మసాలా పాస్తా ఎప్పుడైనా తిన్నారా? ఒక్క సారి తింటే వన్స్ మోర్ అనాల్సిందే,ఇంట్లోనే ఈజీగా ఎలా చేయాలంటే

పాస్తా అంటే చాలామందికి ఇష్టం ఉంటుంది. పాస్తాతో అనేక రకాల వెరైటీలు చేయవచ్చు. వాటిలో పాస్తా మసాలా ఒకటి. మసాలా పాస్తా అనేది భారతీయ రుచులతో కూడిన ఒక ప్రసిద్ధ ఇటాలియన్ వంటకం. దీనిని చాలా త్వరగా, సులభంగా తయారుచేసుకోవచ్చు. పిల్లల నుండి పెద్దల వరకు అన్ని వయస్సుల వారికి నచ్చే వంటకం ఇది. భారతీయ మసాలాలు, పాస్తా కలయిక ఒక వినూత్నమైన రుచిని అందిస్తుంది.

మసాలా పాస్తా సాంప్రదాయ పాస్తా వంటకాలకు భిన్నంగా ఉంటుంది. ఈ రెసిపీ కేవలం రుచికరమైనది మాత్రమే కాదు,కొన్ని ఆరోగ్య ప్రయోజనాలను కూడా కలిగి ఉంటుంది. మసాలా పాస్తాని ఇంట్లోనే తయారుచేసుకోడానికి కావలసిన పదార్థాలు,తయారీ విధానం ఇక్కడ చూడండి.

మసాలా పాస్తా తయారీకి కావలసిన పదార్థాలు

పాస్తా - 2 కప్పులు(మీకు నచ్చిన రకం)
ఆయిల్ -2 టేబుల్ స్పూన్లు
ఉల్లిపాయ - 1
టమాటో - 2
పచ్చిమిర్చి - 1-2
అల్లం వెల్లుల్లి పేస్ట్ - 1 టీస్పూన్
పసుపు- పావు టీస్పూన్
కారం- 1 టీస్పూన్
ధనియాల పొడి - 1 టీస్పూన్
జీలకర్ర పొడి - అర టీస్పూన్
గరం మసాలా - అర టీస్పూన్
పావ్ భాజీ మసాలా - 1 టీస్పూన్
ఉప్పు - రుచికి తగినంత
చక్కెర - అర టీస్పూన్
కొత్తిమీర - కొద్దిగా
చీజ్
నీరు

ఉగాది స్పెషల్ అప్పాల పాయసం..ఇలాంటి టేస్ట్ ఇంతకుముందు తిని ఉండరు,ఎలా చేయాలంటే

పాస్తా మసాలా తయారీ విధానం

-ముందుగా ఒక పెద్ద గిన్నెలో నీరు పోసి బాగా మరిగించాలి. అందులో కొద్దిగా ఉప్పు, ఒక టీస్పూన్ ఆయిల్ వేయాలి. తర్వాత పాస్తా వేసి 8-12 నిమిషాలు ఉడికించాలి. పాస్తా మరీ మెత్తగా కాకుండా కొద్దిగా గట్టిగా ఉడికించాలి.

-ఉడికిన పాస్తాను వెంటనే నీటిని వడగట్టి పక్కన పెట్టుకోవాలి. అవసరమైతే పాస్తా ఒకదానికొకటి అతుక్కోకుండా ఉండటానికి కొద్దిగా చల్లని నీరు పోయవచ్చు లేదా కొద్దిగా నూనె వేసి కలపవచ్చు.

-ఇప్పుడు ఒక వెడల్పాటి బాండీలో ఆయిల్ వేడి చెయ్యాలి. నూనె వేడెక్కిన తర్వాత సన్నగా తరిగిన ఉల్లిపాయలు వేసి బంగారు రంగు వచ్చే వరకు వేయించాలి.

-ఉల్లిపాయలు వేగాక అందులో పచ్చిమిర్చి, అల్లం వెల్లుల్లి పేస్ట్ వేసి పచ్చి వాసన పోయే వరకు వేయించాలి.

-ఇప్పుడు అందులో సన్నగా తరిగిన టమాటోలు వేసి మెత్తగా ఉడికి నూనె పైకి తేలే వరకు ఉడికించాలి.

-టమాటోలు ఉడికిన తర్వాత పసుపు, కారం, ధనియాల పొడి, జీలకర్ర పొడి, పావ్ భాజీ మసాలా వేసి బాగా కలపాలి. మసాలాలు మాడిపోకుండా జాగ్రత్తగా కలుపుకోవాలి.

-రుచికి తగినంత ఉప్పు, కొద్దిగా చక్కెర వేసి కలపాలి. చక్కెర టమాటో యొక్క పులుపును బ్యాలెన్స్ చేస్తుంది, మసాలాకు ఒక ప్రత్యేకమైన రుచినిస్తుంది.

-అవసరమైతే కొద్దిగా నీరు పోసి మసాలాను కొన్ని నిమిషాలు ఉడకనివ్వాలి తద్వారా అన్ని రుచులు బాగా కలిసిపోతాయి. మసాలా మరీ పొడిగా ఉంటే పాస్తాకు పట్టడానికి కష్టంగా ఉంటుంది కాబట్టి కొద్దిగా నీరు పోసి గ్రేవీలా చేసుకోవచ్చు.

-ఇప్పుడు ఉడికించిన పాస్తాను మసాలాలో వేసి బాగా కలపాలి. మసాలా మొత్తం పాస్తాకు బాగా పట్టేలా జాగ్రత్తగా కలపాలి. పాస్తా విరిగిపోకుండా మెల్లగా కలపాలి.

-చివరగా గరం మసాలా, సన్నగా తరిగిన కొత్తిమీర వేసి కలపాలి. అంతే మసాలా పాస్తా రెడీ.

-వేడి వేడిగా ప్లేట్లోకి తీసుకొని పైన కొద్దిగా తురిమిన చీజ్‌తో సర్వ్ చేసుకోవడమే.