నోరూరించే క్రీమీ చీజ్ కార్న్..స్నాక్, సైడ్ డిష్,బ్రెడ్‌ తో ఎలా తిన్నా అద్భుతమే..ఈజీగా ఇలా చేసుకోండి

స్నాక్ గా లేదా సైడ్ డిష్ గా లేదా బ్రెడ్ తో కలిపి తినడానికి క్రీమీ చీజ్ కార్న్ అద్భుతంగా ఉంటుంది. ఇది చాలామంది ఇష్టపడే రుచికరమైన, సులభంగా తయారుచేసుకోగలిగే వంటకం. బ్యాచిలర్స్ కూడా తమ రూములో నిమిషాల్లో దీనిని ప్రిపేర్ చేసుకోవచ్చు. చాలా రుచికరంగా ఉండే దీన్ని ముఖ్యంగా పిల్లలు ఎంతగానో ఆస్వాదిస్తారు. దీన్ని ఒక్కసారి టేస్ట్ చేశారంటే మళ్లీ మళ్లీ తినాలనిపించడం గ్యారెంటీ. క్రీమీ,చీజీ కార్న్ రెసిపి తయారుచేయడానికి కావాల్సిన పదార్థాలు,తయారీ విధానం ఇక్కడ చూడండి.

తయారీకి కావాల్సిన పదార్థాలు
-స్వీట్ కార్న్ గింజలు
-వెన్న (బటర్)
-మైదా పిండి
-పాలు
-చీజ్ తురుము
-ఉప్పు
-మిర్చి ఫ్లేక్స్
-ఒరెగానో
-కొత్తిమీర

తయారీ విధానం

-ఒక గిన్నెలో నీళ్లు పోసి కొద్దిగా ఉప్పు వేసి మరిగించండి. నీళ్లు మరుగుతున్నప్పుడ, స్వీట్ కార్న్ గింజలను అందులో వేసి 3-5 నిమిషాలు ఉడికించండి. అవి మృదువుగా మారిన తర్వాత, నీటిని వడగట్టి పక్కన పెట్టుకోండి. ఫ్రోజెన్ స్వీట్ కార్న్ వాడుతున్నట్లయితే ప్యాకెట్‌ పై ఉన్న సూచనల ప్రకారం ఉడికించుకోండి. సాధారణంగా వాటిని వేడి నీటిలో వేసి 2-3 నిమిషాలు ఉడికిస్తే సరిపోతుంది.

-ఇప్పుడు స్టవ్ మీద పాన్ పెట్టి అందులో వెన్న, కొద్దిగా వెల్లుల్లి తరుగు వేసి 10 సెకన్లు వేడి చెయ్యాలి.

-తర్వాత అందులో 1 టీస్పూన్ మైదా వేసి బాగా కలపాలి. ఉండలు కట్టకుండా నిరంతరం కలుపుతూ 1-2 నిమిషాలు వేయించండి. పిండి రంగు మారకుండా, పచ్చి వాసన పోయే వరకు వేయించాలి.

-తర్వాత అందులో అరకప్పు పాలు నెమ్మదిగా పోస్తూ గరిటెతో నిరంతరం కలుపుతూ ఉండండి. 2 నిమిషాలు మరిగించాలి. ఒకేసారి పాలు పోస్తే ఉండలు కట్టే అవకాశం ఉంది.

-తర్వాత ఉప్పు, పెప్పర్ పౌడర్, మిరప రేకులు(పిజ్జా,పాస్తాలలో కారం కోసం వేసే ఎండు మిరప పొడి), ఒరేగానో వేసి మొత్తం కలిసేలా బాగా కలుపుకోవాలి.

-తర్వాత అందులో స్వీట్ కార్న్ ఒక కప్పు, చీజ్ తురుము వేసి బాగా కలపాలి. చీజ్ కరిగే కొద్దీ సాస్ మరింత క్రీమీగా, రిచ్‌గా మారుతుంది. 2 నిమిషాలు కలుపుతూ ఉడికించాక స్టవ్ ఆపేయాలి. చివరగా కొద్దిగా తరిగిన కొత్తిమీరతో గార్నిష్ చేయండి. అంతే క్రీమీ చీజీ కార్న్ రెడీ.