రోజూ తినే చట్నీ బోర్ కొట్టిందా? ఈ టమాటా గుడ్డు చట్నీ ట్రై చేయండి..5 నిమిషాల్లో బ్రహ్మాండమైన రుచి

సాధారణంగా మన తెలుగు వాళ్ల ఇళ్లల్లో పొద్దున్నే ఎక్కువగా తయారుచేసే బ్రేక్ ఫాస్ట్ లలో ఇడ్లీ,దోశ, ఉప్మా ఉంటాయి. వీటిల్లోకి సైడ్ డిష్ గా పల్లి చట్నీ, కొబ్బరి చట్నీ, సాంబార్ తయారుచేస్తుంటారు. రోజూ ఇవే తిని తిని చాలామందికి బోర్ కొట్టేస్తుంది. అసలు మ్యాజిక్ అంతా మనం తినే సైడ్ డిష్‌ లోనే ఉంటుంది. పల్లి చట్నీ, కొబ్బరి చట్నీ, సాంబార్ అన్నీ రొటీన్ అయిపోతే..టమాట గుడ్డు చట్నీ ట్రై చేయండి? వినడానికి వింతగా ఉన్నా, రుచి మాత్రం అమోఘం. ఒక్కసారి తిన్నారంటే మళ్లీ మళ్లీ ఇదే కావాలంటారు. కేవలం గుడ్డు, టమాటా ఉంటే చాలు నిమిషాల్లో గుమగుమలాడే చట్నీ రెడీ చేసేయొచ్చు. ఈ సూపర్ ఫాస్ట్ చట్నీ ఎలా చేసుకోవాలో ఇక్కడ చూడండి.

కావాల్సిన పదార్థాలు
పెద్ద టమాటాలు: 4-5
పెద్ద ఉల్లిపాయ: 1
కరివేపాకు: 2 రెమ్మలు
వెల్లుల్లి రెబ్బలు: 2
ఆవాలు: అర టీస్పూన్
పసుపు: పావు టీస్పూన్
కారం: అర టీస్పూన్
పచ్చిమిర్చి: 2
నూనె: 2 టేబుల్ స్పూన్లు
ఉప్పు: రుచికి సరిపడా
చక్కెర: చిటికెడు
గుడ్లు: 2
కొత్తిమీర: కొద్దిగా

తయారీ విధానం

-ముందుగా స్టవ్ మీద బాండీ పెట్టి అందులో ఆయిల్ వేయండి. నూనె కాస్త వేడెక్కిన తర్వాత ఆవాలు వేసి చిటపటలాడనివ్వండి. ఇప్పుడు సన్నగా తరిగిన వెల్లుల్లి, ఉల్లిపాయ ముక్కలు వేసి దోరగా, బంగారు రంగు వచ్చేవరకు వేయించండి. ఆ తర్వాత కరివేపాకు, పచ్చిమిర్చి వేసి ఒక్క నిమిషం పాటు వేగించండి.

-ఇప్పుడు బాండీలో తరిగిన టమాటా ముక్కలు వేసి అవి మెత్తగా మగ్గి, నూనె పైకి తేలేంత వరకు 3-4 నిమిషాల పాటు తక్కువ మంట మీద ఉడికించండి.

-టమాటాలు బాగా మగ్గిన తర్వాత అందులో ఉప్పు, పసుపు, కారం, చిటికెడు చక్కెర వేసి బాగా కలపండి. మసాలాల పచ్చి వాసన పోయే వరకు ఒక నిమిషం వేయించండి.

-తర్వాత అందులో కొద్దిగా నీళ్లు పోసి మూత పెట్టి చట్నీ దగ్గరపడే వరకు మీడియం మంట మీద ఉడకనివ్వండి. టమాటాలు పూర్తిగా ఉడికి, గ్రేవీలా తయారయ్యాక స్టవ్ ఆఫ్ చేయండి.

-వెంటనే బాండీలో ఉన్న వేడి గ్రేవీలోనే రెండు గుడ్లను పగలగొట్టి వేయండి. గరిటతో గుడ్లు గ్రేవీలో పూర్తిగా కలిసిపోయి క్రీమీగా అయ్యేదాకా వేగంగా కలపాలి. (ఆ వేడికే గుడ్లు ఉడికిపోతాయి).

-చివరగా సన్నగా తరిగిన కొత్తిమీర చల్లుకుంటే ఎంతో రుచికరమైన, నోరూరించే గుడ్డు టమాటా చట్నీ రెడీ. వేడివేడి ఇడ్లీ, దోశ, చపాతీ లేదా అన్నంలోకి కూడా ఈ చట్నీ అద్భుతంగా ఉంటుంది.