు - 2
మిరియాలు - 5
లవంగాలు - 4
పచ్చ యాలకులు - 4
నల్ల యాలకు - 1
దాల్చిన చెక్క - 1 చిన్న ముక్క
కారం - 1 టేబుల్ స్పూన్
పసుపు - 1 టీస్పూన్
ధనియాల పొడి - 1 టేబుల్ స్పూన్
జీలకర్ర పొడి - 1 టీస్పూన్
గరం మసాలా - 1 టీస్పూన్
ఉప్పు - రుచికి సరిపడా
నీళ్లు - నాలుగున్నర కప్పులు
నానబెట్టిన బియ్యం - 2 కప్పులు
పచ్చిమిర్చి - 5 నుండి 6
ఆలూ బుఖారా - 4 లేదా 5
కొత్తిమీర, పుదీనా - కొద్దిగా

రాఖీ 2026 స్పెషల్: మీ చేతులతో సోదరుడి కోసం కుంకుమపువ్వు పిస్తా మిల్క్ కేక్ ఇలా చేయండి!

మటన్ తహరీ తయారీ విధానం

-ముందుగా స్టవ్ వెలిగించి, ప్రెషర్ కుక్కర్ పెట్టి అందులో ఆవ నూనె వేడి చేయండి. నూనె వేడెక్కాక మసాలా దినుసులు (బిర్యానీ ఆకులు, మిరియాలు, లవంగాలు, యాలకులు, చెక్క) వేసి వేయించండి.

-ఇప్పుడు ఉల్లిపాయ ముక్కలు వేసి, లేత బంగారు రంగులోకి వచ్చేవరకు వేయించాలి. ఆ తర్వాత అల్లం వెల్లుల్లి పేస్ట్ వేసి పచ్చివాసన పోయేలా వేయించండి.

-శుభ్రంగా కడిగిన మటన్ ముక్కలను కుక్కర్‌ లో వేసి బాగా కలపండి. అందులోనే టమాటా ముక్కలు, కారం, పసుపు, ధనియాల పొడి, జీలకర్ర పొడి, గరం మసాలా, ఉప్పు వేసి మటన్‌కు మసాలాలు పట్టేలా కొద్దిసేపు ఉడికించండి.

-ఇప్పుడు నాలుగున్నర కప్పుల నీళ్లు పోసి కుక్కర్ మూత పెట్టండి. మటన్ ముక్క మెత్తగా ఉడికే వరకు సుమారు 25-30 నిమిషాల పాటు ఉడికించండి.

-కుక్కర్ ఆవిరి పోయాక మూత తీసి, ముందుగా నానబెట్టుకున్న బియ్యం, పచ్చిమిర్చి, ఆలూ బుఖారా, కొత్తిమీర, పుదీనా వేసి సున్నితంగా కలపండి. ఈ దశలో ఉప్పు సరిచూసుకోండి.

-మంటను హై ఫ్లేమ్‌ లో పెట్టి నీరంతా ఇంకిపోయే వరకు ఉడికించాలి. ఆ తర్వాత మూతపెట్టి, మంటను పూర్తిగా సిమ్‌ లో ఉంచి సుమారు 10 నిమిషాల పాటు దమ్ చేయాలి.

-అంతే.. గుమగుమలాడే వేడివేడి మటన్ తహరీ రెడీ. అన్నం మెతుకు విరగకుండా ప్లేట్‌ లోకి తీసుకుని, చల్లని రైతా, ఉల్లిపాయ సలాడ్‌ తో వడ్డిస్తే దీని రుచి అమోఘం.