ఇల్లంతా గుమగుమలాడే ఇడ్లీ కారప్పొడి.. పక్కా కొలతలతో మీరూ ట్రై చేయండి

ఉదయం బ్రేక్ ఫాస్ట్ లో ఆవిరి పట్టిన వేడి వేడి మల్లెపూవు లాంటి ఇడ్లీలు ఉంటే ఆ మజాయే వేరు. అయితే ఇడ్లీలోకి కేవలం చట్నీ, సాంబార్ కంటే.. ప్లేట్లో కాస్త నెయ్యి లేదా నువ్వుల నూనె వేసుకుని, కమ్మటి ఇడ్లీ కారప్పొడి అద్దుకుని తింటే ఆ రుచికి ఎవరైనా ఫిదా అవ్వాల్సిందే. హోటల్ స్టైల్‌ లో లేదా మన అమ్మమ్మల కాలం నాటి కమ్మని ఇడ్లీ పొడిని ఇంట్లోనే సులభంగా, పర్ఫెక్ట్ కొలతలతో ఎలా తయారు చేసుకోవాలో ఇక్కడ చూడండి.

ఇడ్లీ కారప్పొడి తయారీకి కావాల్సిన పదార్థాలు

మినపప్పు - 1 కప్పు
పచ్చి శెనగపప్పు - అర కప్పు
పుట్నాల పప్పు (వేయించిన శెనగపప్పు) - 1 కప్పు
పచ్చి బియ్యం - పావు కప్పు
తెల్ల నువ్వులు - పావు కప్పు
కరివేపాకు - 1 పెద్ద రెమ్మ
ఎండుమిర్చి + బ్యాడిగి మిర్చి - మీ కారానికి తగినన్ని
ఇంగువ - 1 టీస్పూన్
ఉప్పు - రుచికి సరిపడా

-ఈ కారప్పొడి రుచి అంతా పప్పులను వేయించడంలోనే ఉంటుంది. ముందుగా స్టవ్ వెలిగించి అడుగు మందంగా ఉన్న కడాయి పెట్టుకోవాలి. మంటను పూర్తిగా సిమ్‌ లో ఉంచి ఒక్కో పదార్థాన్ని విడివిడిగా వేయించుకోవాలి.

-ముందుగా మినపప్పును కడాయిలో వేసి దోరగా, కమ్మటి వాసన వచ్చే వరకు వేయించి ఒక పళ్ళెంలోకి తీసుకోవాలి. ఆ తర్వాత పచ్చి శెనగపప్పును కూడా వేసి లేత బంగారు రంగులోకి మారేంత వరకు వేయించాలి.

-ఇప్పుడు బియ్యాన్ని వేసి అవి కాస్త తెల్లగా పేలాల్లా ఉబ్బేలా వేయించాలి. పొడిలో బియ్యం వేయడం వల్ల దానికి మంచి కరకరలాడే స్వభావం వస్తుంది.

-ఆ తర్వాత తెల్ల నువ్వులు వేసి చిటపటలాడే వరకు వేయించాలి. పుట్నాల పప్పును ఎక్కువ వేయించాల్సిన పనిలేదు, జస్ట్ కొద్దిసేపు వెచ్చబడితే సరిపోతుంది.

పెళ్లిళ్లలో వడ్డించే పూరీ మసాలా.. ఇంట్లోనే పర్ఫెక్ట్‌ గా ఇలా ఈజీగా చేసుకోండి..వేళ్లు నాకుతూ తినేస్తారు!

-ఇప్పుడు అర టీస్పూన్ నూనె వేసి ఎండుమిర్చి, బ్యాడిగి మిర్చిని మాడిపోకుండా వేయించుకోవాలి. చివరగా కరివేపాకును కూడా వేసి అందులో తడి అంతా పోయి క్రిస్పీగా వేయించుకోవాలి.

-వేయించిన పదార్థాలన్నీ బాగా చల్లారనివ్వాలి. వేడిగా ఉన్నప్పుడు మిక్సీ పడితే పొడి ముద్దగా అవుతుంది.

-చల్లారిన తర్వాత ఒక మిక్సీ జార్ తీసుకుని ముందుగా ఎండుమిర్చి, కరివేపాకు, తగినంత ఉప్పు, ఇంగువ వేసి మిక్సీ పట్టాలి. ఆ తర్వాత ముందుగా వేయించి పెట్టుకున్న పప్పులన్నీ వేసి కాస్త బరకగా గ్రైండ్ చేసుకోవాలి. మరీ మెత్తని పౌడర్‌ లా చేస్తే ఇడ్లీలోకి అంత రుచిగా ఉండదు.

-అంతే మీ ఇల్లంతా గుమగుమలాడే అద్భుతమైన ఇడ్లీ కారప్పొడి రెడీ.

-దీన్ని పూర్తిగా చల్లారాక గాలి చొరబడని సీసాలో నిల్వ చేసుకుంటే నెలల తరబడి తాజాగా, సువాసనతో ఉంటుంది. వేడి వేడి ఇడ్లీలు లేదా నెయ్యి దోశల మీద ఈ పొడిని చల్లుకుని తింటే రుచి అమృతంలా ఉంటుంది.