నోరూరించే నిమ్మకాయ-ఎండుమిర్చి పచ్చడి..ఆకలి లేకపోయినా లాగించేస్తారు!

భారతీయ భోజనంలో ఎన్ని రకాల కూరలు, సలాడ్లు, సూప్‌ లు ఉన్నప్పటికీ.. చివరన కొద్దిగా పచ్చడి లేకపోతే ఆ భోజనం అసంపూర్ణంగానే అనిపిస్తుంది. వేడి వేడి అన్నంలో కాస్త నెయ్యి, ఒక స్పూన్ పచ్చడి వేసుకుని తింటే ఆ రుచే వేరు. సాధారణ వంటకాలకు కూడా అద్భుతమైన రుచిని అద్దే శక్తి పచ్చళ్లకు ఉంది. అలాంటి కోవకే చెందుతుంది ఈ నిమ్మకాయ-ఎండుమిర్చి చట్నీ.

కేవలం పులుపు, కారం మాత్రమే కాకుండా.. తీపి కూడా కలగలిసి ఉండే ఈ చట్నీని ఒక్కసారి రుచి చూస్తే అస్సలు వదలరు. ఇది పల్లెటూరి శైలిలో చేసే ఒక ప్రత్యేకమైన వంటకం. పరాఠా నుంచి కిచిడీ వరకు, సమోసా నుంచి పెరుగన్నం వరకు.. దేనితో తిన్నా దీని కాంబినేషన్ అదిరిపోతుంది. నిమిషాల్లో తయారయ్యే ఈ హెల్దీ, టేస్టీ చట్నీ ఎలా చేయాలో ఇక్కడ చూడండి.

కావలసిన పదార్థాలు
నిమ్మకాయలు - 2
ఎండు మిరపకాయలు - 5
జీలకర్ర - 1 టేబుల్ స్పూన్
వెల్లుల్లి రెబ్బలు - 3
అల్లం - చిన్న ముక్క
బెల్లం లేదా పంచదార - 1 టేబుల్ స్పూన్
నల్ల ఉప్పు- 1 టేబుల్ స్పూన్
సాధారణ ఉప్పు - రుచికి సరిపడా
ఆవ నూనె - 2 టేబుల్ స్పూన్లు

తయారీ విధానం

-ముందుగా నిమ్మకాయలను శుభ్రంగా కడిగి తడి లేకుండా తుడుచుకోవాలి. వాటిని చిన్న ముక్కలుగా కట్ చేసుకోవాలి. నిమ్మకాయలోని గింజలను పూర్తిగా తొలగించాలి. ఒక్క గింజ ఉన్నా చట్నీ చేదుగా మారిపోతుంది.

-స్టవ్ వెలిగించి ఒక చిన్న పాన్‌ను వేడి చేయండి. అందులో జీలకర్ర, ఎండు మిరపకాయలను వేసి దోరగా వేయించుకొని పక్కన పెట్టుకోండి.

-తర్వాత మిక్సీ గిన్నెలో కట్ చేసిన నిమ్మకాయ ముక్కలు, వేయించిన మిరపకాయలు, జీలకర్ర, వెల్లుల్లి, అల్లం, సాధారణ ఉప్పు, నల్ల ఉప్పు,ఒక స్పూన్ బెల్లం వేసి మెత్తగా రుబ్బుకోవాలి.

-చట్నీ రుబ్బిన తర్వాత, ఒక చిన్న గిన్నెలో రెండు స్పూన్ల ఆవ నూనెను వేడి చేయండి. నూనె వేడెక్కాక స్టవ్ ఆపేసి అది పూర్తిగా చల్లారిన తర్వాత ఈ చట్నీలో కలపండి. దీంతో చట్నీ ఎక్కువ రోజులు నిల్వ ఉంటుంది మరియు రుచి రెట్టింపు అవుతుంది.

-ఆలు పరాఠా, గోబీ పరాఠా లేదా చపాతీతో నంచుకుని తింటే అద్భుతంగా ఉంటుంది. వేడి కిచిడీ, పప్పు అన్నం లేదా ముఖ్యంగా పెరుగన్నంలోకి ఈ చట్నీని నంజుకుంటే ఆ రుచిని మాటల్లో వర్ణించలేం. సాయంత్రం వేళ సమోసాలు, బజ్జీలు లేదా పకోడీలతో దీన్ని డిప్‌ గా కూడా వాడవచ్చు.