వినాయక చవితి స్పెషల్..ఇంట్లోనే ఈజీగా నోరూరించే చాక్లెట్ మోదక్ ఎలా చేసుకోవాలంటే..

ఈ ఏడాది వినాయకచవితి పండుగను సెప్టెంబర్ 14న జరుపుకుంటారు. వాడవాడలా గణనాథుడిని ఆహ్వానించడానికి భక్తులంతా ఎంతో భక్తిశ్రద్ధలతో ముమ్మర సన్నాహాలు చేస్తున్నారు. మన బొజ్జ గణపయ్యకు కుడుములు, మోదకాలు అంటే ఎంత ఇష్టమో ప్రత్యేకంగా చెప్పాల్సిన పనిలేదు.

ఈసారి మీరు స్వామివారికి కాస్త విభిన్నంగా ఏదైనా నైవేద్యం సమర్పించాలనుకుంటే చాక్లెట్ మోదక్ బెస్ట్ ఛాయిస్. పిల్లల నుంచి పెద్దల వరకు చాక్లెట్ రుచిని ఇష్టపడని వారుండరు. ఈ స్వీట్ మీ పండుగ సంబరాలకు మరింత తీపిని పంచుతుంది. చాక్లెట్ మోదకాలను ఇంట్లోనే చాలా తక్కువ సమయంలో, సులభంగా ఎలా తయారు చేసుకోవాలో ఇక్కడ చూడండి.

చాక్లెట్ మోదకాలు తయారీకి కావాల్సిన పదార్థాలు

డార్క్ లేదా మిల్క్ చాక్లెట్ కాంపౌండ్ - 2 కప్పులు
కండెన్స్డ్ మిల్క్ - అర కప్పు
ఎండు కొబ్బరి పొడి- 1 కప్పు
తరిగిన డ్రై ఫ్రూట్స్ - 3 నుండి 4 టేబుల్ స్పూన్లు
యాలకుల పొడి - అర టీస్పూన్
కరిగించిన నెయ్యి - 1 టీస్పూన్

కృష్ణాష్టమి ఉపవాసం ఉంటున్నారా? అయితే నీరసం రానివ్వని ఈ సగ్గుబియ్యం వడలు ట్రై చేయండి!

చాక్లెట్ మోదకాలు తయారీ విధానం

-ముందుగా స్టవ్ వెలిగించి, మంటను సిమ్‌ లో ఉంచి ఒక నాన్ స్టిక్ పాన్ పెట్టుకోండి. అందులో కొబ్బరి పొడి వేసి ఒకటి లేదా రెండు నిమిషాల పాటు దోరగా వేయించండి. కొబ్బరి రంగు మారకుండా, అందులోని తేమ పోయేంతవరకు మాత్రమే వేయించి, ఒక గిన్నెలోకి తీసి పక్కన పెట్టుకోండి.

-ఇప్పుడు చాక్లెట్‌ ను కరిగించే ప్రక్రియ కోసం డబుల్ బాయిలర్ పద్ధతిని వాడాలి. ఒక పాత్రలో నీటిని మరిగించి, దానిపై సన్నగా తరిగిన చాక్లెట్ ముక్కలు ఉన్న గాజు లేదా స్టీల్ గిన్నెను ఉంచండి. వేడి నీటి ఆవిరికి చాక్లెట్ నెమ్మదిగా కరుగుతుంది. మీకు మైక్రోవేవ్ ఉంటే అందులో 30 సెకన్ల పాటు ఉంచి కూడా కరిగించుకోవచ్చు.

-చాక్లెట్ పూర్తిగా కరిగి ఎక్కడా ఉండలు లేకుండా మృదువుగా తయారైన తర్వాత, మంటను బాగా తగ్గించండి. ఇప్పుడు అందులో కండెన్స్డ్ మిల్క్ వేసి బాగా కలపండి. మిశ్రమం దగ్గరపడ్డాక స్టవ్ ఆపేయండి.

-ఈ వేడి చాక్లెట్ మిశ్రమంలో ముందుగా వేయించి పెట్టుకున్న కొబ్బరి పొడి, కరకరలాడే డ్రై ఫ్రూట్స్ ముక్కలు, సువాసన కోసం యాలకుల పొడి వేసి గరిటెతో బాగా కలపండి. ఇదంతా ఒక చపాతీ పిండి ముద్దలా తయారవుతుంది. చేత్తో పట్టుకునేంత వేడికి వచ్చేలా కొద్దిసేపు చల్లారనివ్వండి.

-ఇప్పుడు మోదక్ అచ్చు తీసుకుని, లోపల కొద్దిగా నెయ్యి రాయండి. ఇలా చేయడం వల్ల మోదకాలు అచ్చుకు అంటుకోకుండా, తీసేటప్పుడు నిగనిగలాడుతూ ఆకర్షణీయమైన ఆకారంలో వస్తాయి.

-సిద్ధం చేసుకున్న చాక్లెట్ మిశ్రమాన్ని కొద్దికొద్దిగా తీసుకుని మోదక్ అచ్చులో నింపండి. అడుగు భాగం నుండి మీ వేళ్లతో గట్టిగా నొక్కండి, అప్పుడే ఆకారం పర్ఫెక్ట్ గా వస్తుంది. ఇప్పుడు నెమ్మదిగా అచ్చును తెరిచి చూస్తే..ఎంతో అందమైన, నోరూరించే చాక్లెట్ మోదక్ రెడీ.

-ఇలా అన్నీ తయారుచేసుకుని ఒక అందమైన ప్లేట్లోకి తీసుకుని స్వామివారికి నైవేద్యంగా సమర్పించండి. పూజ పూర్తయ్యాక ఈ ప్రసాదాన్ని పంచిపెడితే పిల్లలు ఎంతో ఇష్టంగా, పోటీపడి మరీ తింటారు.