శరీరానికి అవసరమైన పోషకాల కోసం.. రుచికరమైన గ్రీన్ పొంగల్ ఎలా చేసుకోవాలంటే..

ఉదయం బ్రేక్ ఫాస్ట్ అనగానే మనకు ముందుగా గుర్తొచ్చేది ఇడ్లీ, దోశ, లేదా పొంగల్. కానీ ఎప్పుడూ ఒకేలాంటి పొంగల్ తిని బోర్ కొట్టిందా? అయితే ఈ సారి ఆరోగ్యానికి మేలు చేసే, నోటికి ఎంతో రుచిగా ఉండే గ్రీన్ పొంగల్(కొత్తిమీర పొంగల్) ట్రై చేయండి. కరివేపాకు, కొత్తిమీర సువాసనలతో ఘుమఘుమలాడే ఈ పొంగల్ ఎలా చేయాలో ఇక్కడ చూడండి.

గ్రీన్ పొంగల్ తయారీకి కావలసిన పదార్థాలు

బియ్యం - 1 కప్పు
పెసరపప్పు - అర కప్పు
నీళ్లు - 4 కప్పులు
ఉప్పు - రుచికి సరిపడా
పసుపు - పావు టీస్పూన్
కొత్తిమీర - 1 కప్పు
పచ్చిమిర్చి - 3 లేదా 4
కరివేపాకు - కొద్దిగా
మిరియాలు - 1 టీస్పూన్
నెయ్యి - 4 టీస్పూన్లు
జీలకర్ర - 1 టీస్పూన్
జీడిపప్పు - గుప్పెడు
అల్లం ముక్కలు - కొద్దిగా
ఇంగువ - చిటికెడు

పాతకాలం పద్దతిలో జొన్నల అన్నం..శరీరానికి అపరిమిత బలం..వారానికి 2 సార్లు తిన్నా 100 ఏళ్లు బలంగా బతికేస్తారు!

గ్రీన్ పొంగల్ తయారీ విధానం

-ముందుగా ఒక గిన్నెలో ఒక కప్పు బియ్యం, అరకప్పు పెసరపప్పు తీసుకుని రెండు మూడు సార్లు శుభ్రంగా కడగాలి.

-కుక్కర్ తీసుకుని అందులో కడిగిన బియ్యం,పెసరపప్పు వేసి 4 కప్పుల నీళ్లు పోయాలి. రుచికి సరిపడా ఉప్పు, పావు టీస్పూన్ పసుపు, ఒక స్పూన్ కమ్మటి నెయ్యి వేసి కుక్కర్ మూత పెట్టాలి. 3 లేదా 4 విజిల్స్ వచ్చే వరకు ఉడికించి, తర్వాత మూత తీసి గరిటతో మెత్తగా మెదిపి పక్కన పెట్టుకోవాలి.

-ఒక మిక్సీ జార్ తీసుకుని అందులో ఒక కప్పు ఫ్రెష్ కొత్తిమీర, 3-4 పచ్చిమిర్చి, కొద్దిగా కరివేపాకు వేసి మెత్తని పేస్ట్‌ లా రుబ్బుకుని పక్కన ఉంచుకోవాలి.

-ఇప్పుడు స్టవ్ మీద కడాయి పెట్టి ఒక స్పూన్ నెయ్యి వేయాలి. నెయ్యి కరిగాక ఒక స్పూన్ మిరియాలు వేసి, ఆ తర్వాత ముందుగా రుబ్బి పెట్టుకున్న కొత్తిమీర-కరివేపాకు పేస్ట్ వేసి పచ్చివాసన పోయేలా 2 నుంచి 3 నిమిషాలు వేయించాలి. ఇప్పుడు ముందుగా ఉడికించి పెట్టుకున్న అన్నం, పప్పు మిశ్రమాన్ని ఇందులో వేసి బాగా కలపాలి.

-మరో చిన్న కడాయిలో 2 స్పూన్ల నెయ్యి వేడి చేసి, అందులో జీలకర్ర, జీడిపప్పులు వేసి దోరగా వేయించాలి. తర్వాత సన్నగా తరిగిన అల్లం ముక్కలు, కరివేపాకు, చిటికెడు ఇంగువ వేసి మంచి సువాసన వచ్చాక.. ఆ తాలింపును నేరుగా పొంగల్ పైన వేసి కలపాలి.

-అంతే ఎంతో కమ్మని, ఆరోగ్యకరమైన కొత్తిమీర పొంగల్ రెడీ. దీనిని కొబ్బరి చట్నీ లేదా వేడి వేడి సాంబార్‌ తో తింటే ఆ రుచే వేరు.