మటన్ కంటే రుచిగా..మసాలా మీల్ మేకర్ కర్రీ..ఎలా చేసుకోవాలంటే

మీల్ మేకర్.. సోయా చంక్స్ లేదా సోయా వడియాలు అని పిలువబడే ఈ ఆహార పదార్థం ఇటు శాఖాహారులకు,అటు మాంసాహారులకు ఒక గొప్ప పోషకాహారం. మీల్ మేకర్ తో చేసే మసాలా కర్రీ ఒక రుచికరమైన, ఆరోగ్యకరమైన వంటకం. ఇది ప్రోటీన్, పీచు పదార్థం, అనేక ముఖ్యమైన ఖనిజాలు, విటమిన్ల గొప్ప మూలం. ఇది అన్నం, రోటీ లేదా చపాతీతో కలిపి తింటే చాలా బాగుంటుంది. దీనిని తయారు చేయడం కూడా చాలా సులభం. మీ ఆహారంలో మీల్ మేకర్‌ ను భాగంగా చేసుకోవడం వల్ల అనేక ఆరోగ్య ప్రయోజనాలను కూడా పొందవచ్చు. మటన్ ని మించిన టేస్ట్ ఉండే మీల్ మేకర్ కర్రీ తయారుచేయడానికి కావలసిన పదార్థాలు, తయారీ విధానం ఇక్కడ చూడండి.

కావలసిన పదార్థాలు

-మీల్ మేకర్: 1 కప్పు
-ఉల్లిపాయలు: 2
-టమాటాలు: 2
-అల్లం వెల్లుల్లి పేస్ట్: 1 టేబుల్ స్పూన్
-పచ్చిమిర్చి: 2-3
-నూనె: 2-3 టేబుల్ స్పూన్లు
-జీలకర్ర: 1 టీ స్పూన్
-ఆవాలు: 1/2 టీ స్పూన్
-పసుపు: 1/4 టీ స్పూన్
-కారం: 1-2 టీ స్పూన్లు
-ధనియాల పొడి: 1 టీ స్పూన్
-జీలకర్ర పొడి: 1/2 టీ స్పూన్
-గరం మసాలా: 1/2 టీ స్పూన్
-కసూరి మేతి: 1/2 టీ స్పూన్
-కొత్తిమీర: గార్నిష్ కోసం
-ఉప్పు: రుచికి తగినంత
-నీరు: అవసరమైన మేరకు

తయారీ విధానం

-ముందుగా ఒక గిన్నెలో వేడి నీరు పోసి మీల్ మేకర్‌ ను వేయండి. వాటిని సుమారు 10-15 నిమిషాలు నాననివ్వండి. మీల్ మేకర్ మెత్తగా అయ్యాక వాటిని చేతులతో పిండి అదనపు నీటిని తీసివేయండి.

-తర్వాత ఒక మందపాటి అడుగు కలిగిన కడాయిలో నూనె వేసి వేడి చేయండి. నూనె వేడయ్యాక జీలకర్ర, ఆవాలు వేసి అవి చిటపటలాడిన తర్వాత పచ్చిమిర్చి వేసి కొద్దిగా వేయించండి.

-ఇప్పుడు సన్నగా తరిగిన ఉల్లిపాయలు వేసి బంగారు రంగు వచ్చే వరకు బాగా వేయించండి. ఉల్లిపాయలు వేగిన తర్వాత అల్లం వెల్లుల్లి పేస్ట్ వేసి ఒక నిమిషం పాటు పచ్చి వాసన పోయే వరకు వేయించండి.

-తర్వాత తరిగిన టమాటాలు లేదా టమాటా ప్యూరీ వేసి నూనె పైకి తేలే వరకు బాగా ఉడికించండి.

ఇప్పుడు పసుపు, కారం, ధనియాల పొడి, జీలకర్ర పొడి వేసి బాగా కలపండి. మసాలాలు బాగా వేగిన తర్వాత, నానబెట్టి పిండిన మీల్ మేకర్ చంక్స్‌ను వేసి మసాలా అంతా వాటికి పట్టేలా బాగా కలపండి.

ఇప్పుడు మీకు కావలసినంత నీరు పోసి రుచికి తగినంత ఉప్పు వేసి కలపండి.

కడాయిని మూత పెట్టి మీడియం మంట మీద 10-15 నిమిషాలు లేదా మీల్ మేకర్‌కు మసాలా బాగా పట్టే వరకు ఉడికించండి. మధ్య మధ్యలో కలుపుతూ ఉండండి.

కర్రీ ఉడికిన తర్వాత గరం మసాలా, నలిపిన కసూరి మేతి వేసి బాగా కలపండి. ఒక రెండు నిమిషాలు ఉడికించి స్టవ్ ఆఫ్ చేయండి.

చివరగా తరిగిన కొత్తిమీరతో గార్నిష్ చేసి వేడి వేడిగా అన్నం, రోటీ లేదా చపాతీతో తింటే కేక అంతే.