గొంతులో దిగుతుంటే స్వర్గమే..చలికాలానికి బెస్ట్ కడక్ మసాలా ఛాయ్..ఎలా చేసుకోవాలంటే..

బయట చలి గజగజా వణికిస్తోంది.. చల్లటి గాలులు శరీరాన్ని తాకుతున్నాయి. సరిగ్గా ఈ సమయంలో చేతిలో వేడివేడి టీ కప్పు ఉంటే అద్భుతంగా ఉంటుంది. ఇక ఆ టీ మామూలుగా కాకుండా.. కాస్త ఘాటుగా, మసాలా దట్టించి, నోటికి రుచిగా తగులుతుంటే..స్వర్గమే అని చెప్పాలి.

టీ అనేది మన భారతీయులకు కేవలం పానీయం మాత్రమే కాదు, అది ఒక ఎమోషన్. కానీ చాలామందికి స్ట్రాంగ్ మసాలా టీని పర్ఫెక్ట్ గా ఎలా తయారు చేయాలో తెలియదు. టీ పెట్టడం ఒక కళ. అందులో వేసే పాలు, నీళ్లు, టీ పొడి, మసాలాల నిష్పత్తి ఏమాత్రం తగ్గినా రుచి మారిపోతుంది. ఈ చలికాలంలో దగ్గు, జలుబు దరిచేరనివ్వకుండా, శరీరానికి వెచ్చదనాన్ని ఇచ్చే పర్ఫెక్ట్ కడక్ మసాలా ఛాయ్ ఎలా తయారు చేసుకోవాలో ఇక్కడ చూడండి.

మసాలా టీ తయారీకి కావలసిన పదార్థాలు
-యాలకులు
-లవంగాలు
-నల్ల మిరియాలు
-దాల్చిన చెక్క
-జాజికాయ
-సోంపు
-ఎండిన గులాబీ రేకులు
-శొంఠి పొడి (ఎండిన అల్లం పొడి)
-పాలు
-నీరు

మసాలా టీ తయారీ విధానం

-ముందుగా స్టవ్ మీద పాన్ పెట్టి అందులో యాలకలు, లవంగాలు, నల్ల మిరియాలు, దాల్చిన చెక్క, జాజికాయ, సోంపు వేసి కేవలం వేడి చేయాలి. అవి వేడెక్కి, వాటిలోని తేమ పోతే చాలు. రంగు మారేదాకా వేయించకూడదు.

-స్టవ్ ఆఫ్ చేసిన తర్వాత ఆ వేడి మిశ్రమంలో ఎండిన గులాబీ రేకులను వేయండి. ఇవి చల్లారాక మిక్సీ జార్ లో వేసి మెత్తగా పొడి చేసుకోవాలి. చివరగా ఈ పొడిలో శొంఠి పొడిని కలపాలి. అంతే.. గుమగుమలాడే టీ మసాలా రెడీ. దీన్ని గాలి చొరబడని డబ్బాలో నిల్వ చేసుకోవచ్చు.

-ఇప్పుడు ఒక గిన్నెలో 4 కప్పుల నీటిని తీసుకుని బాగా మరిగించాలి. నీళ్లు మరుగుతున్నప్పుడు 4 టీస్పూన్ల టీ పొడి, మీ రుచికి సరిపడా పంచదార వేయాలి.

-టీ డికాక్షన్ బాగా మరుగుతున్నప్పుడు 2 కప్పుల పాలు పోయాలి. పాలు పోసిన తర్వాత మంటను హై ఫ్లేమ్ లో పెట్టి పొంగు రానివ్వాలి.

-టీ బాగా మరిగి చిక్కబడుతున్న సమయంలో ముందుగా సిద్ధం చేసుకున్న మసాలా పొడిని ముప్పావు టీస్పూన్ వేయాలి. మసాలా వేసిన తర్వాత టీని ఎక్కువ సేపు మరిగించకూడదు. కేవలం ఒకటి లేదా రెండు నిమిషాలు మరిగించి, మసాలా వాసన టీకి పట్టగానే స్టవ్ ఆఫ్ చేయాలి.

-ఇప్పుడు టీని వడకట్టి, వేడివేడిగా కప్పుల్లో పోసి సర్వ్ చేయండి.ఈ మసాలా టీ గొంతులో దిగుతుంటే, అందులోని మిరియాల ఘాటు, యాలకుల సువాసన, శొంఠి వెచ్చదనం మీ శరీరానికి తక్షణ శక్తిని ఇస్తాయి.