90s కిడ్స్ ఫేవరెట్: నోరూరించే చింతపండు లాలీపాప్.. ఇంట్లోనే ఈజీగా ఇలా చేసుకోండి!

సమ్మర్ హాలిడేస్ రాగానే పిల్లలకు ఆటలతో పాటు రుచికరమైన చిరుతిళ్లు తినాలనిపిస్తుంది. ముఖ్యంగా 90వ దశకంలో పుట్టిన వారికి స్కూల్ బయట దొరికే చింతపండు లాలీపాప్(చింతపండు కాండీ) అంటే ఎంతో ఇష్టం. ఆ తీపి, పులుపు, కారం కలిసిన అద్భుతమైన రుచిని ఎవరూ మర్చిపోలేరు.

ఈ రోజుల్లో సూపర్ మార్కెట్లలో ఎన్ని రకాల దిగుమతి చేసుకున్న చాక్లెట్లు, క్యాండీలు దొరుకుతున్నా, మన అమ్మమ్మలు, నాయనమ్మలు చేసిపెట్టిన, మన స్కూల్ బయట కొనుక్కున్న ఈ చింతపండు లాలీపాప్ రుచి ముందు అవన్నీ దిగదుడుపే. ఇది కేవలం ఒక తినుబండారం కాదు, ఇది ఒక ఎమోషన్.

ఈ వేసవిలో బయట దొరికే కృత్రిమ రంగుల చాక్లెట్ల కంటే ఇంట్లోనే చాలా సులభంగా, ఆరోగ్యకరంగా ఈ చింతపండు లాలీపాప్ తయారు చేసి పిల్లలకు ఇవ్వొచ్చు. ఈ సమ్మర్ హాలిడేస్‌ లో మీ ఇంట్లో ఈ ఈజీ రెసిపీని కచ్చితంగా ట్రై చేస్తే, పిల్లలు పదే పదే అడిగి మరీ తింటారు. కేవలం చిటికెలో దీన్ని రెడీ చేసుకోవచ్చు. చింతపండు లాలీపాప్ ఎలా తయారు చేయాలో ఇక్కడ చూడండి.

చింతపండు లాలీపాప్ తయారీకి కావలసిన పదార్థాలు

చింతపండు - అర కప్పు
బెల్లం - ఒక కప్పు
కారం - అర టీస్పూన్
వేయించిన జీలకర్ర - అర టీస్పూన్
ఉప్పు - రుచికి సరిపడా
చాట్ మసాలా లేదా నల్ల ఉప్పు- పావు టీస్పూన్
నెయ్యి లేదా నూనె - కొద్దిగా (చేతులకు రాసుకోవడానికి)
ఐస్ క్రీమ్ పుల్లలు లేదా టూత్ పిక్స్ - తగినన్ని

చింతపండు లాలీపాప్ తయారీ విధానం

-ముందుగా చింతపండును శుభ్రం చేసి, అందులో గింజలు లేదా పీచు లాంటివి ఏమైనా ఉంటే తీసేయాలి.

-ఇప్పుడు రోట్లో చింతపండు,బెల్లం, వేయించిన జీలకర్ర, ఉప్పు వేసి మొత్తాన్ని మెత్తగా దంచుకోవాలి. రోలు లేకుంటే మిక్సీలో అయినా వేసి చేసుకోవచ్చు.

-ఈ మిశ్రమాన్ని ఒక ప్లేట్‌ లోకి తీసుకోండి.

-ఇప్పుడు చేతులకు కొద్దిగా నెయ్యి లేదా వంటనూనె రాసుకోవాలి. చింతపండు మిశ్రమం నుండి చిన్న నిమ్మకాయ సైజు అంత ముద్దను తీసుకుని, చేతిలో గుండ్రంగా బంతిలా చేసుకోవాలి. ఆ బంతి మధ్యలో ఒక ఐస్ క్రీమ్ పుల్లను లేదా టూత్ పిక్ ను గుచ్చాలి. లాలీపాప్ జారిపోకుండా పుల్లకు బాగా అతుక్కునేలా చేత్తో గట్టిగా నొక్కాలి. మీరు కావాలనుకుంటే గుండ్రంగా కాకుండా కొద్దిగా చదునుగా (ఫ్లాట్ గా) కాయిన్ లాగా కూడా చేసుకోవచ్చు.

-అంతే ఎంతో రుచికరమైన, నోరూరించే చింతపండు లాలీపాప్ లు రెడీ.

ముఖ్యమైన చిట్కాలు

-వీటిని తయారుచేయడానికి చక్కెర కంటే బెల్లం వాడటమే ఆరోగ్యానికి ఎంతో మంచిది. బెల్లం వల్ల ఐరన్ అందుతుంది, చింతపండు, జీలకర్ర జీర్ణక్రియను మెరుగుపరుస్తాయి.

-పిల్లలు కారం ఎక్కువగా తినలేరు కాబట్టి, కారం మోతాదును తగ్గించి మిరియాల పొడిని కొద్దిగా వాడినా ఆరోగ్యానికి మంచిది.

-మీరు తీసుకున్న చింతపండు బాగా పాతది, నల్లగా ఉన్నదైతే పులుపు ఎక్కువగా ఉంటుంది. అప్పుడు బెల్లం మోతాదును కొద్దిగా పెంచుకోవాలి. రుచి చూసుకుని మీ కమ్మదనానికి తగ్గట్టుగా మార్పులు చేసుకోవచ్చు.