ప్రోటీన్, విటమిన్లతో నిండిన పల్లి చాట్.. సింపుల్ గా, టేస్టీగా ఎలా చేసుకోవాలంటే

పల్లి చాట్..దీనిని వేరుశనగ చాట్ అని కూడా అంటారు, ఇది ఒక ప్రసిద్ధ భారతీయ చిరుతిండి. ముఖ్యంగా మన దేశంలో అన్ని ప్రాంతాల్లో పల్లి చాట్ ఎక్కువగా తింటారు. ఇది చాలా తక్కువ సమయంలో సులభంగా తయారు చేసుకోవచ్చు, అందుకే సాయంత్రం వేళల్లో ఆకలిగా అనిపించినప్పుడు తినడానికి ఇది ఒక మంచి ఆప్షన్. పల్లి చాట్ రుచిగా ఉండటమే కాకుండా, ఆరోగ్యానికి కూడా చాలా మంచిది. ఇందులో ప్రోటీన్లు, విటమిన్లు, ఇతర పోషకాలు పుష్కలంగా ఉంటాయి. పల్లి చాట్ ఎలా తయారుచేసుకోవాలో ఇక్కడ చూడండి.

పల్లి చాట్ తయారీకి కావాల్సిన పదార్థాలు

-వేరుశనగలు: 1 కప్పు
-ఉల్లిపాయ: 1
-టమాటా: 1
-క్యారెట్: 1/2 తురుము
-దోసకాయ: 1/2 చిన్నగా తరిగినది
-పచ్చిమిర్చి: 1-2
-కొత్తిమీర: 2 టేబుల్ స్పూన్లు
-నిమ్మరసం: 1 టేబుల్ స్పూన్
-చాట్ మసాలా: 1/2 టీస్పూన్
-కారం పొడి: 1/4 టీస్పూన్
-ఉప్పు: రుచికి సరిపడా
-కారం బూంది: అలంకరణ కోసం

తయారీ విధానం

-మొదటగా ఒక పెద్ద గిన్నె తీసుకోండి. అందులో వేయించిన వేరుశనగలు వేయండి. వేరుశనగలను ఇంట్లోనే నూనె లేకుండా పొడిగిన్నెలో వేయించుకోవచ్చు లేదా బయట మార్కెట్లో దొరికే వేయించిన వేరుశనగలను ఉపయోగించవచ్చు.

-ఇప్పుడు అందులోనే తరిగిన ఉల్లిపాయలు, టమాటాలు, క్యారెట్ తురుము, దోసకాయ ముక్కలు, పచ్చిమిర్చి, కొత్తిమీర వేయండి.

-అన్ని పదార్థాలు వేసిన తర్వాత వాటిని వేరుశనగలతో బాగా కలపండి.

-తర్వాత చాట్ మసాలా, కారం పొడి, ఉప్పు, నిమ్మరసం వేసి మళ్ళీ బాగా కలపండి. అన్ని మసాలాలు అన్ని పదార్థాలకు బాగా పట్టేలా కలపాలి.

-చివరగా చాట్‌ ను ఒక సర్వింగ్ ప్లేట్ ‌లోకి తీసుకోండి. దానిపైన కొంచెం సేవ్ లేదా కారం బూంది వేసి అలంకరించండి.

-రుచికరమైన పల్లి చాట్ రెడీ. దీన్ని వెంటనే తినేయాలి, లేకపోతే కూరగాయలు నీరు వదిలి మెత్తగా అయిపోవచ్చు.

-మీరు చాట్ మరింత ఘాటుగా ఉండాలనుకుంటే, పచ్చిమిర్చి, కారం పొడిని కొంచెం ఎక్కువగా వేసుకోవచ్చు. అలాగే పుల్లటి రుచి కోసం నిమ్మరసం బదులుగా చింతపండు గుజ్జును కూడా ఉపయోగించవచ్చు.