నోరూరించే మామిడికాయ - చేపల పులుసు

Non Veg

oi-Saraswathi

By Sindhu

Published: Saturday, June 9, 2012, 14:46 [IST]

పండ్లలో రారాజైన మామిడి వంటకాలంటే ఇష్టపడని వారు ఎవరుంటారు చెప్పండి. వేసవికి మామిడికి విడదీయరాని అనుబంధం ఉంది. ఇక మామిడికాయ కాని పండు కాని ఇష్టపడని వారుంటారా? ఎన్ని మామిడిపళ్లు వచ్చినా కూడా కాయలను కూడా విరివిగా ఉపయోగిస్తుంటారు. రోజూ మామిడి తినడానికి కూడా నో అనేవాళ్లు ఉండరు.. అంతగా అందరికి ప్రియమైనది మామిడి... మామిడితో ఎన్నిరకాల రుచులో కాయ , పండు ఏదైనా సరే ఈ సీజన్ మొత్తం మామిడి రుచుల సంబరాలే. మామిడికాయతో పప్పు, పులిహోర, పులుసు, ఆవకాయ, కూరలు, మామిడి సలాడ్స్, మామిడి డ్రింక్స్, మ్యాంగో మిల్క్ షేక్ ఇలా ఒకటేంటి రకరకాలుగా ఇలా ఎన్నో తయారుచేసుకుంటాము. కాని అదే మామిడికాయతో మాంసాహారం కూడా తయారు చేసుకోవచ్చు. చేపల పులుసుకు మామిడి కాయా జోడిస్తే ఆహా ఆ రుచి భలే ఉంటుంది. మరి మీరూ టేస్ట్ చేయాలంటే ఈ మామిడి చేపల పులుసు నేర్చుకోవాల్సిందే....

కావలసిన పదార్థాలు:
చేపలు: 1/2kg
మామిడి కాయ: 1
ఉల్లిపాయలు: 4
వెల్లుల్లి రెబ్బలు: 4-6
జీలకర్ర: 1/2tsp
పసుపు: 1/2tsp
ధనియాలు: 2tbsp
పచ్చిమిర్చి: 6-8
కరివేపాకు: 1cup
కొత్తిమీర: ఒక కట్ట
మిరపపొడి: 2tsp
ఉప్పు: రుచికి తగినంత
నూనె: సరిపడా

తయారు చేసే విధానం:
1. ముందుగా చేపలు శుభ్రం చేసి ముక్కలుగా కట్‌ చేసి వాటిపై ఉప్పు, పసుపు పట్టించి పక్కన ఉంచుకోవాలి.
2. ఈలోపు ఉల్లిపాయలను మెత్తగా నూరుకొని ఒక పాత్రలో ఉల్లిపాయల పేస్ట్‌, వెల్లుల్లి, జీలకర్ర, ధనియాల పొడి, కరివేపాకు, మిరపపొడి, కొత్తిమీరలను కలిపి మిశ్రమంగా చేసుకోవాలి.
3. ఇప్పుడు ఈ విశ్రమాన్ని ముక్కలుగా కట్‌ చేసుకున్న చేపలకు బాగా పట్టించి పక్కన పెట్టుకోవాలి.
4. తరువాత మామిడికాయను ముక్కలుగా కోసి ఒక పాత్రలో నీళ్ళు పోసి మెత్తగా ఉడికించుకోవాలి.
5. ఇప్పుడు మరో గిన్నెలో కొద్దిగా నూనె వేసి మసాల పట్టించి పెట్టుకొన్ని చేపముక్కలను అందులో వేసి 2నిమిషాలు వేయించి కొద్దిగా నీళ్లు పోయాలి.
6. తర్వాత అందులోనే ముందుగా ఉడికించుకున్న ఈ మామిడి కాయ మిశ్రమాన్ని చేపముక్కలు ఉడుకుతున్నపాత్రలో వేసి చిన్న మంటపై నెమ్మదిగా ఉడికించుకోవాలి. కావాలనుకొంటే మామిడి కాయ ముక్కలను కూడా కొద్దిగా చేర్చుకోవచ్చు. చేప ముక్కలు ఉడికాయని నిర్ధారించుకున్న తర్వాత దించుకోవాలి.