రాజస్తాన్ ఫేమస్ క్యారెట్ పాక్..ఒక్కసారి రుచి చూస్తే వదిలిపెట్టరు..మీ ఇంట్లో ఇలా ఈజీగా చేసుకోండి

శీతాకాలం వచ్చిందంటే చాలు మార్కెట్లో తాజా ఎర్రటి క్యారెట్లు కనువిందు చేస్తాయి. ఈ సీజన్‌ లో ఏ పెళ్లికి వెళ్ళినా, ఏ స్వీట్ షాపులో చూసినా క్యారెట్ హల్వా దర్శనమివ్వడం సర్వసాధారణం. అయితే ఎప్పుడూ తినే హల్వా కాకుండా, దానికి కాస్త ట్విస్ట్ ఇచ్చి మరింత రుచికరంగా మార్చుకోవాలనుకుంటున్నారా?

అయితే క్యారెట్ పాక్ రుచి చూడాల్సిందే. రాజస్తాన్ లోని చిరావా ప్రాంతంలో ఈ క్యారెట్ పాక్ చాలా ప్రసిద్ధి. దీని రుచి ఒక్కసారి చూస్తే, పిల్లల నుండి పెద్దల వరకు మళ్ళీ మళ్లీ కావాలని అడుగుతారు. సాధారణ క్యారెట్ హల్వాను క్రీమీగా, బర్ఫీ స్టైల్‌ లో ఎలా మార్చుకోవచ్చో ఇక్కడ చూడండి.

కావలసిన పదార్థాలు
తాజా ఎర్రటి క్యారెట్లు - 1.5 కిలోలు
చక్కెర - 1 కప్పు
చిక్కటి పాలు - 1 లీటరు
స్వచ్ఛమైన నెయ్యి - 2 టేబుల్ స్పూన్లు
యాలకుల పొడి - 2 టీస్పూన్లు
స్వీట్ లేని కోవా (మావా) లేదా పాల పొడి - 250 గ్రాములు
డ్రై ఫ్రూట్స్ (జీడిపప్పు, బాదం) - 20 చొప్పున
కుంకుమ పువ్వు - చిటికెడు

తయారీ విధానం

-ముందుగా క్యారెట్లను శుభ్రంగా కడిగి, చెక్కు తీసి సన్నగా తురుముకోవాలి.

-స్టవ్ వెలిగించి, ఒక మందపాటి పాన్ పెట్టి తురిమిన క్యారెట్ మిశ్రమాన్ని వేయాలి. క్యారెట్ మెత్తబడే వరకు నిరంతరం కలుపుతూ వేయించాలి. క్యారెట్ కాస్త మగ్గిన తర్వాత 1 కప్పు చక్కెర కలపాలి.

-చక్కెర కరిగి నీరు బయటకు వస్తుంది. ఇప్పుడు అందులో 1 లీటరు పాలు పోయాలి. పాలు పూర్తిగా ఇగిరిపోయి, మిశ్రమం దగ్గర పడేంత వరకు ఉడికించాలి.

-పాలు పూర్తిగా ఆవిరైపోయాక, రెండు టేబుల్ స్పూన్ల నెయ్యిని జోడించండి. తర్వాత యాలకుల పొడి వేసి బాగా కలపాలి. మిశ్రమం పాన్ అంచుల నుండి విడిపోయే వరకు వేయించాలి.

-ఇప్పుడు కొన్ని డ్రై ఫ్రూట్స్ (జీడిపప్పు, బాదం) పక్కన పెట్టి మిగిలిన వాటిని పొడిగా చేసి పాన్ లోని మిశ్రమంలో కలపాలి.

-వేరొక చిన్న పాన్‌లో మావా (కోవా) ముక్కలను వేసి వేడి చేయాలి. అది మెత్తబడ్డాక కొద్దిగా పాలు పోసి పేస్ట్‌ లా తయారు చేసుకోవాలి. ఇందులో కుంకుమ పువ్వు, కొద్దిగా యాలకుల పొడి, 2 టేబుల్ స్పూన్ల చక్కెర వేసి కలపాలి.

-ఒక ట్రేకి బటర్ పేపర్ వేసి లేదా నెయ్యి రాసి సిద్ధం చేసుకోండి. ముందుగా తయారు చేసిన క్యారెట్ మిశ్రమాన్ని ట్రేలో వేసి సమానంగా పరచండి. దీని పైన మనం తయారు చేసుకున్న మావా (కోవా) మిశ్రమాన్ని రెండవ పొరలా వేసి స్ప్రెడ్ చేయండి. పైన మిగిల్చిన జీడిపప్పు, బాదం, పిస్తా ముక్కలతో గార్నిష్ చేయండి.

-ఈ ట్రేని సుమారు 1.5 నుండి 2 గంటల పాటు ఫ్రిజ్‌ లో ఉంచండి. సెట్ అయిన తర్వాత, బర్ఫీ ముక్కల్లా కట్ చేసి సర్వ్ చేయండి. అంతే క్యారెట్ పాక్ రెడీ.