North india special recipe: నార్త్ ఇండియా స్పెషల్ 'వెజ్ హండీ దివానీ'..మాటల్లో వర్ణించలేని టేస్ట్,ఎలా చేయాలంటే

వెజ్ దివానీ హండీ అనేది నార్త్ ఇండియాలో చాలా ప్రసిద్ద వంటకం. ఇది వివిధ రకాల కూరగాయలను, సుగంధభరితమైన గ్రేవీలో కలిపి దీనిని తయారుచేస్తారు. 'దివానీ' అనే పదం 'రాజకుటుంబానికి చెందిన' అని అర్థం ఇస్తుంది..'హండీ'అంటే మట్టి కుండ. ఈ వంటకం దాని రాయల్ రుచి,ప్రత్యేకమైన తయారీ విధానానికి ప్రసిద్ధి చెందింది. ఇది సాధారణంగా ప్రత్యేక సందర్భాలలో లేదా విందులలో తయారుచేస్తారు.

వెజ్ దివానీ హండీ..అన్నం, రోటీ లేదా నాన్‌తో చాలా రుచిగా ఉంటుంది. వెజ్ దివానీ హండీ రెసిపీ తయారీకి కావలసిన పదార్థాలు,తయారీ విధానం ఇక్కడ చూడండి.

వెజ్ దివానీ హండీ తయారీకి కావలసిన పదార్థాలు

క్యారెట్ - 1
బంగాళాదుంప - 1
కాలీఫ్లవర్ ముక్కలు - 1 కప్పు
పచ్చి బఠానీలు - 1/2 కప్పు
క్యాప్సికమ్ ముక్కలు - 1/2 కప్పు
ఫ్రెంచ్ బీన్స్ - 1/4 కప్పు
పనీర్ - 100 గ్రాములు
ఉల్లిపాయలు - 2
టమోటాలు - 2
అల్లం వెల్లుల్లి పేస్ట్ - 1 టేబుల్ స్పూన్
జీడిపప్పు - 10-12
బాదం పప్పు - 8-10
పాలు లేదా క్రీమ్ - 1/2 కప్పు
పెరుగు - 2 టేబుల్ స్పూన్లు
నూనె లేదా నెయ్యి - 2 టేబుల్ స్పూన్లు
పసుపు పొడి - 1/2 టీ స్పూన్
కారం పొడి - 1 టీ స్పూన్
ధనియాల పొడి - 1 టీ స్పూన్
జీలకర్ర పొడి - 1/2 టీ స్పూన్
గరం మసాలా - 1/2 టీ స్పూన్
కసూరి మేథీ - 1 టీ స్పూన్
ఉప్పు - రుచికి తగినంత
కొత్తిమీర -కొంచెం

కర్ణాటక స్పెషల్ చికెన్ చాప్స్..తింటే ఆ మజానే వేరు,ఎలా చేయాలంటే

వెజ్ దివానీ హండీ తయారీ విధానం

-ముందుగా ఒక గిన్నెలో వేడి నీరు పోసి జీడిపప్పు, బాదం పప్పులను 15-20 నిమిషాలు నానబెట్టాలి.

-నానిన తర్వాత వాటిని మెత్తని పేస్ట్‌లా గ్రైండ్ చేసుకోవాలి. అవసరమైతే కొద్దిగా పాలు లేదా నీరు కలపవచ్చు.

-ఇప్పుడు అన్ని కూరగాయలను శుభ్రంగా కడిగి చిన్న ముక్కలుగా కట్ చేసుకోవాలి.

-పనీర్ ఉపయోగిస్తుంటే దానిని కూడా చిన్న ముక్కలుగా కట్ చేసి కొద్దిగా వేయించి పక్కన పెట్టుకోవచ్చు.

-ఇప్పుడు స్టవ్ మీద అడుగు మందం ఉంటే బాండీ పెట్టి నూనె లేదా నెయ్యి వేడి చేయాలి.

-నూనె వేడెక్కిన తర్వాత సన్నగా తరిగిన ఉల్లిపాయలు వేసి బంగారు రంగు వచ్చే వరకు వేయించాలి.

-తర్వాత అల్లం వెల్లుల్లి పేస్ట్ వేసి పచ్చి వాసన పోయే వరకు వేయించాలి.

-ఇప్పుడు టమోటా గుజ్జు వేసి నూనె పైకి తేలే వరకు ఉడికించాలి.

-పసుపు పొడి, కారం పొడి, ధనియాల పొడి, జీలకర్ర పొడి వేసి బాగా కలపాలి. కొన్ని సెకన్ల పాటు వేయించాలి.

-తయారుచేసుకున్న జీడిపప్పు, బాదం పేస్ట్ వేసి బాగా కలిపి 2-3 నిమిషాలు ఉడికించాలి.

-పెరుగు వేసి ఉండలు కట్టకుండా బాగా కలపాలి, కొద్దిగా ఉడికించాలి.

-ఇప్పుడు కట్ చేసుకున్న అన్ని కూరగాయలు వేసి గ్రేవీతో బాగా కలపాలి.

-రుచికి తగినంత ఉప్పు వేసి కలపాలి.

-కొద్దిగా నీరు పోసి మూత పెట్టి మీడియం మంటపై కూరగాయలు మెత్తగా ఉడికే వరకు సుమారు 15-20 నిమిషాలు ఉడికించాలి. మధ్య మధ్యలో కలుపుతూ ఉండాలి.

-కూరగాయలు ఉడికిన తర్వాత గరం మసాలా, కసూరి మేథీని చేతులతో నలిపి వేయాలి.

-తర్వాత పాలు లేదా క్రీమ్ వేసి ఒక నిమిషం పాటు ఉడికించాలి.

-వేయించిన పనీర్ ముక్కలు వేసి మెల్లగా కలపాలి.

-చివరగా తరిగిన కొత్తిమీరతో గార్నిష్ చేయాలి. అంటే వెజ్ దివానీ హండీ రెడీ.