సూపర్ టేస్టీ, హెల్తీ పాలక్ రైస్..జస్ట్ 10 నిమిషాల్లోనే ఎలా చేసుకోవాలంటే..

ఆరోగ్యానికి మేలు చేసే ఆహారాల్లో పాలకూర టాప్ ప్లేస్ లో ఉంటుంది. పాలకూరలో విటమిన్లు, ఖనిజాలు, యాంటీఆక్సిడెంట్లు పుష్కలంగా ఉంటాయి. కానీ,చాలామంది పిల్లలు, పెద్దలు పాలకూర కూరగా వండితే తినడానికి ఇష్టపడరు. అలాంటివారి కోసం రుచికరమైన, సులభమైన వంటకం పాలక్ రైస్. ఇది లంచ్ బాక్స్‌ కు, త్వరగా భోజనం తయారు చేసుకోవడానికి, అతిథులు వచ్చినప్పుడు చేయడానికి చాలా సరైన ఎంపిక. కేవలం 10 నిమిషాల్లోనే దీనిని తయారుచేసుకోవచ్చు. మిగిలిపోయిన అన్నంతో కూడా దీనిని రెడీ చేసుకోవచ్చు. బ్యాచిలర్స్ కూడా చాలా సింపుల్ గా పాలక్ రైస్ ను ఎలా తయారుచేసుకోవాలో ఇక్కడ చూడండి.

పాలక్ రైస్ తయారీకి కావాల్సిన పదార్థాలు

-రైస్
-ఉల్లిపాయ
-పచ్చిమిర్చి
-పాలకూర
-కొత్తిమీర
-కరివేపాకు
-ఉప్పు
-పసుపు
-ఆయిల్
-పోపు దినుసులు
-నెయ్యి
-వెల్లుల్లి రెబ్బలు

పాలక్ రైస్ తయారీ విధానం

-ముందుగా స్టవ్ వెలిగించి పాన్ పెట్టి అందులో 1 లీటర్ నీళ్లు పోసి మరిగించాలి.

-నీళ్లు మరుగుతున్నప్పుడు అందులో 4 చిన్న కట్టల పాలకూర వేసి 2 నిమిషాలు ఉడకనివ్వాలి. పాలకూరను ఉడికించేటప్పుడు ఎక్కువసేపు ఉంచకూడదు. అలా చేస్తే దానిలోని పోషకాలు కోల్పోయే అవకాశం ఉంది.

-2 నిమిషాలు ఉడికించిన పాలకూరను ఓ ప్లేట్ లోకి తీసుకోవాలి.

-తర్వాత పాలకూరను మిక్సీ జార్ లో వేసి మెత్తగా గ్రైండ్ చేసుకోవాలి.

-ఇప్పుడు స్టవ్ మీద పాన్ పెట్టి అందులో 1 టేబుల్ స్పూన్ ఆయిల్, కొద్దిగా నెయ్యి వేసి వేడి చేసి 1 టేబుల్ స్పూన్ పోపు దినుసులు వేసి ఫ్రై చేసుకోవాలి.

-పోపు దినుసులు వేగాక అందులో 1 పెద్ద ఉల్లిపాయ చీలికలు, కరివేపాకు, 3 పచ్చిమిర్చి ముక్కలు వేసి వేయించాలి.

-తర్వాత అందులో పొట్టు తీసిన 10 వెల్లుల్లి రెబ్బలను చిన్న ముక్కలుగా కట్ చేసి వేసి వేయించుకోవాలి.

-ఇప్పుడు ఇందులో మిక్సీ వేసుకున్న పాలకూర పేస్ట్, 1 టీస్పూన్ పసుపు,రుచికి సరిపడా ఉప్పు వేసి 5 నిమిషాలు ఫ్రై చేసుకోవాలి.

-తర్వాత అందులో 1 పెద్ద కప్పు రైస్ వేసి కలుపుకోవాలి.

-తర్వాత అందులో కొత్తిమీర తరుగు వేసి కలుపుకొని స్టవ్ ఆఫ్ చేసేయండి. అంతే టేస్టీ పాలక్ రైస్ రెడీ.

ప్రయోజనాలు

పాలక్ రైస్ తినడం వల్ల రక్తహీనత (Anemia) సమస్యను నివారించవచ్చు. చెడు కొలెస్ట్రాల్ (LDL) స్థాయిలను తగ్గించడంలో సహాయపడుతుంది. పాలక్ రైస్ వంటి వంటకాలు తినడం వల్ల క్యాలరీలను తక్కువగా తీసుకుంటూనే శరీరానికి అవసరమైన పోషకాలను పొందవచ్చు, ఇది బరువు నియంత్రణలో సహాయపడుతుంది. పాలక్ రైస్‌ ను మరింత ఆరోగ్యకరంగా మార్చడానికి, మీరు కొన్ని కూరగాయలు (క్యారెట్, బీన్స్, బఠానీలు) కూడా కలుపుకోవచ్చు.