ఒకసారి తింటే వదలరు..నార్త్ ఇండియా స్పెషల్ మటర్ కచోరీ..ఎలా చేసుకోవాలంటే

మటర్ కచోరీ ఒక సంప్రదాయ, రుచికరమైన భారతీయ స్నాక్. పచ్చి బఠానీల పోషక విలువలతో కూడి, సుగంధ ద్రవ్యాల సువాసనతో ఇది చాలా మందికి ఇష్టమైన వంటకంగా నిలిచింది. ముఖ్యంగా నార్త్ ఇండియాలో దీన్ని ఎక్కువగా తింటుంటారు. ఇది పైన క్రిస్పీగా, లోపల మెత్తగా, మసాలా రుచితో అద్భుతంగా ఉంటుంది. సాధారణంగా దీనిని పుదీనా చట్నీ, చింతపండు చట్నీ లేదా వేడి టీతో కలిపి ఆనందిస్తారు. శీతాకాలంలో తాజా పచ్చి బఠానీలు విరివిగా లభించే సమయంలో మటర్ కచోరీ చాలా ఎక్కువగా తయారు చేస్తారు. వర్షం పడుతున్న సమయంలో వేడి వేడిగా ఏదైనా చేసుకొని తినాలనుకున్నప్పుడు కూడా ఇది బెస్ట్ ఆప్షన్ గా ఉంటుంది. నార్త్ ఇండియా ఫేమస్ మటర్ కచోరీ మీ ఇంట్లోనే ఎలా తయారుచేసుకోవాలో ఇక్కడ చూడండి.

మటర్ కచోరీ తయారీకి కావాల్సిన పదార్థాలు

-మైదా పిండి: 2 కప్పులు
-బొంబాయి రవ్వ: 2 టేబుల్ స్పూన్లు
-ఉప్పు: 1/2 టీస్పూన్
-నూనె లేదా నెయ్యి: 1/4 కప్పు
-నీరు: పిండి కలపడానికి సరిపడా
-పచ్చి బఠానీలు: 1.5 కప్పు
-పచ్చిమిర్చి: 2-3
-అల్లం: 1 అంగుళం ముక్క
-ధనియాల పొడి: 2 టీస్పూన్లు
-జీలకర్ర పొడి: 1 టీస్పూన్
-మామిడి పొడి: 1 టీస్పూన్
-గరం మసాలా: 1/2 టీస్పూన్
-సోంపు పొడి: 1/2 టీస్పూన్
-కారం పొడి: 1/2 టీస్పూన్
-ఉప్పు: రుచికి సరిపడా
-ఇంగువ: 1/4 టీస్పూన్
-తాజా కొత్తిమీర: 2 టేబుల్ స్పూన్లు
-నూనె: డీప్ ఫ్రై చేయడానికి సరిపడా

మటర్ కచోరీ తయారీ విధానం

-ఒక పెద్ద గిన్నెలో మైదా పిండి, బొంబాయి రవ్వ, ఉప్పు తీసుకోండి. ఇందులో పావు కప్పు నూనె వేసి పిండిలో బాగా కలిసేలా చేతులతో రుద్దండి. పిండి బ్రెడ్ క్రంబ్స్ లాగా పొడిపొడిగా అయ్యే వరకు కలపాలి.

-కొద్దికొద్దిగా నీరు కలుపుతూ మరీ గట్టిగా కాకుండా మరీ మెత్తగా కాకుండా ఒక మీడియం మెత్తటి పిండిని కలపాలి. పిండిని ఒక తడి వస్త్రంతో కప్పి కనీసం 30 నిమిషాల పాటు పక్కన పెట్టండి.

-పచ్చి బఠానీలను ఉప్పు వేసి కొద్దిగా నీటిలో ఉడికించి, నీటిని వడకట్టండి. ఉడికించిన బఠానీలను మిక్సీలో వేసి కొద్దిగా పలుకులుగా ఉండేలా గ్రైండ్ చేయండి.

-ఒక పాన్‌ లో 2 టేబుల్ స్పూన్ల నూనె వేడి చేయండి. నూనె వేడెక్కిన తర్వాత ఇంగువ, అల్లం మరియు పచ్చిమిర్చి వేసి 1 నిమిషం పాటు వేయించండి. ఇప్పుడు గ్రైండ్ చేసిన పచ్చి బఠానీ పేస్ట్ వేసి బాగా కలపాలి. తర్వాత ధనియాల పొడి, జీలకర్ర పొడి, సోంపు పొడి, ఆమ్చూర్ పొడి, కారం పొడి, గరం మసాలా, ఉప్పు వేసి బాగా కలపాలి.

-తక్కువ మంటపై 5-7 నిమిషాలు ఉడికించాలి..మధ్య మధ్యలో కలుపుతూ అడుగంటకుండా చూసుకోవాలి.

-స్టవ్ ఆఫ్ చేసి తరిగిన కొత్తిమీర వేసి బాగా కలపండి. చల్లారిన తర్వాత దాన్ని చిన్న చిన్న ఉండలుగా చేసుకోవాలి.

-ముందుగా సిద్ధం చేసుకున్న పిండిని మళ్లీ ఒకసారి బాగా కలిపి, చిన్న చిన్న నిమ్మకాయ సైజు ఉండలుగా చేసుకోవాలి. ఒక్కో ఉండను చేతిలో తీసుకుని, బొటనవేలితో మధ్యలో నొక్కి, గిన్నె ఆకారం వచ్చేలా చేయండి. అంచులు సన్నగా, మధ్యలో కొద్దిగా మందంగా ఉండేలా చూసుకోండి.

-సిద్ధం చేసుకున్న బఠానీ పూరవం ఉండను మధ్యలో పెట్టి అంచులన్నింటినీ కలిపి జాగ్రత్తగా మూసివేయండి.

-పూరవం బయటకు రాకుండా, నిండుగా ఉన్న ఉండను అరచేతితో నెమ్మదిగా నొక్కి, కచోరీ ఆకారంలో మందపాటి పూరీ లాగా చేయండి. మరీ పల్చగా చేయకూడదు.

-ఒక కడాయిలో డీప్ ఫ్రై చేయడానికి సరిపడా నూనె వేసి తక్కువ మంటపై వేడి చేయండి. కచోరీలు వేయించడానికి నూనె మరీ వేడిగా ఉండకూడదు. మీడియం-తక్కువ మంటపై వేయించడం వల్ల కచోరీలు లోపల కూడా బాగా ఉడికి, క్రిస్పీగా వస్తాయి.

-నూనె సరిపడా వేడెక్కిన తర్వాత 2-3 కచోరీలను ఒకేసారి వేయండి. కడాయిలో ఎక్కువ కచోరీలు వేయకూడదు. కచోరీలు నెమ్మదిగా నూనెలో ఉబ్బుతూ పైకి తేలుతాయి. వాటిని తిప్పుతూ, బంగారు రంగులోకి మారి, క్రిస్పీగా అయ్యే వరకు వేయించండి. దీనికి సుమారు 8-10 నిమిషాలు పట్టవచ్చు.

-వేగిన తర్వాత నూనె నుండి తీసి టిష్యూ పేపర్‌ పై ఉంచండి అదనపు నూనె పీల్చుకుంటుంది. అంతే మటర్ కచోరీ రెడీ.