పెనంపైనే రెస్టారెంట్ స్టైల్ లో.. దూదిలాంటి మెత్తని గార్లిక్ నాన్ చేసేయండిలా!

బయట వైపు కొద్దిగా కరకరలాడుతూ, లోపల దూదిలా మెత్తగా ఉండి.. నోట్లో పెట్టుకోగానే కరిగిపోయే వెల్లుల్లి, వెన్నల సువాసనతో కట్టిపడేసే గార్లిక్ నాన్ తినడం ఒక అద్భుతమైన ఫుడ్ ఎక్స్‌పీరియన్స్. అయితే తందూర్ లేదా పెద్ద పెద్ద మైక్రోవేవ్ ఓవెన్లు లేకుండా ఇలాంటి నాన్ ఇంట్లో చేయడం కష్టమని చాలామంది భావిస్తుంటారు. కానీ వంటగదిలోని పెనంపైనే అచ్చం హోటల్ స్టైల్ గార్లిక్ నాన్‌ ను చాలా ఈజీగా తయారుచేసుకోవచ్చు. అదెలాగో ఇక్కడ చూడండి.

పెనం మీద గార్లిక్ నాన్ తయారీ విధానం

-ఒక గిన్నెలో పిండి తీసుకుని అందులో కొద్దిగా పెరుగు, నూనె, రుచికి సరిపడా ఉప్పు వేసి తగినంత నీటితో మెత్తటి ముద్దలా కలపండి. మీరు కావాలనుకుంటే దీనికి కొద్దిగా ఈస్ట్ వాడుకోవచ్చు, కానీ ఈస్ట్ లేకపోయినా నాన్ అద్భుతంగా వస్తుంది. పిండి ముద్ద ఎంత మృదువుగా ఉంటే మీ నాన్ అంత సాఫ్ట్ గా వస్తుంది.

-పిండిని కలిపిన వెంటనే నాన్ చేయకూడదు. దానిపై ఒక తడి వస్త్రాన్ని లేదా మూతను కప్పి ఉంచి, కనీసం ఒకటి లేదా రెండు గంటల పాటు అలానే వదిలేయండి. ఈ సమయంలో పిండి బాగా నానుతుంది. పిండి ముద్ద తేలికగా మారి, మెత్తటి ఆకృతిని పొందుతుంది.

-ఇప్పుడు ఒక చిన్న గిన్నెలో వెన్నను కరిగించండి. అందులో సన్నగా తరిగిన వెల్లుల్లి ముక్కలు, ఫ్రెష్ కొత్తిమీర తరుగు వేసి బాగా కలపండి. కావాలంటే చిటికెడు ఉప్పు కూడా జోడించండి. ఈ స్పెషల్ మిశ్రమమే మీ నాన్ కు అచ్చమైన రెస్టారెంట్ టచ్ ఇస్తుంది.

ఎముకలకు బలాన్నిచ్చే సంప్రదాయ మటన్ షోర్బా.. ఒక్కసారి రుచి చూస్తే వదిలిపెట్టరు!

-నానిన పిండిని చిన్న ముద్దలుగా తీసుకుని, చపాతీ కర్రతో గుండ్రంగా కాకుండా కొద్దిగా పొడవుగా (ఓవల్ షేప్ లో) మందంగా ఒత్తండి. వండేటప్పుడు అది బాగా అతుక్కోవడానికి, దానిపై సన్నగా తరిగిన వెల్లుల్లి, కొత్తిమీర చల్లి ఒకసారి చేత్తో గట్టిగా నొక్కండి. ఇప్పుడు నాన్ రెండో వైపు కొద్దిగా నీళ్లు రాయండి. బాగా వేడెక్కిన ఇనుప పెనం మీద, నీళ్లు రాసిన వైపు వేయండి. నీళ్ల వల్ల నాన్ పెనానికి గట్టిగా అతుక్కుంటుంది, అస్సలు జారిపోదు.

-నాన్ పైన చిన్న చిన్న బుడగలు రావడం మొదలవ్వగానే, పెనాన్ని అమాంతం తలకిందులుగా తిప్పి స్టవ్ మంట మీద నేరుగా నాన్ ను కాల్చండి. ఇలా చేయడం వల్ల అచ్చం తందూరిలో కాల్చినట్లే స్మోకీ ఫ్లేవర్, అద్భుతమైన రంగు వస్తాయి. ఒకవేళ ఇలా చేయడం మీకు కష్టంగా అనిపిస్తే, పెనం మీదే రెండో వైపు కూడా దోరగా కాల్చుకోవచ్చు.

-బాగా కాలిన నాన్‌ను పెనం మీద నుంచి తీసిన వెంటనే, వేడి మీద ఉండగానే మనం ముందుగా సిద్ధం చేసుకున్న గార్లిక్ బటర్ ను బ్రష్ తో పూయండి. వేడి వేడి నాన్ ఆ వెన్నను పీల్చుకుని మరింత జ్యూసీగా, సువాసనభరితంగా మారుతుంది.

-అంతే టేస్టీ గార్లిక్ నాన్ రెడీ. పనీర్ బటర్ మసాలా, మలై కోఫ్తా, చోలే లేదా మిక్స్డ్ వెజిటబుల్ కర్రీతో దీన్ని లాగించేయొచ్చు. పెరుగు, సలాడ్ తో వడ్డించినా అద్భుతంగా ఉంటుంది.